དབེན་པ།

                         སྤྱང་གུ་རུ་འཇིགས་མེད།（དཀར་མཛེས）

ཟིལ་བའི་རྒྱ་མཚོར་འབྱར་བའི་རྣམ་ཤེས་འདི།།
རེ་དོགས་རླུང་གིས་ཟད་པའི་དར་ལྕོག་བཞིན།།
བྱེ་མའི་ཐང་ཆེན་ཞིག་གི་མགྲོན་པོ་ཡིན།།
ཚོགས་དྲུག་གཟེབ་ལ་ཚུད་པའི་བྱིའུ་བཞིན།།
རེག་བྱའི་འདམ་དུ་ཚུད་པའི་གླང་བོ་ཡིན།།
སེམས་ཀྱི་རོལ་དབྱངས་འཚོལ་བའི་སྟ་གོན་གྱིས།།
སྤྲིན་དཀར་རྒྱ་མཚོའི་ཀླད་དུ་སྐྱིལ་དྲུང་གིས།།
གཤོག་པ་སྤྲུག་སྤྲུག་བྱས་ནས་ཁྲུས་ལ་རོལ།།
དྭངས་གཙང་ནམ་མཁའ་འདྲ་བའི་རྩྭ་ཐང་ནས།།
སེམས་ཀྱི་གས་ཆག་བསུབ་སྟེ་ངལ་ཞིག་གསོས།།
དབེན་པའི་གནམ་ས་འདི་ནི་དྭངས་ཤིང་གཙང་།།
ཚོར་བའི་སྨུག་པ་སེལ་བའི་རླུང་བུ་རྒྱུ།།
མུན་པའི་ནགས་ཚལ་སྟུག་པོའི་ལྕགས་རི་ལ།།
སྣང་བའི་འོད་ཟེར་འགྱེད་པའི་མེ་ལྕེ་གཡོ།།
སེམས་ཀྱི་རི་མོ་ཡིན་པའི་རི་བོ་དག །
རི་སུལ་ནམ་མཁའ་དེ་ལ་ག་ལེར་དྭངས།།
ཆར་བའི་ཟོལ་གྱིས་འབབ་པའི་འོད་ཟེར་གྱིས།།
རི་ཁྲོད་རྒན་པོས་ཡང་ཡང་བྱབས་ཁྲུས་བྱས།།