སྤྱི་ཟླ་11པའི་ཚེས་10ཉིན། སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་ཐུམ་འབུའི་ནད་ཀྱི་ཕྱོགས་བསྡུས་འགོག་བཅོས་ཀྱི་ཚོད་ལྟ་བྱེད་གནས་འགོ་ཚུགས་པའི་ཚོགས་འདུ་ཁྲེང་ཏུའུ་ནས་འཚོགས་ཤིང་། རྒྱལ་ཁབ་འཕྲོད་བསྟེན་དང་འཆར་ལྡན་བུ་བཙའ་ཨུ་ལྷན་གྱི་ཀྲུའུ་རེན་ལི་པིན་དང་། སི་ཁྲོན་ཞིང་ཆེན་ཏང་ཨུའི་ཧྲུའུ་ཅི་གཞོན་པ་དབྱི་ལི་ཚོགས་འདུར་ཞུགས་ཏེ་གསུང་བཤད་གནང་། ཀྲུའུ་རེན་གཞོན་པ་ཧང་གོ་ཆིང་གིས་ཚོགས་འདུར་གཙོ་སྐྱོང་བྱས།
ལི་པིན་གྱིས་བསྟན་དོན། ཐུམ་འབུའི་ནད་ནི་རང་རྒྱལ་ནུབ་རྒྱུད་ཞིང་འབྲོག་ས་ཁུལ་གྱི་རིགས་སོ་སོའི་མི་དམངས་ཀྱི་བདེ་ཐང་དང་ཚེ་སྲོག་གི་བདེ་འཇགས་ལ་གནོད་པ་ཆེ་བའི་འགོས་ནད་ཚབས་ཆེན་ཞིག་ཡིན། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། དེ་མིན་རྒྱལ་ཡོངས་སྲིད་གྲོས་ཀྱིས་བོད་ཁུལ་གྱི་ཐུམ་འབུའི་ནད་ཀྱི་འགོག་བཅོས་ལས་ཀར་མཐོང་ཆེན་དང་ཐུགས་ཁུར་ཆེན་པོ་བྱེད་བཞིན་ཡོད། ཐུམ་འབུའི་ནད་ཀྱི་འགོག་བཅོས་ལས་ཀ་ཡག་པོ་བསྒྲུབ་པ་ནི་ཐུམ་འབུའི་ནད་ཁྱབ་ཆེ་བའི་ས་ཁུལ་གྱི་རིགས་སོ་སོའི་མི་དམངས་ཀྱི་བདེ་ཐང་ལ་ཁ་ཚ་དགོས་གཏུག་གི་སྲུང་སྐྱོང་བྱེད་པ་ཡིན་ཞིང་། བདེ་ཐང་ཀྲུང་གོ་འཛུགས་སྐྲུན་བྱེད་པའི་དགོས་ངེས་ཀྱི་བླང་བྱ་ཡང་ཡིན་ལ་རྒྱལ་ཡོངས་མི་དམངས་ཐུན་མོང་ཐོག་ཁྱོན་ཡོངས་ནས་འབྱོར་འབྲིང་སྤྱི་ཚོགས་སུ་སྐྱོད་པའི་བླང་བྱ་ཡང་ཡིན། ང་ཚོས་མུ་མཐུད་དུ་ཐུམ་འབུའི་ནད་ཀྱི་ཕྱོགས་བསྡུས་འགོག་བཅོས་ལས་ཀའི་འགན་འཁྲི་དང་རང་འགུལ་གྱི་ནུས་པར་ཤུགས་སྣོན་བྱས་ཏེ་གོམ་གང་མདུན་སྤོས་སྒོས་ཐུམ་འབུའི་ནད་ཀྱི་འགོག་བཅོས་ལས་ཀའི་ཚབས་ཆེན་རང་བཞིན་དང་གལ་ཆེའི་རང་བཞིན་གྱི་ངོས་འཛིན་མཐོ་རུ་གཏང་དགོས།
ལི་པིན་གྱི་ནན་གྱིས་བསྟན་དོན། 《སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་ཐུམ་འབུའི་ནད་ཀྱི་ཕྱོགས་བསྡུས་འགོག་བཅོས་ཚོད་ལྟའི་བྱེད་གནས་ལས་ཀའི་ཇུས་གཞི།》ལས་འགོག་བཅོས་ལས་ཀའི་ཡུན་རིང་དམིགས་འབེན་དང་དུས་སྐབས་ཀྱི་དམིགས་འབེན་གསལ་པོར་བསྟན་ཡོད། དམིགས་འབེན་དེ་དག་མངོན་འགྱུར་བྱུང་དགོས་ན་དུས་ཚོད་བྲེལ་ཞིང་ལས་འགན་ཤིན་ཏུ་ལྕི་བས་ཚོད་ལྟའི་བྱེད་གནས་ལས་ཀའི་འགོ་ཁྲིད་ཚོ་ཆུང་གི་གཅིག་གྱུར་གྱི་འཆར་འགོད་དང་མཐུན་སྦྱོར་ནུས་པ་གང་ལེགས་འདོན་དགོས། སི་ཁྲོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཁྱོན་ཡོངས་ནས་ཚོད་ལྟའི་བྱེད་གནས་ལས་ཀའི་འགན་བླངས་ཏེ་དཀར་མཛེས་ཁུལ་དང་སེར་ཤུལ་རྫོང་གིས་དངོས་སུ་འགན་འཁྲི་གཙོ་བོ་དང་ལེན་བྱ་ནས་འགོག་སྲུང་བྱ་ཐབས་སོ་སོ་ལག་བསྟར་བྱས་པར་བརྒྱུད་དུས་ལྟར་དམིགས་འབེན་མངོན་འགྱུར་བྱུང་བར་འགན་འཁྲི་ཁག་ཐེག་ནན་ཏན་བྱ་དགོས།
ཧྲུའུ་ཅི་གཞོན་པ་དབྱི་ལི་ཡིས་གསུང་བཤད་ཁྲོད་བསྟན་དོན། སི་ཁྲོན་ཞིང་ཆེན་གྱིས་རང་མོས་སྒོས་དམ་པ་དོན་གཉེར་བྱ་རྒྱུ་དང་སེར་ཤུལ་རྫོང་གི་ཐུམ་འབུ་ནད་ཀྱི་ཕྱོགས་བསྡུས་འགོག་བཅོས་ཀྱི་ཚོད་ལྟའི་བྱེད་གནས་ཀྱི་དོན་བཟང་དེ་བྱས་རྗེས་དེང་རབས་ལ་ཡོད་པ་དང་ཕན་པ་དུས་གཏན་དུ་ཡོད་པས་དུས་ཚོད་དང་ལམ་ཐིག་གསལ་པོར་བྱས་ནས་ཚོད་ལྟའི་བྱེད་གནས་ཀྱི་ཇུས་གཞི་དོན་འཁྱོལ་བྱུང་བར་སྐུལ་འདེད་བྱ་རྒྱུ་དང་། ལས་ཀའི་གོ་རིམ་སོ་སོའི་ཞིབ་ཕྲ་དང་ནན་ཏན་གྱིས་འཁྱོལ་བ་བྱས་ནས་ས་ཁུལ་གཞན་དག་གི་འགོག་བཅོས་ལས་ཀ་མཉམ་དུ་སྤེལ་རྒྱུ་ཡིན། དུས་མཚུངས་སུ་གསར་གཏོད་ལག་ལེན་གཙོ་བོར་བཟུང་སྟེ་ཀྲུང་དབྱང་པུའུ་ཨུའི་མཛུབ་སྟོན་དང་རྒྱབ་སྐྱོར་འོག་གཅིག་བསྡུས་འགོག་སྲུང་གི་ཐབས་ལམ་གསར་པ་བརྒྱུད་ནས་2017ལོར་སླེབས་པ་ན་ཐུམ་འབུའི་ནད་ཀྱི་ཁྱབ་ཚད་ནུས་ལྡན་སྒོས་འགོག་ཐུབ་པའི་དུས་སྐབས་ཀྱི་དམིགས་འབེན་མངོན་འགྱུར་བྱུང་བར་ཧུར་བརྩོན་བྱ་སྟེ་2020ལོར་སླེབས་སྐབས་ཐུམ་འབུའི་ནད་ཀྱི་ཁྱབ་ཚད་ནུས་ལྡན་སྒོས་སྔོན་འགོག་བྱ་ཐུབ་དགོས།
སི་ཁྲོན་ཞིང་ཆེན་དང་དཀར་མཛེས་ཁུལ། སེར་ཤུལ་རྫོང་ཏང་ཨུའི་སྲིད་གཞུང་དང་འབྲེལ་ཡོད་སྡེ་ཁག་གི་འགན་ཁུར་བློ་མཐུན། ཏང་ཨུའི་ལས་ཁུངས་ཀྱི་འབྲེལ་ཡོད་སི་དང་ཅུས། ཀྲུང་གོའི་ནད་འགོག་ལྟེ་གནས་ཀྱི་འགན་ཁུར་བློ་མཐུན་བཅས་ཚོགས་ཞུགས་བྱས། རྒྱལ་ཡོངས་སྲིད་གྲོས་ཀྱི་སློབ་གསོ་ཚན་རྩལ་རིག་གནས་འཕྲོད་བསྟེན་ཨུ་ལྷན་དང་ཀྲུང་དབྱང་འཐབ་ཕྱོགས་གཅིག་གྱུར་པུའུ་སོགས་འབྲེལ་ཡོད་སྡེ་ཁག་གི་འགན་ཁུར་བློ་མཐུན་གདན་ཞུ་ལྟར་གྲོས་ཚོགས་སུ་ཞུགས།།
