སྤྱི་ཟླ་1པའི་ཚེས་16ཉིན། ཀྲུང་གོ་དང་བྷེ་ལ་རུ་སི་གཉིས་ཀྱིས་མཉམ་འབྲེལ་བྱས་པའི་བྷེ་ལ་རུ་སི་འཕྲིན་གཏོང་འཁོར་སྐར་དང་པོ་ཚེས་16ཉིན་ཞི་ཁྲེང་ནས་རྒྱལ་ཁའི་ངང་ཤར་གཏོང་བྱས་ཤིང་ཉིན་དེར་ཀྲུའུ་ཞི་ཞི་ཅིན་ཕིང་དང་སྲིད་འཛིན་ལོའོ་ཁཱ་ཧྲིན་ཁི་གཉིས་ཀྱིས་ཁ་པར་གྱི་ལམ་ནས་ཕན་ཚུན་ལ་རྟེན་འབྲེལ་ཞུས།
ཞི་ཅིན་ཕིང་གིས་རྟེན་འབྲེལ་ཞུ་བའི་གློག་འཕྲིན་ནང་བྷེ་ལ་རུ་སི་ཡི་འཕྲིན་གཏོང་འཁོར་སྐར་དང་པོའི་ལས་གཞི་ནི་རྣམ་པ་གསར་པའི་འོག་གི་ཀྲུང་གོ་དང་བྷེ་ལ་རུ་སི་གཉིས་ཀྱི་ཕྱོགས་ཡོངས་འཐབ་ཇུས་མཉམ་འབྲེལ་གྱི་གལ་ཆེའི་མཚོན་བྱེད་ཅིག་ཡིན་པར་མ་ཟད། ཀྲུང་གོ་དང་བྷེ་ལ་རུ་སི་གཉིས་ཀྱི་མཁའ་སྤྱོད་མཉམ་འབྲེལ་ཁྲོད་ཀྱི་གྲུབ་འབྲས་གལ་ཆེན་ཞིག་ཀྱང་རེད། འདིས་བྷེ་ལ་རུ་སི་ཡི་དཔལ་འབྱོར་འཕེལ་རྒྱས་དང་དམངས་འཚོ་ལེགས་བཅོས། སྤྱི་ཚོགས་འཕེལ་རྒྱས་ལ་ཕན་ནུས་གལ་ཆེན་ལྡན་ངེས། ཀྲུང་གོ་ཕྱོགས་ནས་བྷེ་ལ་རུ་སི་དང་མཉམ་དུ་འབད་པ་ཆེན་པོའི་ཁྱབ་ཁོངས་སོ་སོའི་མཉམ་འབྲེལ་ལ་ཤུགས་སྣོན་དང་ཀྲུང་གོ་དང་བྷེ་ལ་རུ་སི་ཡི་ཕྱོགས་ཡོངས་འཐབ་ཇུས་འབྲེལ་བ་རྒྱུན་ཆད་མེད་པར་གོང་འཕེལ་དུ་འགྲོ་བར་སྐུལ་འདེད་གཏང་སྟེ་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་འདོད་ཅེས་བསྟན།།
ལོའོ་ཁཱ་ཧྲིན་ཁི་ཡིས་རྟེན་འབྲེལ་ཞུ་བའི་གློག་འཕྲིན་ནང་བྷེ་ལ་རུ་སི་ཡི་འཕྲིན་གཏོང་འཁོར་སྐར་དང་པོ་ཤར་གཏོང་བྱས་པ་ནི་དུས་ཡུན་རིང་བའི་བྷེ་ལ་རུ་སི་དང་ཀྲུང་གོའི་ཕྱོགས་ཡོངས་འཐབ་ཇུས་འབྲེལ་བའི་ཚབ་མཚོན་རང་བཞིན་གྱི་ལས་དོན་ཞིག་དང་གལ་ཆེ་བའི་གྲུབ་འབྲས་ཤིག་རེད། འདི་ལས་ཀྲུང་གོས་མཁའ་སྤྱོད་ཚན་རྩལ་ཁྱབ་ཁོངས་ཁྲོད་གྲུབ་འབྲས་ཆེན་པོ་བླངས་པ་མཚོན་ཐུབ་ལ། ཆབ་སྲིད་དང་དཔལ་འབྱོར། སྤྱི་ཚོགས་དང་གསར་གཏོད་ཁྱབ་ཁོངས་ཐད་ནས་བྷེ་ལ་རུ་སི་ཕྱོགས་ལ་དོན་སྙིང་ཆེན་པོ་ལྡན། ཀྲུང་གོའི་མཁའ་སྤྱོད་ཚན་རྩལ་དང་འཕྲིན་གཏོང་ཁྱབ་ཁོངས་ཀྱི་ལས་བྱེད་པས་མིའི་རིགས་ལ་བདེ་སྐྱིད་བསྐྲུན་པའི་རླངས་ཆེན་གྱི་ལས་དོན་ཁྲོད་གཡུར་དུ་ཟ་བའི་འབྲས་བུ་ལོན་པར་རྟེན་འབྲེལ་ཞུ་ཞེས་བསྟན།།
