སྤྱི་ཟླ་10པའི་ཚེས་18ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོའི་ནང་ཡུ་རུ་གྷེའི་སྲིད་འཛིན་པཱ་སི་ཁི་སི་དང་གྲོས་མོལ་མཛད།
        ཞི་ཅིན་ཕིང་གིས་ཀྲུང་གོ་དང་ཡུ་རུ་གྷེ་གཉིས་ཀྱིས་འབྲེལ་བ་བཙུགས་ནས་ལོ་ངོ་28འགོར་བའི་རིང་ལ་ཕྱོགས་གཉིས་ཀྱིས་དུས་དང་རྣམ་པ་ཀུན་ཏུ་འདྲ་མཉམ་གྱི་ལྟ་སྟངས་རྒྱུན་འཁྱོངས་དང་གཉིས་ཕན་མཉམ་ལས་སྤེལ་ཏེ་གྲོགས་པོར་བཟང་པོར་གྱུར་བ་རེད། དེང་སྐབས་ཀྲུང་གོ་དང་ཡུ་རུ་གྷེའི་འབྲེལ་བ་ལོ་རྒྱུས་ཀྱི་འགོ་རྩོམ་ས་གསར་པ་ཞིག་ལ་སླེབས་ཟིན་ཞིང་ང་ཚོས་མཉམ་དུ་འབད་པ་ཆེན་པོས་ཁྱོན་ཡོངས་ནས་རྒྱལ་ཁབ་གཉིས་ཀྱི་མཉམ་ལས་འཆར་གཞི་ལ་འཆར་འགོད་དང་ལག་བསྟར་བྱས་ཏེ། སྔར་ལས་ལེགས་པའི་སྒོ་ནས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་དགོས་ཞེས་བསྟན། 
        པཱ་སི་ཁི་སི་ཡིས་ཕྱོགས་གཉིས་ཀྱི་བཟོ་ཚོང་དང་དངུལ་འཇོག དངུལ་རྩ། ཞིང་ལས། ཉ་ལས། ནུས་ཁུངས། ས་ཁུལ། རྐང་རྩེད་སྤོ་ལོ་སོགས་ཁྱབ་ཁོངས་ཀྱི་མཉམ་ལས་རྣམ་པ་ཤིན་ཏུ་ལེགས་ཤིང་། ཡུ་རུ་གྷེའི་ཕྱོགས་ནས་ཀྲུང་གོའི་ཁེ་ལས་མང་པོས་ཡུ་རུ་གྷེའི་རྨང་གཞི་སྒྲིག་བཀོད་འཛུགས་སྐྲུན་གྱི་མ་དངུལ་འཇོག་ཤུགས་ཆེར་གཏང་བར་དགའ་བསུ་ཞུ་བཞིན་ཡོད་པར་མ་ཟད། ཕྱོགས་གཉིས་ཀྱི་རང་དབང་བཟོ་ཚོང་གྲོས་ཆོད་ལ་མིང་རྟགས་འགོད་འདོད། དེ་མིན་ཀྲུང་གོའི་ཕྱོགས་དང་མཉམ་དུ་ཀྲུང་གོ་དང་ཡུ་རུ་གྷེའི་འབྲེལ་བ་སྔར་ལས་འཕེལ་རྒྱས་དང་རྒྱལ་སྤྱི་དང་ས་གནས་ལས་དོན་ཁྲོད་མཉམ་ལས་མཐུན་སྦྱོར་དམ་ཟབ་བྱ་འདོད་ཅེས་བསྟན། །