སྤྱི་ཟླ་6པའི་ཚེས་10ཉིན།  རྒྱལ་ཡོངས་ཀྱི་ཆེས་ཐོག་མའི་རིག་གནས་དང་རང་བྱུང་ཤུལ་བཞག་གི་ཉིན་མོའི་སྐབས་འདིར། གཟི་ཚ་སྡེ་དགུ་རྫོང་གིས་གཟི་ཚ་སྡེ་དགུའི་མཛེས་ལྗོངས་ཁུལ་དུ་མངོན་མིན་རིག་གནས་ཤུལ་བཞག་སྟེ་རྒྱུན་འཛིན་འཕེལ་རྒྱས་ཀྱི་གསོན་ཉམས་ལྡན་པའི་ལག་ལེན་ཞེས་པའི་མངོན་མིན་རིག་གནས་ཀྱི་འགྲེམ་སྟོན་བྱེད་སྒོ་སྤེལ་བས།  རྒྱ་ཆེ་བའི་ཡུལ་སྐོར་བའི་མིག་ལམ་དུ་ས་གནས་ཀྱི་ཁྱད་ཆོས་ལྡན་པའི་མངོན་མིན་རིག་གནས་ཤུལ་བཞག་གི་རིག་གནས་གསོལ་སྟོན་ཆེན་པོ་ཞིག་བཤམས་པ་རེད། 

        འགྲེམ་སྟོན་གྱི་ཡུལ་དངོས་སུ་ལྟད་མོ་བ་མང་པོ་ཞུགས་པ་དང་གཟི་ཚ་སྡེ་དགུ་རྫོང་གིས་མངོན་མིན་རིག་གནས་ཤུལ་བཞག་གི་འགྲེམ་སྟོན་གྱི་གོ་སྐབས་དང་བསྟུན་ནས་རྣམ་གྲངས་5མཉམ་ཞུགས་བྱས་ཤིང་།  སྙན་འཇེབས་ལྡན་པའི་པི་ཝང་དཀྲོལ་བ་དང་གནའ་ཉམས་ལྡན་ཞིང་ངོ་མཚར་ཆེ་བའི་བྲོ་གར་འཁྲབ་པ།  སྟངས་སྟབས་ཀྱིས་ཕྱུག་པའི་རྩྭ་སྒྲོན་ཞབས་བྲོ་འཁྲབ་པ་སོགས་ཀྱིས་ཡུལ་སྐོར་བ་དུ་མའི་མིག་དབང་ཅིག་ཅར་དུ་འཕྲོག 

        ཝུན་ཀྲོའུ་ནས་ཡོང་པའི་རུས་ལིའུ་ཅན་གྱི་བུད་མེད་དེས་འགྲེམ་སྟོན་ཡུལ་དངོས་སུ་ཁ་པར་གྱིས་བརྙན་ལེན་ཞོར་དེ་རིང་མིག་རྒྱ་བསྐྱེད་བྱུང་།  མཛེས་ལྗོངས་ཁུལ་དུ་མ་སོང་བའི་སྔོན་དུ་ས་གནས་ཀྱི་ཁྱད་ཆོས་ལྡན་པའི་འཁྲབ་སྟོན་དང་མི་རིགས་ཀྱི་ཁྱད་ཆོས་ལྡན་པའི་ལག་ཤེས་བཟོ་ལས་མང་པོ་མཐོང་བྱུང་།  ངས་འདི་ལ་དོན་སྙིང་གལ་ཆེན་ཡོད་པར་འདོད་ལ།  དགའ་ཞེན་ཡང་ཆེན་པོ་ཡོད་ཅེས་ཟེར།

        འགྲེམ་སྟོན་གྱི་ཡུལ་དངོས་སུ།  འགུལ་རྣམ་གྱི་འཁྲབ་སྟོན་ལས་གཞན་ལྷིང་འཇགས་རྣམ་པའི་འགྲེམ་སྟོན་ཡང་ཡོད་ལ།  བྱམས་པའི་རིག་གནས་དང་བོད་དམག་གི་ཚེམ་དྲུབ།  ནན་ཕིང་གི་པི་ཝང་བཟོ་རྩལ་སོགས་སྲོལ་རྒྱུན་གྱི་ལག་ཤེས་བཟོ་ལས་མང་པོ་བཤམས་པ་དང་།  ཚེམ་དྲུབ་ལས་མཆོག་ཏུ་གྱུར་པའི་བཟོ་རྩལ་གྱི་རྣམ་པ་མངོན་ཐུབ།  

        གཟི་ཚ་སྡེ་དགུ་རྫོང་གི་ཀུའོ་ཡོན་གྲོང་ཚོའི་དམངས་ཁྲོད་སྒྱུ་རྩལ་པ་ཀྲའོ་ཡུང་ཕིང་གིས་བོད་དམག་གི་ཚེམ་དྲུབ་ཀྱི་རྒྱུད་རིམ་ལྟད་མོ་བའི་མིག་ལམ་དུ་བཤམས་ཤིང་འདི་ནི་བོད་དམག་གི་ཚེམ་དྲུབ་རེད།  ཚང་མ་ལག་བཟོ་བྱས་པ་རེད།  འདི་ནི་མེས་པོ་ཚོས་ང་ཚོ་ལ་གནང་པའི་ཅ་ལག་རྩ་ཆེན་ཞིག་རེད།  ངས་ད་ལྟ་དྲུབ་བཞིན་པ་འདི་ནི་ང་ཚོ་བོད་དམག་བའི་གྱོན་གོས་རེད།  ཡག་པོ་ཨེ་འདུག་ཅེས་སྐུ་མགྲོན་དག་ལ་དྲིས།  

        མཛེས་ལྗོངས་ཁུལ་དུ་རིག་གནས་འགྲེམ་སྟོན་བྱས་པ་ལས་གཞན་གཟི་ཚ་སྡེ་དགུ་རྫོང་གིས་མངོན་མིན་རིག་གནས་ཤུལ་བཞག་སློབ་གླིང་དང་གནའ་གྲོང་དུ་བསྐྱོད་པ་ཞེས་པའི་བྱེད་སྒོ་སྤེལ་བ་རེད།  དུས་མཚུངས་སུ།  སྤྱི་ཟླ་6པའི་ཚེས་10ནས་18བར།  རྫོང་དེས་དོམ་ཁྲའི་སྐོར་བྲོ་(དོམ་བྲོ།)དང་བྲོ་འབག་བཟོ་བའི་ལག་རྩལ།  གཟི་ཚ་སྡེ་དགུའི་བྱམས་པ་སོགས་མངོན་མིན་རིག་གནས་ཤུལ་བཞག་གི་རྒྱུད་འཛིན་པ་རྩ་འཛུགས་བྱས་ནས་སྐབས་དྲུག་པའི་ཁྲེང་ཏུའུ་རྒྱལ་སྤྱིའི་མངོན་མིན་རིག་གནས་ཤུལ་བཞག་གི་འགྲེམ་སྟོན་དུས་ཆེན་དུ་ཞུགས་པ་རེད།  

        རྒྱུས་ལོན་བྱུང་བར་ལྟར་ན།  མིག་སྔའི་བར།  གཟི་ཚ་སྡེ་དགུ་རྫོང་གིས་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་4དང་ཞིང་ཆེན་རིམ་པའི་རྣམ་གྲངས་4  ཁུལ་རིམ་པའི་རྣམ་གྲངས་28དང་རྫོང་རིམ་པའི་རྣམ་གྲངས་44བཅས་བདེ་ལེགས་ངང་ཡར་ཞུ་བྱས་ཟིན་པ་དང་།  གཙོ་བོ་སྲོལ་རྒྱུན་གྱི་ལག་ཤེས་བཟོ་ལས་དང་དམངས་ཁྲོད་རོལ་དབྱངས།  དམངས་ཁྲོད་རྩོམ་རིག་དང་དམངས་སྲོལ་སོགས་ཀྱི་མངའ་ཁོངས་སུ་གཏོགས།  དེ་དང་མཉམ་དུ།  མངོན་མིན་རིག་གནས་ཤུལ་བཞག་འདི་དག་བདེ་བླག་ངང་ཡར་ཞུ་ཐུབ་པ་དེས།  ས་གནས་དེའི་དམངས་སྲོལ་རིག་གནས་ཤུལ་བཞག་སྲུང་སྐྱོབ་བྱེད་པར་སྐུལ་འདེད་དང་རིག་གནས་ཡུལ་སྐོར་ཟུང་འབྲེལ་མངོན་འགྱུར་བྱེད་པ།  རིག་གནས་དར་བའི་རྫོང་དུ་གྱུར་པ་དང་ཁྱབ་ཁོངས་ཡོངས་ཀྱི་ཡུལ་སྐོར་འཕེལ་རྒྱས་ཇེ་མགྱོགས་སུ་གཏང་བར་རྨང་གཞི་བརྟན་པོ་བཏིངས་པ་རེད།།