སི་ཁྲོན་ཞིང་ཆེན་གྱི་གེ་སར་རིག་གནས་བསྡུ་སྒྲིག་དང་ཞིབ་འཇུག་ལས་ཀར་སྐུལ་འདེད་དར་སྤེལ་གཏོང་ཆེད།སྤྱི་ཟླ་8པའི་ཚེས་8ཉིན་གྱི་སྔ་དྲོར།རྒྱལ་ཡོངས་གེ་སར་གཞུང་ལས་ཁང་དང་སི་ཁྲོན་ཞིང་ཆེན་རིག་གནས་ཐིང་གཉིས་ཀྱིས་མཉམ་དུ་གཙོ་སྒྲུབ་བྱས་པའི་2015ལོའི་སི་ཁྲོན་ཞིང་ཆེན་གེ་སར་གྱི་ཕ་སར་བསྐྱོད་པ__ སྒྱུ་འཕྲུལ་བཀོད་པའི་ཁྱུང་མཆུ།ཕུན་སུམ་ཚོགས་པའི་སྐྱ་རྩལ་ཞེས་པའི་མུ་འབྲེལ་རིག་གནས་བྱེད་སྒོ་ཧུང་ཡོན་ནས་དངོས་སུ་འགོ་བརྩམས།

             རྒྱལ་ཡོངས་གེ་སེར་འགོ་ཁྲིད་ཚོ་ཆུང་གི་གཞུང་ལས་ཁང་གི་ཀྲུའུ་རིན་ནོར་བུ་དབང་ལྡན་གྱིས་གཏམ་བཤད་གནང་བཞིན་པ།

     ཐེངས་འདིའི་བྱེད་སྒོ་རུ་སྒོ་འབྱེད་མཛད་སྒོ་དང་རིག་རྩལ་འཁྲབ་སྟོན།གེ་སར་རིག་གནས་ཡུལ་དངོས་སུ་རྟོག་ཞིབ་བྱས་ཏེ་བགྲོ་གླེང་སྤེལ་བ་བཅས་ལེ་ཚན་གསུམ་ཡོད་དེ།པེ་ཅིང་དང་ནང་སོག མཚོ་སྔོན། ཤིན་ཅང་། ཡུན་ནན། ཀན་སུའུ་སོགས་ཀྱི་གེ་སར་རིག་གནས་ཆེད་མཁས་དང་སྒྲུང་བཤད་སྒྱུ་རྩལ་པ་43བྱེད་སྒོ་རུ་ཕེབས་ཡོད།

                                   སི་ཁྲོན་ཞིང་ཆེན་གྱི་རིག་གནས་ཐིང་གི་འགོ་གཙོ་གཞོན་པ་ཚེ་པོས་གཏམ་བཤད་གནང་བཞིན་པ།
      སྒོ་འབྱེད་མཛད་སྒོའི་སྟེང་། རྔ་བ་ཁུལ་དང་ཧུང་ཡོན་རྫོང་གི་དབུ་ཁྲིད་ཀྱིས་ཤིས་ཚིག་ཕུལ་བ་དང་། རྒྱལ་ཡོངས་གེ་སར་ལས་ཀ་དབུ་ཁྲིད་ཚོ་ཆུང་གི་གཞུང་ལས་ཁང་གི་ཀྲུའུ་རེན་ནོར་བུ་དབང་ལྡན་གྱིས་གསུང་བཤད་གལ་ཆེན་གནང་།སི་ཁྲོན་ཞིང་ཆེན་རིག་གནས་ཐིང་གི་འགོ་གཙོ་གཞོན་པ་ཚེ་པོས་མཛད་སྒོ་དངོས་སུ་འགོ་ཚུགས་པ་ཁྱབ་བསྒྲགས་བྱས།    རིག་རྩལ་བྱེད་སྒོ་རུ།རྣམ་ཐར་ཟློས་གར་གེ་སར་རྟ་བཀོད་དང་སྒྲུང་བཤད་རྒྱུན་འཛིན་གསེར་ཐག་རིང་མོ་སོགས་ཀྱི་རིག་རྩལ་འཁྲབ་སྟོན་བྱས།

     སྒྲུང་མཁན་སྒྱུ་རྩལ་པས་སྒྲུང་བཤད་བྱེད་བཞིན་པ།

      གེ་སེར་གྱི་སྒྲུང་འཁྲབ་སྟོན་བྱེད་བཞིན་པ།

                  རྟ་རྩལ་ངོམ་བཞིན་པ།

         ཚེས་9ཉིན།གེ་སེར་ཆེད་མཁས་པའི་ཚོ་ཆུང་གིས་གེ་སར་ངག་རྒྱུན་གྱི་ཡུལ་དངོས་སུ་རྟོག་ཞིབ་བྱས་པ་དང་གེ་སར་རིག་གནས་ཀྱི་ཆེད་མཁས་བགྲོ་གླེང་ཚོགས་འདུ་འཚོགས།སྤྱིར་ཧུང་ཡོན་གྱི་མངའ་ཁོངས་སུ་གླིང་གི་ངག་རྒྱུན་མང་ཞིང་སྨན་སེང་ལྕམ་འབྲུག་མོའི་འབྲོག་ལས་ཡོ་བྱད་དང་འབྲེལ་བའི་ས་མིང་སྣ་ཚོགས་ཡོད་པ་སྟེ།འབྲུག་མོའི་ཆུ་རྐ་དང་འབྲུག་མོའི་དོ་ཆ།འབྲུག་མོའི་རྟ་ར།འབྲུག་མོའི་འོ་རྐྱལ།འབྲུག་མོའི་འོ་ཟངས་སོགས་ནི་ཡུལ་ཕྱོགས་འདིར་ས་ཁྱབ་རྡོ་ཁྱབ་ཡིན།རྒྱུས་ལོན་བྱུང་བ་ལྟར་ན།སྤྱི་ཟླ་8པའི་ཚེས་10ནས་12བར།དཀར་མཛེས་ཁུལ་གསེར་རྟ་རྫོང་ནས་བྱེད་སྒོ་འདི་མུ་མཐུད་དུ་སྤེལ་རྒྱུ་ཡིན་འདུག །