སྐྱེ་བོ་དག་ཞི་འཇགས་ཀྱིས་བལྟམས་པའི་ཕོ་བྲང་དམར་པོར་ཞེད་ནས།
སྦས་དོན་ཟབ་པའི་རི་བོ་གཅིག་ཡིད་འགུལ་ཐེབས་པའི་ཚུལ་གྱིས་བསྒོམས།
མཚན་ཐུན་གཅིག་གི་རྨི་ལམ་དུ་ཉི་འོད་འཕྲོས་ཚུལ་གྱིས།
འགྱོད་གདུང་བྲལ་པའི་རང་ཉིད་ཀྱི་མིག་ཟུང་བསྟན་པར་བྱས།
རླབས་རིས་འཕྱོ་བའི་ཆུ་བོ་འདི་དལ་བུར་སྒུལ་དུས།
སྐྱེ་བོ་དག་རྨི་ལམ་ཁྲོད་ཀྱི་རང་ཉིད་འཇིག་པར་དོགས་ནས།
རྟོག་པས་བཏགས་པའི་ཚེ་སྲོག་གི་གསང་བ་ཁྱེར་ཏེ་ནགས་ཀྱི་མཐའ་རུ་རྒྱུག
ཤེལ་ཕོར་སྟོང་བ་ལ་ལག་པས་རེག་བཞིན་གསོན་འདོད་ཀྱི་རེ་བ་དྲག་ཏུ་འཕྱུར།
ཤིན་ཏུ་ཟབ་པའི་ཐ་སྙད་ཁ་ཤས་རུམ་དུ་བཅུག་ནས།
སྐྱེ་བོ་དག་དཔུང་བསྒྲིགས་ཏེ་རང་གི་གྲིབ་གཟུགས་ཀྱི་གཙང་བོ་བརྒལ་དུས།
ཟླ་དྲུག་པའི་ཉི་འོད་ཀྱི་འོག་ནས་འཚར་བའི་བདག་གི་ཕྱེ་མ་ལེབ།
ཚིག་གི་ཕྲེང་བའི་གསེབ་ཀྱི་གཏམ་རྒྱུད་ཅིག་ཏུ་གྱུར།
ཀེང་རུས་ཐོག་གི་བྱེ་རྡུལ་རླུང་འཚུབ་ཀྱིས་སྤུར་བ་ན།
གངས་འདབས་ཀྱི་རི་གྲོང་གཙང་བོའི་གཡས་གཡོན་ནས་ལྷོད་ཀྱིས་འཐོར།
སྐྱེ་བོ་དག་གིས་ཧ་ཅང་གཟབ་ནན་ངང་རང་གི་རྒས་གཉེར་བགྲང་ཡོང་དུས་སུ།
ངས་སྒྱུ་མའི་མཛེས་སྡུག་གི་ཕོ་བྲང་ཡིད་ལ་སྒོམ་བཞིན།
འཇིག་རྟེན་འདི་ཉིད་ཀྱི་སྤྲོས་བྲལ་རང་གི་བགོ་སྐལ་དུ་བཤམས།
གདོད་མའི་དུས་ཀྱི་ཕོ་བྲང་གི་ཐབ་ཁུང་ལས།
སྐྱོ་སྣང་ལྟ་བུའི་མེ་ལྕེ་དམར་ལམ་ལམ་འབར་ཅིང་ཐལ་བ་རླུང་གིས་སྤུར་དུས།
ཁོ་ཚོས་མེ་ལྕེ་ལྟ་བུའི་རང་ཉིད་ཀྱི་འཇིགས་པ་ཐལ་མོ་དང་མཉམ་དུ་ཕྱིར་དཔྱངས་ནས།
སྐྱེ་བ་ཕྱི་མ་འདས་དོན་གྱི་ནོར་འཁྲུལ་ཇི་བཞིན་བསྒོམས་པར་བྱས།
འཚང་ག་དེའི་ཁྲོད་ན།
རི་སྒང་གི་དར་ལྕོག་དེས་ལག་བརྡའི་ཚུལ་གྱིས་ཁྱོད་ལ་གཡབ་མོ་བྱེད་ཚེ།
ཁོ་ཚོ་ནི་རྟབ་རྟབ་པོར་ཉི་འོད་དང་ལྷན་དུ་རྒྱང་ལ་ཆས་ཟིན།
མེ་ལོང་ལ་སྦྱོར་བའི་ཁྱོད་ཀྱི་རང་གཟུགས་ངོ་མ།
དོན་དུ་དུར་ཐོད་ལས་འཁྲུངས་པའི་འཇག་མ་དེས་བཀྱིགས་ཚར་ཡོད་དེ།
འུ་ཅག་གིས་ཡར་སྔོན་ནས་ལྷ་ཁང་གི་ཕུགས་སུ་བྲིས་པའི་གསང་ཡིག་དག
ཕྲེང་བ་ཐོགས་པའི་བགྲེས་པོ་ཞིག་གིས་འཆད་པར་བྱའོ།
བགྲེས་པོ་དེས་ཕྲེང་རྡོག་རེ་རེ་ཐོད་གཉེར་དང་གྲངས་མེད་པར་བཟོས་ཤིང་།
བྱེ་མའི་ཐང་གི་རྐང་རྗེས་རེ་རེ་ལ་ཕྲེང་རྡོག་རེ་བཏབ་ཚེ།
འུ་ཅག་གིས་ཕན་ཚུན་བརྩེ་བའི་ངང་མིག་ཟུང་ཕྱེས་པ་དེའང་།
ཁྱོད་ཀྱི་རྨི་ལམ་འཁྲུགས་དུས་ཀྱི་རྡོ་བ་འཁྱག་པོ་དེ་ཡིན་འོས་ཏེ།
དཔྲལ་བ་ལས་འཛག་པའི་དངུལ་ཆུ་ཐིགས་པ་གཅིག་གིས།
ཁྱོད་ཉིད་གཏན་ནས་གཏན་དུ་གཉིད་ཆག་པ་མེད་པར་བྱའོ།
སེམས་པའི་སྦུབས་སུ་བརྐོས་པའི་གསང་བ་རིང་དུ་དོར་ནས།
ཤིན་ཏུ་ཟབ་པའི་སྨག་རུམ་གྱི་མཚན་མོ་ཁོ་ན་ལུས་ཀྱིས་བརྒལ་ཏེ།
ནམ་ཞིག་བདག་གི་སྙིང་ཁ་རུ་ཁྱོད་ཉིད་གསར་དུ་འཁྲུངས་ཚེ།
བགྲེས་པོའི་ངག་སྒོ་ལས་འཕེལ་བའི་གཏམ་རྒྱུད་དག
སླར་ཡང་གསང་བའི་བདག་པོས་རུམ་དུ་བཅུག་པ་སུ་ཡིས་རྟོགས།
ཁོ་རང་མཐོང་ཙམ་ཉིད་ནས་ཡལ་སོང་བ་དེས།
བར་སྣང་ཁོ་ནར་གཟིགས་པའི་ཁྱོད་ཀྱི་སྤྱན་མིག་དེའང་།
རི་སྒང་གི་དར་ལྕོག་བཞིན་ཚམ་ཚོམ་མེད་པར་གཡོ་སྒུལ་བཏང་སོང་སྟེ།
སྐྱོ་གླུ་ཚན་པ་ཞིག་གིས་ཁྱོད་ཉིད་ཀྱི་འདོད་པ་ལྟར་གྱི་ལམ་བཟོས་ཤིང་།
འུ་ཅག་ཕན་ཚུན་འཛུམ་རེ་སྟོན་བཞིན་དེ་ལྟར་ལམ་དུ་ཞུགས་སོ།
མཁར་བྲོང་གི་གྱང་ཤུལ།
ནམ་མཁའ་དང་བར་སྣང་མེད་པར་རིང་དུ་བལྟས་ཚེ།
འགུལ་མ་ཐུབ་པའི་སྤྲིན་པ་ཞིག་གི་ཕུང་པོ་ཆེན་པོ།
བྱ་གླག་གི་གཤོག་ཟུང་ལས་གོས་སྲུབས་ལྟར་འཐོར་རྗེས།
ཤུལ་དུ་ལུས་པའི་མཁར་བྲང་གི་གྱང་རལ་རེངས་པོ།
གཉེན་མི་མང་པོའི་ཨ་ཡས་རྒན་མོ་ཞིག་ཤི་དང་མཚུངས་ཏེ།
བུ་དང་བུ་མོ་ཚ་བོ་དང་ཚ་མོས་ཡོངས་སུ་བསྐོར་ཏེ་ངུ་བར་བྱེད་དོ།
ལོ་རྒྱུས་ནང་དུ་མ་ཤོང་པའི་སྒེའུ་ཁུང་ཆེ་ཆུང་།
དམུས་ལོང་དག་འཛུལ་སའི་གསང་སྤྱོད་ཁང་གི་སྒོ་ཆེན་དུ་གྱུར་དུས།
གླུ་དབྱངས་ལ་དགའ་བའི་བྱིས་པ་དག་ཆེ་མདོག་སྒོས།
མི་གཙང་བ་གང་དེ་ས་འོག་ཏུ་སྦེད་པར་བྱེད།
རྩྭ་གསེབ་ནས་འཐུལ་བའི་ཀེང་རུས་ཀྱི་དྲི་ངན་ནོ་ཅོག
ལྷ་མོ་ཞིག་གི་ལུས་ཐོག་ནས་འཐོར་པའི་སྤོས་དྲི་ཞིག་ཏུ་རློམ་ཡོད་དེ།
མིག་ཆུ་གཏོང་མཁན་ནི་གཉེར་མས་འཁུམ་པའི་མི་དེ་དག་གོ།
མེས་པོ་དག་གི་སྐྲ་ཕུད་རིང་པོ་གྱང་གསེབ་ཏུ་ཐིམ་རྗེས་ལྕང་མ་ཞིག་ཏུ་གྱུར།
གལ་ཏེ་འདབ་ལོ་རྒྱས་པའི་ལྕང་མ་དག་ཕྱིར་གནག་སྣུམ་གྱི་སྐྲ་རུ་འགྱུར་སྲིད་ན།
ང་དང་ཁྱོད་ཀྱིས་བཞེངས་པའི་འོད་སྣང་གི་ཕོ་བྲང་དཀར་པོ།
སྡེ་མི་ཚོའི་རྐང་འོག་གི་སྲིན་འབུ་ཞིག་ཏུ་གྱུར་ཏེ་ནག་ཡོ་གེར་ལུས།
