ཚིགས་ཤོར་བ་ཞེས་པ་ནི་རྐང་ལག་གི་ཚིགས་རང་གནས་ནས་བྱུང་བའམ་ཤོར་བ་ལ་ཟེར། སྤྱིར་ན་ཚིགས་ཤོར་བ་ལ་ཚིགས་རང་གི་གནས་ལས་གཡས་སུ་ཤོར་བའམ་གཡོན་དུ་ཤོར་བ། སྟེང་ཏུ་ཤོར་བ་དང་འོག་ཏུ་ཤོར་བ་སྟེ་རྣམ་པ་བཞི་ཡོད།
དེ་ཡང་ལག་པའི་དཔུང་ཚིགས་ནི་ཨུ་ཟུར་གྱིས་མནན་པས་སྟེང་དུ་འཆོར་མི་སྲིད། རྐང་པའི་པུས་ཚོགས་ནི་སྟེང་དུ་ལྷ་ངས་བཀབ་ནས་ཡོད་པས་སྟེང་དུ་འཆོར་མི་སྲིད་པ་དང་། རྐང་པའི་རྒྱ་ཚིགས་དང་ལག་པའི་མཁྲིག་མ་གཉིས་ནི་གཡས་གཡོན་དུ་འཆོར་མི་སྲིད་ཅིང་། ལག་པའི་གྲུ་མོར་གཞུ་མཆོག་གིས་བཀབ་པ་དང་། རྐང་པའི་ལོང་ཚིགས་ལ་སྲེ་ལོང་གིས་བཀབ་པས་རྒྱབ་ཏུ་འཆོར་མི་སྲིད། དཔྱི་རུས་ལ་བྱུང་ཤོར་མང་བ་ཕྱི་ཤོར་དང་ནང་ཤོར་གཉིས་དང་། གཞན་ཡང་དཔྱི་ཡི་འཁོར་མིག་གི་ནང་དུ་ཤོར་ཏེ་རུས་ཆག་དང་བཅས་ཏེ་ཤོར་བའང་ཡོད།
སྤྱིར་ལུས་ཀྱི་ཚིགས་ཤོར་བའི་རྟགས་སུ་འགུལ་སྐྱོད་ཅུང་ཟད་ཙམ་གྱིས་ཀྱང་ཟུག་གཟེར་ལྡང་བར་བྱེད་ཅིང་། རྐྱེན་སྣ་ཚོགས་ཀྱིས་རུས་ཚིགས་རང་གནས་ནས་ཤོར་བའི་མོད་ལ་སྐྲངས་ཤིང་ཡན་ལག་བརྐྱང་བསྐུམ་གྱི་བྱ་བ་ཉམས་ཏེ་བརྐྱང་བསྐུམ་བྱེད་མི་ཐུབ་པ་དང་། ཚིགས་གང་ཤོར་བའི་གནས་དེར་འབུར་ཀྱོང་ངམ་ཡང་ན་ཡན་ལག་རིང་ཐུང་འབྱུང་བ་ཡིན། ལྷག་པར་དཔྱིའི་གཏུག་ཐག་དང་སོག་པའི་གཉེན་ཐག་གཉིས་ཆད་པར་གྱུར་ན་ཚིགས་རང་མལ་དུ་བཅུག་ཀྱང་མི་སྡོད་ཅིང་རྐང་པ་ཞ་འཐེང་དུ་འགྱུར་བ་ཡིན།
ཡན་ལག་གི་ཚིགས་ཤོར་ན་ལམ་སེང་སྨན་ཁང་ནས་གཞུག་དགོས་ཏེ། ཚིགས་གཞུག་པའི་ཐབས་ནི་ཚིགས་ཤོར་ཏེ་སྐྲངས་པར་མ་གྱུར་པ་གསར་བའི་དུས་སུ་མོད་ལ་གཞུག་དགོས་ཤིང་། གལ་ཏེ་གཟའ་འཁོར་གསུམ་འདས་ན་རྙིང་པར་གྱུར་པས་དེ་དུས་གཞུག་པར་དཀའ་བས་ན་སྨན་ལུམས་ཀྱིས་ཤ་དང་ཆུ་བ་བཏུལ་ལ་མཉེན་པར་བྱས་རྗེས་གཞུག་དགོས། ཚིགས་ཤོར་གཞུག་སྐབས་སྨན་པའམ་ཡང་ན་ཚིགས་ཤོར་གཞུག་པར་ཉམས་མྱོང་ཡོད་པའི་མིས་གཞུག་དགོས་ལ། མཉམ་འཇོག་བྱ་དགོས་པ་ནི་ཚིགས་གཞུག་སྐབས་ལན་གཅིག་གམ་གཉིས་ཀྱིས་གནས་སུ་མ་ཚུད་ན་ཡང་བསྐྱར་དྲག་ཏུ་འཐེན་མི་རུང་ལ། ངེས་པར་སྨན་ཁང་ནས་བརྟག་དཔྱད་ཆ་ཚང་བྱས་རྗེས་བརྟག་འབྲས་དང་བསྟུན་པའི་ལག་ཐབས་བཀོལ་ཏེ་སྨན་བཅོས་བྱ་དགོས་པ་ཡིན།།
《མཚོ་སྔོན་བོད་ཡིག་གསར་འགྱུར།》ལས་བཤུས།
