རྒྱལ་ཡོངས་ཀྱི་ཐེངས་བཅུ་གཅིག་པའི་རིག་གནས་ཤུལ་བཞག་ཉིན་མོར། བོད་རང་སྐྱོང་ལྗོངས་རིག་གནས་ཐིང་གིས་གཙོ་སྒྲུབ་བྱས་ཤིང་། བོད་རང་སྐྱོང་ལྗོངས་མང་ཚོགས་སྒྱུ་རྩལ་ཁང་（ཁུལ་ཤུལ་བཞག་རིག་གནས་སྲུང་སྐྱོང་ལྟེ་གནས།）གིས་རོགས་སྒྲུབ་བྱས་པའི་སྲོལ་རྒྱུན་བཟོ་རྩལ་དར་སྤེལ་དང་བོད་ལྗོངས་སྲོལ་རྒྱུན་ལག་ཤེས་བཟོ་རྩལ་ཐོན་རྫས་འགྲེམ་སྟོན་དང་གསར་གཏོད་འགྲན་ཚོགས་ཆེན་མོ། སྐབས་དང་པོའི་གཉའ་ཁྲི་བོད་ཡིག་བྲིས་གཟུགས་སྤུས་དག་འགྲེམ་སྟོན་དང་དངོས་མིན་རིག་གནས་ཤུལ་བཞག་སྟེ་གླུ་གར་འགྲེམ་སྟོན་སོགས་ཀྱི་མུ་འབྲེལ་བྱེད་སྒོ་ཚེས་11ཉིན་སྤེལ། 

        རྒྱུས་ལོན་བྱུང་བ་ལྟར་ན། ཐེངས་འདིར་སྤེལ་བའི་སྲོལ་རྒྱུན་བཟོ་རྩལ་དར་སྤེལ་དང་བོད་ལྗོངས་སྲོལ་རྒྱུན་ལག་ཤེས་བཟོ་རྩལ་ཐོན་རྫས་འགྲེམ་སྟོན་དང་གསར་གཏོད་འགྲན་ཚོགས་ཆེན་མོའི་བྱེད་སྒོའི་སྟེང་གསར་གཏོད་བྱེད་སྒོར་ཞུགས་མཁན་མི་གྲངས་300ལྷག་དང་། གསར་གཏོད་ཀྱི་ཚབ་མཚོན་རང་བཞིན་ལྡན་པའི་སྲོལ་རྒྱུན་ལག་རྩལ་རིགས་ཀྱི་ཐོན་རྫས་དང་རྒྱ་བསྐྱེད་ཐོན་རྫས་1500ལྷག་འདུས་ཤིང་། ཐེངས་འདིའི་བྱེད་སྒོ་ཚེས་18རིང་རྒྱུན་མཐུད་བྱ་རྒྱུ་ཡིན་ཏེ། ཚང་མང་འཕྲིན་སྟེགས་བརྒྱུད་དེ་རང་རང་དགའ་ཤོས་ཀྱི་བརྩམས་ཆོས་ལ་འདེམས་ཤོག་འཕེན་ཆོག་པ་རེད།།