ཞི་ཅིན་ཕིང་གིས་ཟས་རིགས་བདེ་འཇགས་ལས་ཀར་མཛུབ་སྟོན་གལ་ཆེན་གནང་།
རྩོམ་སྒྲིག་པ།ཚེ་དཔལ། ཡོང་ཁུངས།མི་དམངས་དྲ་བ། སྤེལ་དུས། 01-04
སྤྱི་ཟླ་དང་པོའི་ཚེས་གསུམ་ཉིན་སྤེལ་བའི་འཕྲིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཉེ་ལམ་ཟས་རིགས་བདེ་འཇགས་ལས་ཀར་མཛུབ་སྟོན་གལ་ཆེན་གནང་བ་སྟེ། ཁོང་གིས་ཟས་རིགས་བདེ་འཇགས་ལས་ཀར་ཤུགས་སྣོན་བྱ་རྒྱུ་དེ་རང་རྒྱལ་གྱི་མི་གྲངས་དུང་ཕྱུར་བཅུ་གསུམ་གྱི་ལུས་ཕུང་བདེ་ཐང་དང་ཚེ་སྲོག་བདེ་འཇགས་ལ་འབྲེལ་བ་ཡོད་པས། ངེས་པར་དུ་ཟས་རིགས་བདེ་འཇགས་ལས་ཀ་བཟང་བོར་བསྒྲུབ་དགོས། ལོ་འདི་དག་གི་རིང་ལ། ཏང་དང་སྲིད་གཞུང་གིས་སྟོབས་ཤུགས་ཡོད་རྒུ་བཏོན་ནས་ཟས་རིགས་བདེ་འཇགས་ལས་ཀར་དམ་འཛིན་བྱས་པས། ཟས་རིགས་བདེ་འཇགས་གནས་བབ་ཇེ་ལེགས་སུ་སོང་ཡོད་ནའང་གནད་དོན་མི་ཉུང་བ་ཞིག་སྔར་བཞིན་གནས་ཡོད་པ་དང་། མང་ཚོགས་ཀྱིས་ཟས་རིགས་བདེ་འཇགས་ཐད་སྔར་བཞིན་རེ་སྒུག་ཆེན་པོ་བྱེད་བཞིན་ཡོད་པས། ངེས་པར་དུ་སླར་ཡང་འབད་པ་ཆེན་པོས་ཟས་རིགས་བདེ་འཇགས་ལས་ཀ་སྔར་ལས་ལེགས་པོར་བསྒྲུབས་ནས། མི་དམངས་མང་ཚོགས་ཀྱི་ཟས་རིགས་བདེ་འཇགས་ལ་འགན་སྲུང་བྱ་དགོས་ཞེས་བསྟན།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་མཛུབ་སྟོན་གལ་ཆེན་གནང་བ་སྟེ། ཁོང་གིས་ཟས་རིགས་བདེ་འཇགས་ནི་འབྱོར་འབྲིང་སྤྱི་ཚོགས་ཁྱོན་ཡོངས་ནས་འགྲུབ་པར་བྱེད་པའི་མཚོན་བྱེད་གལ་ཆེན་ཡིན། 2016ལོར་རིམ་པ་སོ་སོའི་ཟས་རིགས་བདེ་འཇགས་ཨུ་ཡོན་ལྷན་ཁང་དང་ཁོངས་གཏོགས་ལས་ཁུངས་ཚང་མས་བྱ་བ་འབོར་ཆེན་བསྒྲུབས་ནས་གཡུར་དུ་ཟ་བའི་གྲུབ་འབྲས་བླངས་བས། འདིར་ཆེད་དུ་བློ་མཐུན་རྣམ་པར་སེམས་གཏིང་ནས་འཚམས་འདྲི་ཞུས་པ་ཡིན། ལོ་གསར་བའི་ནང་། སྔར་བཞིན་རྙོག་འཛིང་ཆེ་བའི་ཟས་རིགས་བདེ་འཇགས་ཀྱི་གནས་བབ་ལ་འཕྲད་ཡོད་པས། ཚང་མས་ནན་གྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཇུས་ཆོད་བཀོད་སྒྲིག་ལག་ལེན་མཐར་ཕྱིན་བྱས་ཏེ། ཟས་རིགས་བདེ་འཇགས་ལ་ཁག་ཐེག་བྱ་རྒྱུ་དེ་སྔར་ལས་འབུར་ཐོན་གྱི་གོ་གནས་སུ་འཇོག་དགོས་པ་དང་། ཟས་རིགས་བདེ་འཇགས་ཀྱི་ལྟ་སྐུལ་དོ་དམ་ནང་རྐྱེན་འཐུས་ཚང་དུ་བཏང་ནས་ཟས་རིགས་བདེ་འཇགས་འཐབ་ཇུས་ཤུགས་ཆེན་པོས་ལག་བསྟར་བྱ་དགོས། ཟས་རིགས་བདེ་འཇགས་དོ་དམ་ཨུ་ཡོན་ལྷན་ཁང་གི་གཅིག་གྱུར་མགོ་ཁྲིད་དང་ཟས་རིགས་བདེ་འཇགས་གཞུང་སྒྲུབ་ཁང་གི་ཕྱོགས་བསྡུས་མཐུན་སྦྱོར་ནུས་པ་འདོན་སྤེལ་གང་ལེགས་བྱས་ནས། མགོ་ཁོངས་ནས་ཚོད་འཛིན་བྱེད་པ་དང་ཐོན་སྐྱེད་བདག་གཉེར་གཙོ་གནད་དུ་འཛིན་པ། ཚབ་མཚོན་རང་བཞིན་གྱི་གནད་དོན་གཙོ་བོ་ལེགས་བཅོས་བྱེད་པ། གོ་རིམ་སོ་སོ་དང་ཕྱོགས་སོ་སོའི་འོས་འགན་ལག་བསྟར་རྒྱུན་འཁྱོངས་བྱས་ཏེ། ལྟ་སྐུལ་འགན་ནུས་མཐོར་འདེགས་བྱེད་པ་དང་སྤྱི་ཚོགས་ཡོངས་ཀྱི་ཐུན་མོང་ལེགས་བཅོས་ནུས་ཤུགས་གཅིག་ཏུ་བསྡུས་ནས། ཟས་རིགས་བཙོག་བཟོའི་གནད་དོན་སྔར་ལས་ལེགས་བཅོས་བྱེད་པ་དང་། ཟས་རིགས་བདེ་འཇགས་གནས་བབ་རྒྱུན་མཐུད་ནས་ལེགས་བཅོས་བྱེད་པར་སྐུལ་འདེད་བཏང་སྟེ། མི་དམངས་མང་ཚོགས་ཀྱི་ཡིད་ཚིམ་ཚད་དང་ཐོབ་ཚོར་རྒྱུན་ཆད་མེད་པར་ཇེ་མཐོར་གཏང་དགོས་ཞེས་བསྟན།།
