མཐོ་སྒང་ཤར་རིའི་རྩེ་མོར་གསེར་ཞུན་གྱིས།
མདངས་ལ་འཁུ་བའི་རྟ་བདུན་དབང་པོའི་གཟི། །
ལེགས་བྱས་དགེ་མཚན་འབུམ་གྱིས་འཁྱུད་པ་ཡིས། །
གངས་ལྗོངས་ཉི་གཞོན་གསར་པའི་འོད་ལམ་ནས། །
དྲི་མེད་རབ་དགའི་ཁ་བཏགས་དཀར་པོའི་ངོར། །
བདེ་ལེགས་ཚིག་གི་བཀྲ་ཤིས་རེ་ཁ་ལ། །
ལུགས་ཟུང་བླང་དོར་འབྱེད་པའི་རི་མོ་དང་། །
ཕན་བདེའི་ལྕགས་རིའི་འཁོར་ཡུག་ཀུན་ནས་བསྐོར། །
དེང་རབས་རིག་གནས་འཚོ་བཅུད་གསོས་འདེབས་སུ། །
སྲོལ་རྒྱུན་སྦྲང་རྩིའི་སྦྱར་བའི་བྲོ་བ་ཡིས། །
ལེགས་ཉེས་བླང་དོར་འབྱེད་པའི་མིག་སྦྱིན་པའི། །
རིག་གནས་ཚེ་སྲོག་བསྲིང་པའི་གསོས་སྨན་ལགས། །
རྣམ་དག་གངས་རིའི་ཕྲེང་བས་ཡོངས་སྐོར་བའི། །
རྣམ་མང་གཙུག་ལག་བཞད་པའི་དགལ་ཚལ་ནས། །
རྣམ་རིག་བསུང་ཞིམ་ཐུལ་བའི་ཁང་བཟང་དུ། །
རྣམ་དཀར་ཁ་བཏགས་དཀར་པོ་སྐྱེས་སུ་འབུལ། །
འཇིག་རྟེན་སྲིད་པའི་སྒྲོན་མེ་འདི་ལགས་ཏེ། །
དགོས་འདོད་ཀུན་འབྱུང་ཡིད་བཞིནནོར་བུའང་འདི། །
འདི་ཕྱི་གཏན་བདེའི་རིག་པའི་རྩ་ལགས་ཀྱིས། །
ཤེས་བྱའི་དཀྱིལ་འཁོར་རྫོགས་པའི་གནས་ཆེན་ཡིན། །
ལུང་རིགས་སྨྲ་བའི་མེ་ལྕེ་གྱེན་ཕྱུར་ཏེ། །
སྙན་ངག་མཁས་པའི་ཚིག་རྒྱན་རང་བྱུང་བརྡོལ། །
ཆོས་སྲིད་ཟུང་གི་ལམ་བཟང་སྣང་བའི་དཔལ། །
སྲིད་པའི་སྒྲོན་མེ་ཆེན་མོ་འདི་ཡིན་ནོ། །
