ཁང་པའི་དཀྱིལ་དུ་འཁྱག་རོམ་སྔོན་པོ་བབས།།
སྙིང་རྗེའི་མིག་ནང་ཆུ་ཐིགས་བསོགས་པའི་མཐར།།
སྔོན་གྱི་གངས་རི་ལས་ལ་གཏོགས་སོ་སྙམ།།
ཞག་སྨད་རྨི་ལམ་སྣེ་མོ་གཉིས་སུ་གྱེས།།
གཅིས་གིས་རི་མོ་འབྲི་ཞིང་གཅིག་གིས་བསུབ།།
སྐབས་ཤིག་འོ་བྱེད་རྒྱང་རིང་ཁུར་ནས་འོང་།།
མདུན་རྒྱབ་གཉིས་ནས་རྟ་དཀར་མང་པོ་འདྲོགས།
སླད་མར་སྣང་ཚད་གྲིབ་མ་མི་དམིགས་པས།།
མེ་ལོང་ས་ལ་བརྡབ་དགོས་བློ་ཡང་ཤར།།
གཅིག་གིས་ཉིན་གྱི་མིག་ལ་གཙང་བོ་འདྲེན།།
ཚེ་ཡི་མུ་ཏིག་འཚེར་ཡང་ཅི་ཞིག་རུང་།།
གངས་རི་གྱོན་པའི་སེང་གེའི་ངག་སྒོ་འདར།།
གཅིས་གིས་མཚན་མོའི་ཞིང་ཁར་ནས་ཆང་བསྙལ།།
དེ་ནས་ཁྲུང་ཞུ་མ་ཡི་ལན་བུའི་འོད།།
རང་སར་མི་སྡོད་སྨུག་པའི་རྗེས་སུ་འཕུར།།
གར་འོང་མེད་པའི་སྤྲིན་སྟེང་དཀྱིལ་དྲུང་བསྡད།།
ལོ་བརྒྱའི་སྡིག་སྒྲིབ་བ་གམ་རས་གྱིས་བཏུམ།།
སྐམ་ཞིང་རིད་པའི་ངོ་གདོང་ཕྱེད་ཀ་ལ།།
འཁོར་བའི་ལྷིང་འཇགས་འབྲི་ཞིང་རྒྱ་སེ་ཡིས།།
མཚན་མོ་བརྒྱན་ཞིང་མཇུག་མཐའི་མུན་ནག(1)ནང་།།
ཞག་སྨད་ཅིག་གི་རྨི་ལམ་གསལ་བར་བྱས།།
མཆན(1)མཇུག་མཐའི་མུན་ནག་ནི་ནམ་ལངས་ཁའི་དུས་སྐབས་ལ་གོ་དགོས།
