ནང་དོན་གནད་བསྡུས། སློབ་གསོ་ནི་རྒྱལ་ཁབ་འཕེལ་རྒྱས་ཀྱི་སྲོག་ཤིང་ལྟ་བུ་ཡིན་ལ། སློབ་གསོའི་ཐབས་ཇུས་ནི་དེ་བས་ཀྱང་གལ་ཆེ་བ་ཡིན། རང་རྒྱལ་གྲངས་ཉུང་མི་རིགས་ཀྱི་སློབ་གསོའི་འཕེལ་རྒྱས་ནི་རྒྱལ་ནང་སློབ་གསོའི་གྲུབ་ཆ་གལ་ཆེན་ཞིག་ཡིན་པས། སྐད་གཉིས་སློབ་གསོའི་ཐབས་ལམ་བརྒྱུད་ནས་དེ་གོང་འཕེལ་དུ་གཏོང་རྒྱུ་ནི་སློབ་གསོའི་ཁ་ཕྱོགས་གཙོ་གནད་ཅིག་ཡིན་པ་དོན་དངོས་ཀྱི་སྣང་ཚུལ་གང་རུང་ནས་བདེན་དཔང་བྱས་ཡོད།
བརྡ་ཆད་གཙོ་བོ། སྐད་གཉིས་སློབ་གསོ། མི་རིགས་ས་ཁུལ། སློབ་གསོའི་སྤུས་ཚད།
གླེང་སློང་།
སློབ་གསོ་ནི་དེང་རབས་ཅན་ལ་ཁ་ཕྱོགས་པ་དང་འཛམ་གླིང་ལ་ཁ་ཕྱོགས་པ། འབྱུང་འགྱུར་ལ་ཁ་ཕྱོགས་པ་བཅས་ཡིན་དགོས་པ་མ་ཟད། ཡོངས་ཁྱབ་རང་བཞིན་ལྡན་པ་ཞིག་ཅི་ནས་ཀྱང་ཡིན་དགོས་འདུག གྲངས་ཉུང་མི་རིགས་ཀྱི་སློབ་གསོའི་ལམ་ལུགས་ཐད། ངེས་པར་མཁོ་བ་ནི་སྐད་གཉིས་སློབ་ཁྲིད་ཀྱི་སློབ་གསོ་ཡིན་ལ། ང་ཚོས་དེའི་དགེ་མཚན་ངོས་ཟིན་ཏེ་ལག་ལེན་དུ་བསྟར་རྒྱུ་ནི་ཁ་ཚ་དགོས་གཏུགས་ཀྱི་བྱ་བ་ཞིག་གོ། །
གཅིག སྐད་གཉིས་སློབ་ཁྲིད་ཀྱི་གལ་ཆེན་རང་བཞིན།
སྤྱིར་སྐད་ཡིག་ནི་འབྲེལ་འདྲིས་བྱེད་པའི་ཡོ་བྱད་ཡིན་པ་དང་། མིའི་བརྩེ་དུང་མཚོན་བྱེད་ཀྱི་མེ་ལོང་ལྟ་བུ་ཡིན་པས། མི་རིགས་གང་དང་གང་ཞིག་ལའང་མེད་དུ་མི་རུང་བའི་ཡོ་བྱད་ལྟ་བུ་རེད། མདོར་ན། བསམ་བློའི་འཁྱེར་སོ་དང་། འདུ་ཤེས། དགའ་སྐྱོ་ཆགས་སྡང་བཅས་ཇི་མ་ཇི་བཞིན་མངོན་པར་བྱེད་ན། ཐབས་དམ་པ་ཞིག་ནི་རང་ལ་བྱང་ཆ་ཡོད་པའི་སྐད་དང་ཡིག་རིགས་བཀོལ་སྤྱོད་བྱ་རྒྱུ་དེ་ཡིན།
མི་རིགས་ཡོངས་ཀྱི་གོ་རྟོགས་ཇེ་མཐོར་གཏོང་བ། མང་ཚོགས་སྐུལ་སློང་བཅས་བྱས་ནས་མེས་རྒྱལ་གྱི་འཛུགས་སྐྲུན་ལས་དོན་སྣ་ཚོགས་ནང་ཧུར་ཐག་གིས་ཞུགས་པའི་ཕན་ནུས་ལྡན་པའི་ཡོ་བྱད་གལ་ཆེ་བ་ཞིག་རེད། དེར་བརྟེན་ཁོ་བོས་བལྟས་ན། ད་རེ་ནི་སྐད་གཉིས་སློབ་ཁྲིད་ཀྱི་བྱ་བར་ཤུགས་སྣོན་གང་ལེགས་བྱས་ཏེ་ཕྱོགས་ཡོངས་ནས་སམ་མི་རིགས་སོ་སོ་མཉམ་དུ་གོང་འཕེལ་དུ་གཏོང་བའི་དུས་སྐབས་གལ་ཆེན་ཞིག་ཡིན།
གཉིས། དགེ་རྒན་གྱི་དཔུང་སྡེ་འཛུགས་སྐྲུན།
རང་རེའི་བོད་ཁུལ་ལ་མཚོན་ནས་བཤད་ན། བོད་ཀྱི་སྐད་དང་ཡི་གེ་ཟོལ་མེད་ཀྱིས་བཀོལ་སྤྱོད་བྱེད་བཞིན་པའི་ས་ཁུལ་དུ་སློབ་མ་རྣམས་ཀྱི་རིག་གནས་ཆུ་ཚད་མཐོར་འདེགས་བྱུང་བ་ཅུང་མགྱོགས་ཤིང་། ཚན་རིག་ལག་རྩལ་གྱི་ཤེས་བྱ་བསླབ་པའང་ཅུང་ཟད་ཡག་པོ་འདུག དེ་ལས་ལྡོག་སྟེ་དགེ་རྒན་གྱིས་བོད་སྐད་མི་ཤེས་ཤིང་སློབ་མ་ནི་རོང་འབྲོག་པའི་བུ་ཕྲུག་ཡིན་པས་རྒྱ་ཡིག་རྒྱ་སྐད་ཀྱི་ཆུ་ཚད་ཞན་པས། དགེ་རྒན་གྱིས་བློ་སེམས་རྣམ་དག་སྒོས་རྒྱ་སྐད་ཚིག་གཅིག་མི་ཤེས་པའི་སློབ་མ་ལ་རྒྱ་ཡིག་ཁྲིད་ན་ཡར་རྒྱས་མེད་ལ། དེ་ནི་དགེ་རྒན་གྱི་སློབ་ཁྲིད་བྱེད་ཐབས་མ་ལེགས་པ་མིན་ལ་བོད་རིགས་བྱིས་པར་སྐྱེ་ཐོབ་ཀྱི་བླུན་རྨོངས་ཡིན་པས་ཀྱང་མ་རེད། སྤྱིར་བཏང་དུ་བཤད་ན། སློབ་མ་དེའི་གོ་བརྡ་འཕྲོད་པའི་སྐད་རིགས་མ་བཀོལ་བའི་རྐྱེན་གྱིས་རེད། དེ་ལྟར་བྱས་པའི་མཇུག་འབྲས་ནི་རྒྱལ་ཁབ་ཀྱི་མི་ཤུགས་དང་དངོས་ཤུགས་འཕྲོ་བརླག་ཏུ་བཏང་བ་ཙམ་མ་གཏོགས་འབྲས་བཟང་ཞིག་ཐོབ་པར་མི་འགྱུར་རོ།
གསུམ། སྐད་གཉིས་སློབ་གསོའི་ནུས་པའམ་དོན་སྙིང་།
སྐད་གཉིས་སློབ་ཁྲིད་བྱས་པ་བརྒྱུད་སློབ་མར་ཐུན་མོང་ལ་འགན་ཁུར་བའི་བསམ་པ་དང་གཟི་བརྗིད་ཀྱི་འདུ་ཤེས་ཡོད་པ། སློབ་གྲོགས་ཕན་ཚུན་གྱི་མཛའ་བཤེས་གོང་འཕེལ་དང་མཐུན་སྒྲིལ་སྲ་བརྟན་ཡོང་བར་སྐུལ་མ་གཏོང་བའི་ཁྲིད་གཞི་ལས་ལྷག་པར་རྒྱལ་གཅེས་རིང་ལུགས་ཀྱི་ཁྲིད་ཚན་ཡོད་ལ། དེས་སྤྱི་ཚོགས་རིང་ལུགས་ཀྱི་མེས་རྒྱལ་དང་སྤྱི་ཚོགས་རིང་ལུགས་ལས་དོན་ལ་དགའ་བ། རྒྱལ་ཁབ་སྟོབས་ལྡན་དང་མི་དམངས་ཕྱུག་བསྒྱུར་གྱི་ཆེད་དུ་དཀའ་སྤྱད་འབད་བརྩོན་བྱེད་པའི་བསམ་བློ་དེ་བཞིན་སྤྱི་ཚོགས་རིང་ལུགས་ལས་དོན་གྱི་འཛུགས་སྐྲུན་མཁན་དང་རྗེས་འཛིན་པ་སོགས་སུ་འགྱུར་བར་བསྐུལ་མ་ཡང་དག་བཏང་ཡོད་པས་སོ།།
རང་རྒྱལ་གྱི་རིགས་སོ་སོའི་མི་དམངས་ནི་གཅིག་མཚུངས་མ་ཡིན་པའི་སྤྱི་ཚོགས་འཕེལ་རྒྱས་ཀྱི་དུས་རིམ་ནས་མཉམ་གཅིག་ཏུ་སྤྱི་ཚོགས་རིང་ལུགས་ཀྱི་སྤྱི་ཚོགས་སུ་ཞུགས་ཏེ།ཆབ་སྲིད་དང་དཔལ་འབྱོར། རིག་གནས།དེ་མིན་རྒྱུན་ལྡན་གྱི་འཚོ་བ་བཅས་ཕྱོགས་གང་ཐད་ནས་འཕོ་འགྱུར་ཆེན་པོ་བྱུང་ཡོད་པ་དང་། ལོ་རྒྱུས་ཀྱི་ཆ་རྐྱེན་འདི་འདྲའི་འོག་ཏུ་རྒྱའི་སྐད་ཡིག་ཀྱང་ལེགས་པར་སྦྱང་དགོས་པ་བསྟན་ཡོད། རྒྱའི་སྐད་དང་ཡི་གེ་ནི་རང་རྒྱལ་མི་གྲངས་ཀྱི་བརྒྱ་ཆའི་དགུ་བཅུ་ཡན་ཆད་ཀྱིས་བཀོལ་སྤྱོད་བྱེད་བཞིན་ཡོད་ཅིང་། དེ་ལ་ལོ་ངོ་སྟོང་ཕྲག་མང་པོའི་ལོ་རྒྱུས་ཡོད་པར་མ་ཟད་རང་རྒྱལ་གྱི་སྤྱི་ཡིག་ཀྱང་ཡིན་པས་ང་ཚོས་དེ་ལ་སློབ་སྦྱོང་ལེགས་པོ་བྱས་ན་རང་མི་རིགས་ལ་སྔར་ལས་ལྷག་པའི་ཕན་ནུས་ཆེན་པོ་ཡོད། གནས་ཚུལ་དེ་ཉིན་རྒྱུན་གྱི་འཚོ་བའི་ནང་མཚོན་བཞིན་ཡོད་པར་མ་ཟད།ཐོན་སྐྱེད་བྱ་འགུལ་དང་ཚན་རིག་རིག་གནས་སློབ་གསོ་འཕེལ་རྒྱས་སུ་གཏོང་བའི་ཕྱོགས་ནས་ཀྱང་མཚོན་ཐུབ། དེའི་ཕྱིར་ཕྱིན་ཆད་ཀྱི་ལོ་རྒྱུས་དུས་ཡུན་ཧ་ཅང་རིང་བོ་ཞིག་གི་ནང་དུ་མི་རིགས་ཀྱི་སྐད་ཡིག་སྔར་ལས་ལྷག་པའི་སྒོ་ནས་བཀོལ་སྤྱོད་བྱེད་པར་མ་ཟད། ཡར་རྒྱས་གོང་འཕེལ་དུ་འགྲོ་ངེས་ཡིན་པ་ནི་ལྡོག་ཏུ་མེད་པའི་ལོ་རྒྱུས་ཀྱི་ཆོས་ཉིད་ཅིག་ཡིན་པས་སོ།།
མདོར་ན། དེང་རབས་བོད་ཀྱི་སྲིད་འབྱོར་རིག་གསུམ་སོགས་ཡར་རྒྱས་གོང་འཕེལ་གཏོང་བ་ལ་བོད་རང་གི་སྐད་ཡིག་ལ་བརྟེན་དགོས་པ་ཡིན་མོད། འོན་ཀྱང་མི་རིགས་གཞན་པ་དང་ཡང་ན་ཕྱིའི་རྒྱལ་ཁབ་ཀྱི་སྐད་ཡིག་དག་བསླབ་མི་དགོས་ཞེས་པ་གཏན་ནས་མིན་ཏེ། མི་རིགས་ཤིག་ཡར་རྒྱས་གོང་འཕེལ་དུ་འགྲོ་བ་ལ་རང་མི་རིགས་ཀྱི་སྐད་ཡིག་ཁོ་ན་ལ་བརྟེན་པ་ཙམ་གྱིས་མི་ཆོག་པར་སྔོན་ཐོན་མི་རིགས་རྣམས་ཀྱི་སྐད་དང་ཡི་གེ་སོགས་གང་ལ་གང་མཁོ་བརྟེན་དགོས་པ་ནི་འདས་དང་ད་ལྟའི་འཛམ་གླིང་གི་འཕེལ་འགྱུར་ལ་བལྟས་ན་ཤེས་ཐུབ། དེ་བཞིན་དེང་རབས་ཅན་གྱི་སྤྱི་ཚོགས་འཛུགས་སྐྲུན་བྱེད་པ་ལ་གཙོ་བོ་བོད་རང་གི་སྐད་དང་ཡི་གེ་གཉིས་ལ་བརྟེན་དགོས་ཤིང་། གཞན་ཡང་རྒྱ་ཡིག་དང་ད་དུང་ཆ་རྐྱེན་ཡོད་ན་ཕྱི་རྒྱལ་གྱི་ཡིག་རིགས་ཀྱང་བསླབས་ན་ལེགས། ཕྱི་ཕྱོགས་ལ་སྒོ་ཕྱེས་པ་དང་ཆབས་ཅིག་རྒྱལ་སྤྱིའི་བར་གྱི་འབྲེལ་བ་དང་། ས་གནས་བར་དང་། ཚན་རིག་ལག་རྩལ་གྱི་བརྗེ་རེས་ཀྱང་ཉིན་རེ་བཞིན་ཇེ་མང་དུ་འགྲོ་བཞིན་ཡོད་ལ། ང་ཚོས་གཞན་གྱི་སྐད་ཡིག་སློབ་པའི་དགོས་པ་ནི་རང་གི་སྐད་ཡིག་བྱང་ཆུབ་པའི་རྨང་གཞིའི་སྟེང་མི་རིགས་གཞན་ལ་ཡོད་པའི་ཚན་རིག་གི་ཤེས་བྱ་སོགས་རང་ཡིག་ཏུ་བསྒྱུར་ཏེ་མི་མང་ཆེ་བས་ལས་སླ་བོར་གོ་རྒྱུ་དང་། ལེགས་ཆ་སྡུད་ལེན་ལས་གཞན་གྱི་སྐད་ཡིག་ཁོ་ནའི་སྟེང་མདུན་ལམ་འཚོལ་རྒྱུ་དང་རང་རིགས་ཀྱི་སྐད་ཡིག་ཉམས་རྒུད་དུ་གཏོང་རྒྱུ་གཏན་ནས་མ་ཡིན་ཚུལ་གསུངས་པ་ལྟར་དང་།ཁྱད་པར་དུ་བོད་རིགས་གཞོན་ནུ་ཚོས་བརྩོན་པ་ཆེར་བསྐྱེད་ཀྱིས་བོད་ཡིག་སློབ་དགོས་པར་མ་ཟད། མི་རིགས་གཞན་དག་གི་སྐད་ཡིག་མཐར་ཕྱིན་པ་སློབ་དགོས་ངེས་ཡིན།དེའང་མི་རིགས་གཞན་གྱི་སྐད་ཡིག་སློབ་དགོས་པ་ནི་ཤེས་རྒྱ་ཆེ་རུ་གཏོང་བ་དང་བོད་ཀྱི་སྐད་ཡིག་ཕུན་སུམ་ཇེ་ཚོགས་སུ་གཏོང་བ་ནི་རྩ་བའི་རྩ་དོན་ཡིན་པས་ཐུགས་ལ་ངེས་གལ་ཆེ་ཞིང་། རང་གི་སྐད་ཡིག་མ་ཤོར་བའི་སྟེང་ནས་གཞན་གྱི་སྐད་ཡིག་སྦྱང་རྒྱུའང་ཤིན་ཏུ་གལ་ཆེ་སྟེ། བརྡ་མ་འཕྲོད་ན་གཞན་དང་འབྲེལ་བ་བྱེད་པའི་ཐབས་མེད། སུ་དང་ཡང་འབྲེལ་འདྲིས་མེད་པར་ལུང་ཀྱོག་གཅིག་པུར་གནས་ན་ཤེས་རིག་དང་དཔལ་འབྱོར་གང་ལའང་ཡར་རྒྱས་འོང་དཀའ་བ་ཡིན་ཚུལ་གསུངས་པ་སོགས་ཀྱི་གནད་རྣམས་ངོས་པར་བྱའོ།།
