ཉེ་ཆར། རྔ་བ་ཁུལ་ཧུང་ཡོན་རྫོང་རྨེ་བ་དགོན་གྱི་གྲྭ་པ་དང་དེའི་མཐའ་འཁོར་གྱི་མང་ཚོགས་ཚོར་《ཐུམ་འབུའི་ནད་འགོག་བཅོས།》སོགས་ཚན་རིག་ཤེས་བྱའི་སྐོར་གྱི་བརྙན་རིས་འགྲེམ་སྟོན་བྱས། ཁོ་ཚོས་གོ་སྐབས་དེ་དང་བསྟུན་ནས་སྤྱིའི་འཕྲོད་བསྟེན་དང་ནད་གཞི་སྔོན་འགོག་སོགས་ཀྱི་རྨང་གཞིའི་ཤེས་བྱའི་སྐོར་ལ་སྦྱངས་བ་བྱས་ཤིང་། འདི་ནི་སི་ཁྲོན་ཞིང་ཆེན་གྱི་རྩ་འཛུགས་བྱས་པའི་2016ལོའི་དགོན་སྡེར་ཚན་རིག་ཤེས་བྱ་ཁྱབ་སྤེལ་གཏོང་བའི་བྱེད་སྒོའི་ནང་དོན་གྱི་གྲས་ཤིག་ཡིན། གསར་འགོད་པས་སི་ཁྲོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་ནས་རྒྱུས་ལོན་བྱུང་པ་ལྟར་ན། དགོན་སྡེར་ཚན་རིག་ཤེས་བྱ་ཁྱབ་སྤེལ་གཏོང་བའི་བྱེད་སྒོ་དེ་ཚན་རིག་ཤེས་བྱའི་དངོས་རྫས་འགྲེམ་སྤེལ་དང་འཕྲོད་བསྟེན་ཤེས་བྱའི་འཆད་ཁྲིད། མེ་ཟོན་བདེ་འཇགས་འཆད་ཁྲིད། རིན་མེད་འོས་འགན་སྨན་བཅོས་སོགས་བྱེད་ཐབས་བརྒྱུད་ཁྱབ་སྤེལ་བྱས། ཡུལ་དངོས་སུ་《ཐུམ་འབུའི་ནད་ཀྱི་འགོག་བཅོས།》དང་《ཚིགས་སྦལ་ནད་ཀྱི་འགོག་བཅོས།》སོགས་ཀྱི་བརྙན་ཐུང་མང་ཚོགས་ལ་བསྟན། དེ་མིན་ཡུལ་དངོས་སུ་《སི་ཁྲོན་ཞིང་ཆེན་གྱི་འགོ་ནད་ཚབས་ཆེན་འགོག་བཅོས་ཀྱི་ཤེས་བྱའི་ལག་དེབ།》（བོད་རྒྱ་ཡིག་གཉིས།）དང་《གྲོང་གསེབ་ཀྱི་རྒྱུན་མཐོང་ནད་གཞིའི་སྔོན་འགོག》《ཆུའི་ཐོན་ཁུངས་ལ་སྲུང་སྐྱོང་བྱས་ནས་ཆུའི་ཁོར་ཡུག་ལེགས་སུ་གཏོང་བ།》སོགས་ཚན་རིག་ཁྱབ་སྤེལ་གྱི་དེབ་ཚོགས་200ལྷག་དང《མྱུར་སྐྱོབ་ཕྱོགས་སྟོན།》གྱི་ཚན་རིག་ཁྱབ་སྤེལ་གྱི་པར་རིས་500ལྷག་ཞལ་འདེབས་སུ་ཕུལ།
སི་ཁྲོན་ཞིང་ཆེན་གྱི་2016ལོའི་དགོན་སྡེར་ཚན་རིག་ཤེས་བྱ་ཁྱབ་སྤེལ་གཏོང་བའི་བྱེད་སྒོ་ནི་སི་ཁྲོན་ཞིང་ཆེན་ཚན་རིག་ལག་རྩལ་མཐུན་ཚོགས་དང་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གིས་གཙོ་གཉེར་བྱས་ཤིང་། ཉེ་བའི་ལོ་ཤས་རིང་ལ། སི་ཁྲོན་གྱིས་དཀར་མཛེས་ཁུལ་དང་རྔ་བ་ཁུལ་སོགས་སུ་མུ་མཐུད་དུ་དགོན་པར་ཚན་རིག་ཤེས་བྱ་ཁྱབ་སྤེལ་གཏོང་བའི་བྱེད་སྒོ་སྤེལ་རྒྱུ་རེད།།
