2015ལོའི་སྤྱི་ཟླ་12པའི་ཚེས་29ཉིན་ནས་ཚེས་30ཉིན་བར། དཀར་མཛེས་ཁུལ་རིག་གནས་ཁང་དང་སེར་ཤུལ་རྫོང་བྱང་སྡེ་ཉི་མའི་སྒྱུ་རྩལ་ཚོགས་པ་གཉིས་ཀྱིས་སེར་ཤུལ་རྫོང་དབོན་པོ་ཡུལ་ཤོག་དང་ཨ་རིགས་རྫ་ཡུལ་ཤོག གསེར་ཤུལ་གྲོང་རྡལ། ནུབ་ཁུལ་གྱི་ལས་དོན་ཨུ་ལྷན་ཡོད་ས་བཅས་ནས་ལོ་གསར་གྱི་རིག་གནས་གཤམ་སྤེལ་གྱི་འཚམས་འདྲིའི་བྱེད་སྒོ་སྤེལ། 

     འཁྲབ་སྟོན་པ་40ལྷག་གིས་གྲང་ངར་ལ་མ་འཛེམ་པར་ཐག་རིང་ལུང་གི་ཞིང་འབྲོག་ཁུལ་གྱི་ཞིང་འབྲོག་མང་ཚོགས་ཚོར་ལོ་གསར་གྱི་སྨོན་འདུན་འབུལ་བ་དང་འཚམས་འདྲི་གནང་། ཐེངས་འདིའི་རིག་གནས་གཤམ་སྤེལ་གྱི་བྱེད་སྒོར་རྣམ་པ་ཕུན་སུམ་ཚོགས་པའི་འཁྲབ་སྟོན་བྱས་ཤིང་། གཙོ་བོ་གཞི་རིམ་མང་ཚོགས་ཀྱི་ལྟ་འདོད་ཅིང་ཉན་སྤྲོ་བ། འཚོ་བ་དང་ཐག་ཉེ་བའི་གླུ་གར་ལེ་ཚན་50ལྷག་ཞིག་བཀོད་སྒྲིག་བྱས་ཡོད། ལེ་ཚན་བཀོད་སྒྲིག་བྱས་པ་ལུགས་མཐུན་ཡིན་པ་དང་ཁྱོན་བསྡོམས་འཁྲབ་སྟོན་ཐེངས་4ལ་བྱས་ཡོད་ལ། སེར་ཤུལ་རྫོང་གི་ཡུལ་ཤོག་2ཀྱི་ཡུལ་ཤོག་དང་གྲོང་རྡལ་7། སྲིད་འཛིན་ཡུལ་ཚོ་12ལ་ཁྱབ་ཅིང་། རིག་རྩལ་འཁྲབ་སྟོན་ལ་ལྟ་མཁན་ཞིང་འབྲོག་མང་ཚོགས་1200ལྷག་ཞུགས། ཆེད་ལས་དང་མཛེས་སྡུག་ཡིད་འོང་གི་གར་སྟེགས་མེད་ཀྱང་། གྲང་ངར་ལ་མ་འཛེམ་པའི་ལྟད་མོ་བ་རྣམས་ཀྱི་གདོང་ལ་འཛུམ་མདངས་ཀྱིས་ཁེངས་པ་དང་ཐལ་མོའི་རྡེབ་སྒྲ་ཟམ་མི་ཆད་པར་གྲགས་ཡོང་།
      ཐེངས་འདིའི་གཤམ་སྤེལ་བྱེད་སྒོ་ནི་དཀར་མཛེས་ཁུལ་རིག་གནས་ཁང་དང་སེར་ཤུལ་རྫོང་བྱང་སྡེ་ཉི་མའི་སྒྱུ་རྩལ་ཚོགས་པས་ཐེངས་གཉིས་པར་མཉམ་ལས་བྱས་ཏེ་རིག་གནས་གཤམ་སྤེལ་གྱི་བྱེད་སྒོ་སྤེལ་པ་ཡིན་ལ། དཀར་མཛེས་ཁུལ་རིག་གནས་ཁང་གིས་གཞི་རིམ་གྱི་རིག་རྩལ་ཚོགས་པར་བརྟེན་ནས་རིག་གནས་དམངས་ཕན་གྱི་ཁྱབ་རྒྱ་བསྐྱེད་པའི་བྱེད་ཐབས་གལ་ཆེན་ཞིག་ཀྱང་རེད།།