ཟླ་11བའི་ཚེས་5ཉིན་གྱི་སྔ་དྲོར། ཁྲེན་ཏུའུ་ཅིན་ཉོས་ཝན་ཏཱ་ཧྭ་རེན་རང་འདེམས་ཚོང་ཁང་གི་ཐང་ཆེན་དུ་དྭངས་གཙང་གི་དཀར་མཛེས་ཞེས་པའི་མཉམ་གཉེར་ཆེད་སྟེགས་དངོས་སུ་སྒོ་འབྱེད་པའི་མཛད་སྒོ་གཟབ་རྒྱས་ངང་སྤེལ་བ་དང་། ཡུལ་དངོས་སུ་གླུ་གར་གྱི་འཁྲབ་སྟོན་དང་། རིན་སྟེར་མི་དགོས་པར་ཟས་ལ་མྱོང་རོལ་དང་ཡུལ་དངོས་ནས་རྒྱན་ལེན་པ་བཅས་ཀྱི་བྱེད་སྒོ་སྤེལ་བས། མཐའ་འཁོར་གྱི་སྤྱི་དམངས་རྣམས་ཚང་ཁ་ཤིག་ཤིག་གིས་ཐེངས་འདུའི་བྱེད་སྒོར་བཞུགས། 

        གནས་ཚུལ་རྒྱུས་ལོན་པ་ལྟར་ན། དཀར་མཛེས་ཁུལ་མི་དམངས་སྲིད་གཞུང་གིས་དྭངས་གཙང་གི་དཀར་མཛེས་ཀྱི་ཐོན་རྫས་ཞིང་ཆེན་ཕྱི་ནང་གི་ཁྲོམ་རའི་ཐོག་བསྐྱོད་པའི་བྱེད་ཐབས་རབ་དང་རིམ་པ་བཀོལ། དཀར་མཛེས་ཁུལ་ནི་མཐོ་སྒང་བོད་ཁུལ་གྱི་ཁོངས་སུ་གཏོགས་པས། ལམ་ཐག་རིང་བ་དང་འགྲིམ་འགྲུལ་སྟབས་བདེ་མིན་པས། ཞིང་ཕྱུགས་ཐོན་རྫས་ནི་ཞིང་འབྲོག་དམངས་ཚོགས་དབུལ་བྲལ་ཡོང་བའི་ཐད་ཀྱི་ཡོང་འབབ་སྣ་རྐྱང་དུ་གྱུར། དྭངས་གཙང་གི་དཀར་མཛེས་ཞེས་པའི་མཉམ་གཉེར་ཆེད་སྟེགས་ཀྱིས་གོམ་གང་མདུན་སྤོས་ཀྱིས་ཁྲོམ་ར་རྒྱ་བསྐྱེད་དང་། སྤྱི་གཞུང་ཁྱབ་ཁོངས་ཀྱི་ཚོང་རྟགས་གསར་སྐྲུན་བྱས་ནས། ཞིང་འབྲོག་མང་ཚོགས་ཀྱི་ཡོང་འབབ་འཕར་སྣོན་ཡོང་བར་སྐུལ་འདེད་གྱི་ནུས་པ་ཐོན།
          དྭངས་གཙང་གི་དཀར་མཛེས་ཅེས་པའི་མཉམ་གཉེར་ཆེད་སྟེགས་ཁྲོད་དུ་རྫོང་15དང་ཁེ་ལས་25 ཐོན་རྫས་བརྒྱ་ལྷག་བཅས་འདུས་ཡོད་པས། དཀར་མཛེས་ཁུལ་གྱི་དཔལ་འབྱོར་འཕེལ་རྒྱས་སུ་འགྲོ་བར་གསོན་ཤུགས་གསར་བ་ཤིག་བསྣན་པར་མ་ཟད། དཀར་མཛེས་ཁུལ་དབུལ་བྲལ་འགག་སྒྲོལ་ཡོང་བར་རྨང་གཞི་བརྟན་པོ་ཞིག་ཀྱང་བཏིངས་པ་རེད། དེ་མིན་དྭངས་གཙང་གི་དཀར་མཛེས་ཞེས་པའི་མཉམ་གཉེར་ཆེད་སྟེགས་བཙུགས་པ་ཡིས། རྒྱ་ཆེའི་ཡུལ་སྐོར་བ་དང་ཁྲེན་ཏུའུ་གྲོང་ཁྱེར་གྱི་སྤྱི་དམངས་ཡོངས་ལ་དཀར་མཛེས་ཁུལ་ཏུ་འགྲོ་མི་དགོས་པར་དཀར་མཛེས་ཁུལ་གྱི་ཐོན་རྫས་ཉོ་སྒྲུབ་བྱེད་སའི་ཚོང་ལམ་ཤིག་འདོན་སྤྲོད་བྱས་པར་མ་ཟད། སྦྲག་དོན་ཞབས་ཞུའང་བཀོད་སྒྲིག་བྱས་ཏེ་རྒྱང་རིང་གི་སྐུ་མགྲོན་རྣམས་ཀྱིས་ཀྱང་དཀར་མཛེས་ཁུལ་གྱི་ཐོན་རྫས་ལ་མྱོང་རོལ་བྱེད་ཐུབ་པར་སྟབས་བདེ་བསྐྲུན། གཞན་ད་དུང་མཉམ་གཉེར་ཚོང་སྟེགས་དེ་འཛུགས་པ་ཡིས་འཛམ་གླིང་གིས་གོམ་གང་མདུན་སྤོས་ཀྱིས་དྭངས་གཙང་གི་དཀར་མཛེས་ཞེས་པའི་ཐོན་རྫས་ལ་མྱོང་རོལ་བྱེད་སའི་སྒེའུ་ཁུངས་གསར་པ་ཞིག་ཀྱང་བསྐྲུན་པ་རེད། །