བྱང་ཆུབ་སྒྲོལ་མ།
བོད་རིགས་རི་མོ་སྒྱུ་རྩལ་པ་བྱང་ཆུབ་སྒྲོལ་མ་ལགས་ནི་1947ལོའི་ཟླ་1པོར་སི་ཁྲོན་འབའ་ཐང་རྫོང་དུ་སྐྱེས་ཤིང་། 1965ལོར་སི་ཁྲོན་ཞིང་ཆེན་མཛེས་རྩལ་སློབ་གླིང་གི་མི་རིགས་འཛིན་གྲྭ་ནས་སློབ་མཐར་ཕྱིན། ཁོ་མོ་ནི་ཀྲུང་གོའི་མཛེས་རྩལ་མཐུན་ཚོགས་ཀྱི་ཚོགས་མི་དང་སི་ཁྲོན་མཛེས་རྩལ་ལས་མཁན་མཐུན་ཚོགས་ཀྱི་ཚོགས་མི། ཨ་མེ་རི་ཁའི་རྒྱལ་སྤྱིའི་རིག་གནས་ཚན་རིག་སློབ་ཚོགས་ཀྱི་ཚོགས་མི། སི་ཁྲོན་ཞིང་ཆེན་སྲིད་གྲོས་ཡིག་རིས་ཁང་གི་ལྷ་རིས་པ། སི་ཁྲོན་ཞིང་ཆེན་ཁྲེན་ཏུའུ་ཡི་སྙན་ངག་དང་དཔེ་རིས་ཞིབ་འཇུག་ཁང་གི་ལས་འཛིན་པ། རྒྱལ་ཁབ་རིམ་པ་དང་པོའི་མཛེས་རྩལ་མཁས་པ་སོགས་ཡིན།
ཁོ་མོས་ལོ་ངོ་མང་པོའི་རིང་ལ་བོད་ཁུལ་གྱི་འཚོ་བ་མཚོན་པའི་རི་མོའི་བརྩམས་ཆོས་མང་པོ་དང་བོད་ཀྱི་སྲོལ་རྒྱུན་གྱི་རི་མོའི་འབྲི་ཐབས་ལ་སློབ་སྦྱོང་དང་ཞིབ་འཇུག་གནང་ཞིང་། དེ་ལས་བརྩམས་ཆོས་མང་པོ་སྐབས་ལྔ་པ་དང་དྲུག་པ། བདུན་པ། དགུ་པའི་རྒྱལ་ཡོངས་རི་མོའི་འགྲེམ་སྟོན་དང་རྒྱལ་ཡོངས་གྲངས་ཉུང་མི་རིགས་ཀྱི་རི་མོའི་འགྲེམ་སྟོན། ཞིང་ཆེན་གྲངས་ཉུང་མི་རིགས་ཀྱི་རི་མོ་འགྲེམ་སྟོན་སོགས་ཀྱི་སྟེང་དུ་འགྲེམ་སྟོན་གནང་། ཁོང་གི་བརྩམས་ཆོས་ལ་སྔ་རྗེས་སུ་རྒྱལ་ཡོངས་སྐབས་དགུ་པའི་རི་མོའི་འགྲེམ་སྟོན་སྟེང་ཕུལ་བྱུང་གཟེངས་རྟགས(མཉམ་འབྲེལ་བརྩམས་ཆོས།)དང་ཞིང་ཆེན་རིམ་པའི་གཟེངས་རྟགས་ཨང་དང་པོ་གཉིས། དངུལ་གྱི་རྟགས་མ་གཅིག ཨང་གཉིས་པའི་གཟེངས་རྟགས་གསུམ། ཨང་གསུམ་པའི་གཟེངས་རྟགས་གསུམ། ཕུལ་བྱུང་བརྩམས་ཆོས་ཀྱི་གཟེངས་རྟགས་དྲུག་བཅས་ཐོབ་པ་དང་། བརྩམས་ཆོས་དག་སྔོན་ཆད་ཞང་ཀང་དང་ཨར་ཅི་རི་ཡ། འཇར་པན། སིང་གྷ་ཕོར་སོགས་རྒྱལ་ཁབ་དག་ཏུ་འགྲེམ་སྟོན་གནང་།
པཎ་ཆེན་སྐུ་ཕྲེང་བཅུ་པ་མཆོག་བོད་ཁུལ་དུ་ཕེབས་བཞིན་པའི་རྣམ་པ།
མེ་ཏོག་གངས་ལྷ།
དཔྱིད་དཔལ་བསུ་བ།
