ཆོས་བསྐོར། ཀྲོའུ་ཡན་ཀའོ་ཡིས་པར་བླངས།
抱经转寺 图 / 周严国

ཆོས་བསྐོར། ཀྲོའུ་ཡན་ཀའོ་ཡིས་པར་བླངས།
抱经转寺 图 / 周严国

        རབ་འབྱམས་རྒྱལ་བ་ཀུན་གྱི་ཡེ་ཤེས་ནི། །དུས་མཐར་ཐུབ་བསྟན་རྒྱལ་མཚན་བསྒྲེང་བའི་ཕྱིར། །གསུམ་ལྡན་ངུར་སྨྲིག་འཆང་བའི་རྣམ་རོལ་པ། །ཡབ་རྗེ་འཇིགས་མེད་དབང་པོའི་ཞབས་ལ་འདུད། །དམ་པའི་སྐྱེས་བུ་འགའ་ཞིག་མདོ་སྔགས་ཀྱི། །ལམ་བཟང་སྒྲུབ་ཚུལ་བསླབ་བྱ་དགོས་སོ་ཟེར། །གཞན་ལ་ཕན་པའི་བསླབ་བྱ་བྱེད་པ་པོ། །རང་ཉིད་བསམ་ཞིང་རང་ལ་ཡི་མུག་སྐྱེས། །འདི་ཕྱིའི་སྐྱབས་སུ་བླ་མ་བསྟེན་ན་ཡང་། །བདེན་ཁ་རང་གིས་བཟུང་བ་ཡིད་རེ་མུག །དལ་འབྱོར་དོན་ཆེ་རྙེད་དཀའ་ཟེར་བཞིན་དུ། །དོན་མེད་སྟོང་པར་ཟད་པ་ཡིད་རེ་མུག །ནོར་རྐུན་མཐོང་ནས་ཤིན་ཏུ་ཟོན་བྱེད་ཀྱང་། །མི་རྐུན་གཤིན་རྗེའི་ཟོན་མེད་ཡིད་རེ་མུག །ལྐོག་གྱུར་གནས་ལུགས་འཚོལ་བའི་ཁུལ་བྱེད་ཀྱང་། །མངོན་འགྱུར་འཆི་བ་མི་མཐོང་ཡིད་རེ་མུག །ཉེས་སྤྱོད་ཆུ་བོ་ཐུར་དུ་རྒྱུག་བཞིན་དུ། །བདེ་འགྲོའི་རི་རྩེར་ཕྱིན་འདོད་ཡིད་རེ་མུག །བདེ་འགྲོར་མ་ཟད་བདེ་བ་ཅན་འདོད་ཀྱང་། །དམྱལ་བའི་གཏིང་རྡོ་བྱེད་པ་ཡིད་རེ་མུག །སྐྱིད་སྡུག་བདམ་དབང་ཡོད་ཅིང་ཤེས་བཞིན་དུ། །ཐར་མེད་བཙོན་རར་འཇུག་པ་ཡིད་རེ་མུག །གཞན་ལ་འདི་ཕྱིའི་སྐྱབས་འཇུག་ཁས་ལེན་ཡང་། །རང་ཉིད་གར་འགྲོ་མེད་པ་ཡིད་རེ་མུག །བསྟན་འཛིན་གོང་མའི་གྲལ་དུ་འཚང་ན་ཡང་། །བསྟན་པའི་སྒོ་རུ་མ་ཆུད་ཡིད་རེ་མུག །སྡོམ་གསུམ་ནོར་བུའི་གཏེར་ཁ་ཕྱེ་བ་ལས། །ཉེས་ལྟུང་རྙོག་ཆུ་རྡོལ་བ་ཡིད་རེ་མུག །གྲོལ་བ་ཐར་བ་དོན་གཉེར་ཟེར་བཞིན་དུ། །སྲེད་མཁོས་ཕྱི་ཕྱིར་འཆིང་བ་ཡིད་རེ་མུག །ཐར་འདོད་སྐྱེས་བུ་ཡིན་པ་གཞིར་བཞག་ལ། །ཅི་བྱས་འཁོར་བའི་རྒྱུར་སོང་ཡིད་རེ་མུག །མིག་རྩ་འཁོར་ལ་གཏད་དེ་ཆོག་ཤེས་ཀྱི། །གདམས་ངག་བྲོ་བའི་ཆོས་བཤད་ཡིད་རེ་མུག །དཀའ་ཚེགས་ཆེ་ལ་འདི་ཕྱི་གང་དུ་ཡང་། །ཕན་མེད་ཤྭ་སྡུག་ཁྱི་སྡུག་ཡིད་རེ་མུག །རྩེ་གཅིག་དད་པའི་རྒྱུ་ནོར་བསགས་བསགས་ཀྱང་། །འཆི་ཚེ་ཅམ་གྱིས་བསྐྱུར་དགོས་ཡིད་རེ་མུག །འདི་བས་འདི་དགོས་མང་སྟེ་བཤོལ་བའི་འོས། །དམ་ཆོས་གཅིག་པུར་བབ་པ་ཡིད་རེ་མུག །བསྟན་པའི་བྱ་བར་བཏགས་ནས་སྡེ་དགོན་བསྐྱངས། །ཆགས་སྡང་རུ་མར་སོང་པ་ཡིད་རེ་མུག །གྲྭ་སློབ་སྦྱིན་བདག་ངན་པ་ཡར་ཐེན་པས། །རང་ཉིད་ཐུར་དུ་ལྷུང་བ་ཡིད་རེ་མུག །རྒྱ་ཆེན་གཞུང་ལུགས་ལྟ་བའི་མིག་བགྲད་ནས། །བླང་དོར་ལག་ནོམ་དགོས་པ་ཡིད་རེ་མུག །འགྲིག་འགྲིག་ཆོས་གཏམ་བཤད་ཀྱང་སྤྱོད་ཚུལ་ལ། །བལྟས་བཞིན་གྲོགས་ཀྱི་ཞེ་ཁྲེལ་ཡིད་རེ་མུག །གཡོ་སྒྱུ་འཕྲལ་ལ་གཞན་གྱི་མ་ཤེས་ཀྱང་། །མཆོག་གསུམ་ཐུགས་ཁྲེལ་འབྱུང་བ་ཡིད་རེ་མུག །སྙིང་རྗེའི་ཉམས་བཏོད་རང་མཁོ་ཕུགས་སུ་བཅུག །བྱི་ལའི་འཇམ་སྐད་འདོན་པ་ཡིད་རེ་མུག །དགེ་སྦྱོར་བྱེད་བཞིན་སེམས་དང་རྨི་ལྟས་ཚུན། །ཇེ་ཐུར་ཇེ་ཐུར་འགྲོ་བ་ཡིད་རེ་མུག །མི་ཚེ་ཆོས་ལ་བསྐྱལ་བའི་མལ་ས་ནས། །དུད་འགྲོའི་བེམ་པོ་བྱུང་ན་ཡིད་རེ་མུག །ད་ལྟ་གདེང་ཡོད་ཁུལ་གྱིས་སོས་བདེར་བསྡད། །འཆི་ཁ་སྡུག་སྨྲས་ཤོར་ན་ཡིད་རེ་མུག །མདོར་ན་འཁྲུལ་པ་མེད་པ་རྒྱལ་བའི་བཀའ། །སྔོན་བྱོན་དམ་པའི་གསུང་དང་རྣམ་པར་ཐར། །འཁོར་འདས་སྐྱོན་ཡོན་གང་གི་སྒོ་ནས་ཀྱང་། །རང་གི་སེམས་ལ་བལྟས་ན་ཡིད་རེ་མུག །འོན་ཀྱང་ཁོ་བོ་ད་ལྟ་མི་རྣམས་ཀྱིས། །དམ་པར་བཀུར་བས་རང་རྒྱུས་ཤེས་བཞིན་དུ། །སྟོང་འུར་ལང་བས་དམ་པའི་ཁུར་འཛིན་ཞིང་། །དེ་ཡི་རྫུན་འགེབས་གཡོ་སྒྱུ་ཅི་ཡང་བྱས། །རང་གི་ངང་ཚུལ་འདི་ཡིས་རྗེས་དཔག་ན། །སྙིགས་དུས་བླ་སྤྲུལ་དགེ་བའི་བཤེས་གཉེན་དུ། །གྲགས་པའི་ཁྲོད་ནའང་ཕྱི་ནང་གོ་འཛོལ་བ། །ང་འདྲ་ཡོད་དམ་སྙམ་དུ་དོགས་པ་སྐྱེས། །མཆོད་གྲལ་ལྡེར་བཟོ་ལྟ་བུའི་བླ་ཆེན་དང་། །བཅོས་མའི་མེ་ཏོག་འདྲ་བའི་སྐུ་སྐྱེའི་རིགས། །མཁས་དང་གྲུབ་པའི་འབག་གྱོན་གར་མཁན་རྣམས། གཞན་མགོ་འདོན་པའི་སྔོན་ལ་རང་མགོ་ཐོན། །ངང་ཚུལ་དྲང་པོར་སྨྲས་པའི་བདེན་གཏམ་འདིས། །མི་རྣམས་རང་སེམས་ལྟ་བའི་མིག་འདྲེན་དུ། །སོང་སྟེ་སྐྱོན་ཡོན་བླང་དོར་ངོས་ཟིན་ནས། །ཆོས་ལ་ཆོས་བཞིན་སྦྱོང་པའི་རྒྱུར་གྱུར་ཅིག ། 

མི་ཉག་མགར་ཐར་དགོན། བསྟན་འཛིན་ཉི་མས་པར་བླངས། 道孚惠远寺 图 / 丁真尼玛