སྤྱི་ཟླ་9པའི་ཚེས་12ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་མི་དམངས་ཚོགས་ཁང་ཆེན་མོའི་ནང་ཀྲུང་གོར་འཚམས་འདྲིར་ཕེབས་པའི་ཝེད་ནམ་གྱི་ཙུང་ལི་རོན་ཁྲོན་ཧྥུ་དང་གྲོས་མོལ་མཛད། 
        ལི་ཁེ་ཆང་གིས་ཀྲུང་གོ་དང་ཝེད་ནམ་གཉིས་ནི་ཁྱིམ་མཚེས་བཟང་པོ་དང་འཕེལ་རྒྱས་ཀྱི་མཛའ་མཐུན་གྲོགས་པོ་ཡིན། ཀྲུང་གོའི་ཕྱོགས་ཀྱིས་ཝེད་ནམ་གྱིས་རྒྱལ་ཁབ་རང་གི་ཁྱད་ཆོས་དང་མཐུན་པའི་སྤྱི་ཚོགས་རིང་ལུགས་ཀྱི་བགྲོད་ལམ་རྒྱུན་འཁྱོངས་བྱས་པ་དང་། ཁྱོན་ཡོངས་ནས་གསར་བཅོས་ལས་དོན་སྤེལ་བར་རྒྱབ་སྐྱོར་བྱེད་ངེས་པར་མ་ཟད།  ཁྱིམ་མཚེས་མཛའ་མཐུན་ཡོང་བར་བྱེད་པ་དང་། ཁྱིམ་མཚེས་གྲོགས་པོར་བརྩི་བའི་བྱེད་ཕྱོགས་མུ་མཐུད་དུ་རྒྱུན་འཁྱོངས་བྱས་ནས། ཝེད་ནམ་ཕྱོགས་ཀྱི་འཐབ་ཇུས་འབྲེལ་འདྲིས་དང་མཐོ་རིམ་བར་གྱི་འགྲོ་འོང་ལ་ཤུགས་སྣོན་བྱས་ཏེ། ཀྲུང་གོ་དང་ཝེད་ནམ་གཉིས་ཀྱི་འབྲེལ་བའི་འཕེལ་རྒྱས་ཀྱི་ཡང་དག་པའི་ཁ་ཕྱོགས་ཚོད་འཛིན་བྱས་ནས། གཉིས་ཕན་མཉམ་ལས་རྒྱུན་ཆད་མེད་པར་གཏིང་ཟབ་ཏུ་སྤེལ་བ་དང་། མི་ཆོས་བརྗེ་རེས་རྒྱ་བསྐྱེད་པ། ཀྲུང་གོ་དང་ཝེད་ནམ་གཉིས་ཀྱི་འབྲེལ་བ་རྒྱུན་མཐུད་དང་བདེ་བླག བརྟན་འཇགས་བཅས་ཀྱི་སྒོ་ནས་འཕེལ་རྒྱས་སུ་བཏང་སྟེ། རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་འདོད་ཅེས་བསྟན། 
        རོན་ཁྲོན་ཧྥུ་ཡིས་ཝེད་ནམ་དང་ཀྲུང་གོ་གཉིས་ཀྱིས་འབྲེལ་བ་བཙུགས་ནས་ལོ་འཁོར་66ལོན་པའི་རིང་ལ། མཛའ་མཐུན་དང་མཉམ་ལས་ནི་རྒྱལ་ཁབ་གཉིས་ཀྱི་འབྲེལ་བའི་འཕེལ་ཕྱོགས་གཙོ་བོ་ཡིན། ཝེད་ནམ་ཕྱོགས་ནས་ཀྲུང་གོའི་ཕྱོགས་ཀྱིས་ཝེད་ནམ་མི་རིགས་ཀྱི་མི་རིགས་བཅིངས་འགྲོལ་དང་འཛུགས་སྐྲུན་ལས་དོན་ལ་རྒྱབ་སྐྱོར་ཆེན་པོ་གནང་བར་བརྗེད་མི་སྲིད་ལ། ཝེད་ནམ་དང་ཀྲུང་གོ་གཉིས་ཀྱི་སྲོལ་རྒྱུན་མཛའ་མཐུན་འབྲེལ་བར་སྲུང་སྐྱོབ་བྱེད་པ་དང་། ཝེད་ནམ་དང་ཀྲུང་གོ་གཉིས་ཀྱི་འབྲེལ་བ་བརྟན་འཇགས་དང་བདེ་བླག རྒྱུན་མཐུད་བཅས་ཀྱི་སྒོ་ནས་འཕེལ་རྒྱས་སུ་གཏོང་བ་ནི་ཝེད་ནམ་ཏང་དང་སྲིད་གཞུང་གིས་དུས་དང་རྣམ་པ་ཀུན་དུ་རྒྱུན་འཁྱོངས་བྱེད་པའི་འདོད་བློ་ཡིན་པར་མ་ཟད། ཝེད་ནམ་གྱི་ཕྱི་འབྲེལ་སྲིད་ཇུས་ཀྱི་ཐོག་མའི་ཁ་ཕྱོགས་ཀྱང་ཡིན། མིག་སྔར་རྒྱལ་ཁབ་གཉིས་ཀྱི་འབྲེལ་བས་དགེ་མཚན་ལྡན་པའི་འབྲེལ་བ་རྒྱུན་འཁྱོངས་བྱེད་བཞིན་ཡོད་ལ། ཝེད་ནམ་ཕྱོགས་ཀྱིས་ཀྲུང་གོ་ཕྱོགས་དང་ཆབ་སྲིད་ཐད་ནས་ཕན་ཚུན་ལ་ཡིད་ཆེས་དམ་ཟབ་བྱེད་པ་དང་། མཐོ་རིམ་བར་གྱི་འབྲེལ་འདྲིས་རྒྱུན་འཁྱོངས་བྱེད་པ། སྲིད་གཞུང་བར་གྱི་མཉམ་ལས་ལས་ཁུངས་ཀྱི་ནུས་པ་འདོན་སྤེལ་བྱས་ནས་ཁྱབ་ཁོངས་སོ་སོ་དང་རིམ་པ་སོ་སོའི་བརྗེ་རེས་དང་དངོས་དོན་མཉམ་ལས་གཏིང་ཟབ་ཏུ་སྤེལ་ཏེ་སྲོལ་རྒྱུན་མཛའ་མཐུན་དར་སྤེལ་དང་མི་ཆོས་བརྗེ་རེས་རྒྱ་སྐྱེད་འདོད་པར་མ་ཟད་ཕྱོགས་མང་པའི་ལས་དོན་ཁྲོད་ཀྱི་མཐུན་སྦྱོར་མཉམ་འབྲེལ་ལ་ཤུགས་སྣོན་བྱ་འདོད་ཅེས་བསྟན།།