ཉེ་ལམ།  ཞིང་ཆེན་ཏང་ཨུས་རྒྱུན་ལས་ཨུ་ལྷན་གྱི་ཚོགས་འདུ་འཚོགས་ཤིང་། ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་དང་ཀྲུང་དབྱང་ཧྲུའུ་ཅི་ཁྲུའུ་ཡི་ཧྲུའུ་ཅི་བློ་མཐུན་ལིའུ་ཡུན་ཧྲན་སི་ཁྲོན་དུ་རྟོག་ཞིབ་གནང་སྐབས་དབུལ་གྲོལ་འགག་སྒྲོལ་གྱི་བཞུགས་མོལ་ཚོགས་འདུའི་དགོངས་དོན་སློབ་སྦྱོང་དང་བརྒྱུད་བསྒྲགས་བྱས་པ་མ་ཟད་གསུང་བཤད་ཀྱི་དགོངས་དོན་ལག་བསྟར་དོན་འཁྱོལ་བྱེད་པའི་བསམ་འཆར་ལ་ཞིབ་འཇུག་བྱས། ཞིང་ཆེན་ཏང་ཨུའི་ཧྲུའུ་ཅི་ཝང་ཏུང་མིང་གིས་ཚོགས་འདུར་གཙོ་སྐྱོང་གནང་། 　　
    ཚོགས་འདུའི་སྟེང་བསྟན་དོན། བློ་མཐུན་ལིའུ་ཡུན་ཧྲན་ཐེངས་འདིར་སི་ཁྲོན་དུ་དབུལ་སྒྲོལ་འགག་སྒྲོལ་དང་གནོད་འཚེ་རྗེས་ཀྱི་སླར་གསོ་བསྐྱར་སྐྲུན། ཏང་འཛུགས་དང་རྩ་འཛུགས་ལས་ཀ་ལ་རྟོག་ཞིབ་མཛུབ་ཁྲིད་གནང་པ་ལས། ཏང་ཀྲུང་དབྱང་གིས་ས་ཡོམ་གེགས་ཁུལ་དང་དབུལ་ཕོངས་ས་ཁུལ་གྱི་རྒྱ་ཆེའི་ལས་བྱེད་པ་དང་མང་ཚོགས་ལ་བྱམས་བརྩེའི་ཐུགས་ཁུར་དང་། སི་ཁྲོན་གྱི་ཏང་གི་འཛུགས་སྐྲུན་དང་འགོ་ཁྲིད་ཚན་ཁག་གི་འཛུགས་སྐྲུན་ལ་མཐོང་ཆེན་དང་ཐུགས་ཁུར་མཚོན་ཡོད།
    བློ་མཐུན་ལིའུ་ཡུན་ཧྲན་གྱིས་དབུལ་སྒྲོལ་འགག་སྒྲོལ་གྱི་བཞུགས་མོལ་ཚོགས་འདུའི་སྟེང་གསུང་བཤད་གནང་སྟེ། རང་རེའི་ཞིང་ཆེན་གྱི་དབུལ་སྒྲོལ་འགག་སྒྲོལ་ལས་ཀའི་བྱ་ཐབས་དང་གྲུབ་འབྲས་ལ་ཁས་ལེན་གང་ལེགས་གནང་ཞིང་། སྔར་ལས་ལྷག་པའི་སྒོ་ནས་ཏང་འཛུགས་དང་རྩ་འཛུགས་ལས་ཀ དབུལ་སྒྲོལ་འགག་སྒྲོལ་གྱི་ཞབས་ཞུ་སྐོར་ལ་བླང་བྱ་གསལ་པོ་བཏོན། ང་ཚོས་ནན་ཏན་སྒོས་སློབ་སྦྱོང་དང་གོ་བ་ལེན་དགོས་པ་དང་། ལག་བསྟར་དོན་འཁྱོལ་ཡག་པོ་བྱས་ནས། ཕྱོགས་གང་ཅིའི་ཐད་ཀྱི་ལས་ཀ་སྔར་ལས་ལེགས་པར་སྒྲུབ་དགོས།
    ཚོགས་འདུའི་སྟེང་ནན་གྱིས་བསྟན་དོན། རང་རེའི་ཞིང་ཆེན་གྱིས་ཏང་གི་མང་ཚོགས་ལམ་ཕྱོགས་སློབ་གསོ་ལག་ལེན་བྱ་འགུལ་དང་དྲང་གསུམ་ནན་གསུམ་གྱི་ཆེད་དོན་སློབ་གསོ་སྤེལ་བའི་ཉམས་མྱོང་དང་བྱེད་ཐབས་བེད་སྤྱོད་གང་ལེགས་བྱས་ནས། མུ་མཐུད་དུ་ཏང་གི་སྐབས་བཅོ་བརྒྱད་པའི་ཚོགས་ཆེན་འཚོགས་པ་ནས་བཟུང་རང་རེའི་ཞིང་ཆེན་གྱིས་ཕྱོགས་ཡོངས་ནས་ཏང་གི་འཛུགས་སྐྲུན་ལ་ཤུགས་སྣོན་བྱས་པའི་བྱ་ཐབས་ཁག་རྒྱུན་འཁྱོངས་བྱ་དགོས།
    ཚོགས་འདུའི་སྟེང་ད་དུང་ལས་ཀ་གཞན་དག་ལ་ཞིབ་འཇུག་བྱས།