སྤྱི་ཟླ་12པའི་ཚེས་16ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གི་ཚེས་ཀྲེ་ཅང་ཞིང་ཆེན་གྱི་ཝུའུ་ཀྲིན་དུ་ཕ་ཀི་སི་ཐན་གྱི་སྲིད་འཛིན་ཧིག་སེ་དབྱིན་དང་མཇལ་འཕྲད་གནང་།

　　ཞི་ཅིན་ཕིང་གིས་ད་ལོའི་ཚུན་ལ་ཀྲུང་གོ་དང་ཕ་ཀི་སི་ཐན་རྒྱལ་ཁབ་གཉིས་ཀྱི་མཐོ་རིམ་དབུ་ཁྲིད་པའི་འགྲོ་འོང་སྔར་ལས་གཏིང་ཟབ་ཏུ་ཕྱིན་པ་དང་ཁྱབ་ཁོངས་སོ་སོའི་དངོས་དོན་མཉམ་འབྲེལ་རྒྱུན་མཐུད་སྒོས་འཕེལ་རྒྱས་སུ་སོང་། ད་ལོའི་ཟླ་4བར་བདག་གིས་ཕ་ཀི་སི་ཐན་ལ་རྒྱལ་དོན་འཚམས་འདྲི་བྱས་ཏེ་ཕྱོགས་གཉིས་ཀྱིས་ཀྲུང་གོ་དང་ཕ་ཀི་སི་ཐན་འབྲེལ་བ་དེ་ཕྱོགས་ཡོངས་མཉམ་ལས་མཛའ་འབྲེལ་འཕར་བར་ཐག་བཅད། དཔལ་འབྱོར་བར་ཁྱམས་གཙོ་གནད་དུ་བཟུང་སྟེ་ནུས་ཁུངས་དང་འགྲིམ་འགྲུལ་རྨང་གཞིའི་སྒྲིག་བཀོད། དེ་མིན་ཐོན་ལས་མཉམ་འབྲེལ་བཅས་ཀྱིས་ཀྲུང་གོ་དང་ཕ་ཀི་སི་ཐན་གཉིས་ཀྱི་རྗེས་ཕྱོགས་ཀྱི་འཕེལ་རྒྱས་ལ་འཐབ་ཇུས་གསར་པ་བཟོས། ང་ཚོས་ཕ་ཀི་སི་ཐན་ཕྱོགས་དང་མཉམ་དུ་འབད་པ་ཆེན་པོས་ཀྲུང་གོ་དང་ཕ་ཀི་སི་ཐན་བར་གྱི་ཕྱོགས་ཡོངས་འཐབ་ཇུས་མཉམ་འབྲེལ་གྱི་ནང་དོན་ཕུན་སུམ་ཚོགས་པར་གཏང་བ་དང་། ཀྲུང་གོ་དང་ཕ་ཀི་སི་ཐན་བར་གྱི་མཛའ་མཐུན་འབྲེལ་བ་དེ་དངོས་དོན་མཉམ་འབྲེལ་རྒྱ་བསྐྱེད་པའི་སྒུལ་ཤུགས་སུ་བསྒྱུར་འདོད་ཅེས་བསྟན།

　　ཧིག་སེ་དབྱིན་གྱིས་ཀྲུང་གོ་ཕྱོགས་ནས་ཕ་ཀི་སི་ཐན་གྱི་དཔལ་འབྱོར་འཕེལ་རྒྱས་དང་དམངས་འཚོ་ལེགས་བཅོས་ཐད་ལ་རྒྱབ་སྐྱོར་གནང་བར་བཀའ་དྲིན་ཞུས་པ་དང་ཕྱོགས་གཉིས་ཀྱིས་བཟོ་ཚོང་དང་རྨང་གཞིའི་སྒྲིག་བཀོད། བདེ་འཇགས་སོགས་ཁྱབ་ཁོངས་ཀྱི་མཉམ་འབྲེལ་བརྟན་བརླིང་ངང་འཕེལ་རྒྱས་སུ་གཏང་དགོས། ཕ་ཀི་སི་ཐན་ཕྱོགས་ནས་ཀྲུང་གོ་ཕྱོགས་དང་མཉམ་དུ་ཁྱབ་ཁོངས་སོ་སོའི་མཉམ་ལས་རྒྱ་བསྐྱེད་པ་དང་རྒྱལ་སྤྱི་དང་ས་གནས་ཀྱི་ལས་དོན་ཁྲོད་དུ་འབྲེལ་འདྲིས་དང་མཐུན་སྦྱོར་དམ་པོ་བྱ་འདོད་ཅེས་བསྟན།།