སྤྱི་ཟླ་11པའི་ཚེས་2ཉིན། རྒྱལ་ཁབ་རིམ་པ་དང་པོའི་སྲུང་སྐྱོབ་སྲོག་ཆགས་ཁྲུང་ཁྲུང་སྐེ་ནག་50ལྷག་ལྷོ་བཞུད་ཀྱི་གོ་རིམ་ཁྲོད་སི་ཁྲོན་ཞིང་ཆེན་རྔ་བ་ཁུལ་ཧོང་ཡོན་རྫོང་ཨ་མཆོག་གྲོང་རྡལ་སྐ་ཆུའི་འབབ་ཡུལ་དུ་བབས་ནས་ངལ་གསོས། སྐ་ཆུའི་འབབ་ཡུལ་ནི་ཁྲུང་ཁྲུང་སྐེ་ནག་གི་ངལ་གསོ་གནས་གལ་ཆེན་ཞིག་ཡིན་ཞིང་ལོ་རེ་ཐེངས་གཅིག་ལ་གནས་འདིར་བབས་ནས་དུས་ཡུན་ཟླ་3ནས་4ཙམ་ལ་ངལ་གསོ་བྱེད།
ཁྲུང་ཁྲུང་སྐེ་ནག་ནི་འཛམ་གླིང་སྟེང་མདོ་དབུས་མཐོ་སྒང་ན་མ་གཏོགས་མེད་པའི་རང་རྒྱལ་གྱི་རིམ་པ་དང་པོའི་སྲུང་སྐྱོབ་བྱེད་པའི་སྲོག་ཆགས་ཤིག་ཡིན། ཁྲུང་ཁྲུང་སྐེ་ནག་ཡོད་སའི་ས་ཁོངས་ཆུང་སྟེ། ཀྲུང་གོ་ལས་གཞན་འབྲུག་ཡུལ་དུའང་ཉུང་ཤས་ཤིག་འཚོ་སྡོད་བྱས་ཡོད་པ་དང་། སྔོན་རྒྱ་གར་སོགས་སུའང་ཁྲུང་ཁྲུང་ཡོད་པར་བཞེད་མོད་ད་ལྟ་རྒྱུད་ཆད་འདུག ཀྲུང་གོ་ནས་ཀྱང་མདོ་དབུས་མཐོ་སྒང་ན་མ་གཏོགས་མེད། ཁྲུང་ཁྲུང་སྐེ་ནག་ནི་འཕུར་སྐྱོད་བྱེད་པའི་ཆུ་བྱ་ཆེ་གྲས་ཀྱི་རིགས་ཤིག་ཡིན། དར་ལ་བབ་པའི་ཁྲུང་ཁྲུང་སྐེ་ནག་གི་ལྗིད་ཚད་ལ་སྤྱི་རྒྱ་5ནས་1.5ཡོད། ཁྲུང་ཁྲུང་སྐེ་ནག་གི་སྒྲོ་སྤུའི་ཁ་དོག་ནི་དཀར་སྐྱ་ཡིན་པ་དང་། སྤྱི་གཙུག་གི་ཤ་མདོག་དམར་ནག་ཡིན་ཞིང་ཐར་ཐོར་གྱི་སྤུ་ཁ་ཤས་སྐྱེས་ཡོད། མིག་གི་ལྟག་རྒྱབ་དང་འོག་ཕྱོགས་སུ་མདོག་དཀར་པོའམ་དཀར་སྐྱའི་ཁྲ་ཐིག་ཙམ་ཡོད་པ་ལས་མགོ་དང་སྐེའི་སུམ་ཆའི་གཉིས་ནི་ནག་པོ་ཡིན་པས་ཁྲུང་ཁྲུང་སྐེ་ནག་ཅེས་བྱ།
ཁྲུང་ཁྲུང་སྐེ་ནག་ནི་མཚོ་ངོས་ལས་མཐོ་ཚད་སྨི་2500ནས་སྨི་5000གནས་ཀྱི་ན་ཁུག་དང་མཚེའུ། གྲམ་གཞུང་སོགས་བརླན་སའི་ཁོར་ཡུག་ཏུ་འཚོ་སྡོད་བྱེད། ཁྲུང་ཁྲུང་སྐེ་ནག་ནི་དུས་བསྟུན་གནས་སྤོའི་བྱ་རིགས་ཡིན་ཏེ་ལོ་རེའི་དཔྱིད་ཟླ་གསུམ་པའི་སྐབས་སུ་ཁྱུ་བསྒྲིགས་ནས་དགུས་ས་ཡོན་ཀོའེ་མཐོ་སྒང་ནས་མདོ་དབུས་མཐོ་སྒང་དུ་གནས་སྤོ་ཞིང་། རྩྭ་ཐང་གི་ན་ཁུག་དང་མཚེའུ་སོགས་ངལ་གསོ་བྱེད། ཟླ་བཞི་པའི་ཟླ་སྨད་ནས་སྐྱེ་འཕེལ་གྱི་འགོ་བརྩམས་ཤིང་ཟླ་བཅུ་བར་ཕྱིར་ཡོན་ཀོའེ་མཐོ་སྒང་སོགས་སུ་དགུན་སྐྱེལ་བར་འཕུར་འགྲོ། དགུན་སྐྱེལ་སྐབས་ཁྱུ་ཅུང་ཆེ་སྟེ། སྤྱིར་བཏང་དུ་བཅུ་ཕྲག་ཁ་ཤས་ནས་བརྒྱ་ཕྲག་ཁ་ཤས་མཉམ་དུ་ཡོད། སྐྱེ་འཕེལ་གནས་སུ་ཁྱིམ་རྒྱུད་མཉམ་སྡོད་བྱེད་པ་དང་། ལོ་རེའི་ཟླ་ལྔ་པའི་ཟླ་འགོ་ནས་སྐྱེ་འཕེལ་བྱེད་འགོ་རྩོམ། དུས་རྒྱུན་དུ་སྔོ་དྲོ་ནས་ཉིན་གུང་གི་དུས་ཚོད་ནང་འཁྲིག་སྦྱོར་བྱེད་ལ་ཟླ་ལྔ་པའི་ཟླ་སྨད་དུ་སྒོ་ང་གཏོང་པ་ཡིན། ཁྲུང་ཁྲུང་སྐེ་ནག་གིས་ལོ་གཅིག་ལ་སྒོ་ང་གཅིག་དང་གཉིས་ལས་མི་གཏོང་བ་དང་ཕལ་ཆེར་ཉིན་སོ་གསུམ་ནས་སོ་དྲུག་གི་ནང་དུ་སྒོ་ང་གས་ནས་བྱ་ཕྲུག་ཏུ་འགྱུར།
ཁྲུང་ཁྲུང་སྐེ་ནག་གི་ཁ་ཟས་གཙོ་བོ་ནི་རྩི་ཤིང་གི་རྩ་བ་དང་མྱུ་གུ་ཡིན་ལ་ཞོར་དུ་ལུས་མཉེན་སྲོག་ཆགས་དང་འབུ་སྲིན། སྦལ་བ་སོགས་ཀྱང་བཟའ་བར་བྱེད། དགུན་སྐྱེལ་ས་དེ་གའི་ལོ་ཏོག་སྟེ་ཞོག་ཁོག་དང་འབྲས། གྲོ་དང་ལ་ཕུག་སོགས་ཀྱང་བཟའ། ཁྲུང་ཁྲུང་སྐེ་ནག་ནི་རང་རེའི་རྒྱལ་ཁབ་ཏུ་མ་གཏོགས་མེད་པའི་ཁྲུང་ཁྲུང་གི་རིགས་ཤིག་ཡིན་པས་རྒྱུད་དཀོན་པ་དང་ཚན་རིག་ཞིབ་འཇུག་ལ་དོན་སྙིང་གལ་ཆེན་ལྡན།།
