ཚོར་བའི་རླུང་ལྷ།
འདམ་འཇིལ་ལི།（མཚོ་ནུབ）
བཤད་ནས་ཚར་རྒྱུ་མེད་པ་དེ
རླུང་ལ་བསྐུར
བསྒུགས་ནས་ཐོན་རྒྱུ་མེད་པ་དེ
འོད་དུ་བཏགས
ཉན་ནས་གོ་རྒྱུ་མེད་པ་དེ
རྣ་ལ་བརྫངས
སེམས་པ་དམར་རྗེན་མ་རྐྱང་རྐྱང
མཁོ་དགུའི་དོང་ལ་འཕངས
ཆགས་སྡང་གིས་ཡང་ཡང་བཏུམས་པའི་ནང་སེམས་དེ
རླུང་གིས་བཤིག
སིལ་བུར་གཏུབས་པའི་སེམས་པ་ཧྲལ་པོ་དག
རླུང་གིས་ཁུར
རྣམ་དག་གི་ཕུགས་བསམ་ཞེས་པ་དེ་ལ
རླུང་གིས་ང་རོ་སྦྱར
སེམས་ཚོར་གྱིས་སྤྲུགས་པའི་རྣམ་ཤེས་དེ
རླུང་གི་སྲོག་ཏུ་ཞུགས
ལོ་ཟླ་ཡི་གསེབ་ཏུ་གཡེང་བའི་སེམས་པ་དེར
རླུང་གི་གཤོག་པ་སྤྲད
ལོ་རྒྱུས་ཀྱི་ཕུགས་སུ་ཡིབ་པའི་གཏམ་རྒྱུད་དེ
རླུང་ལྷའི་རྣ་ལམ་དུ་འུར་འུར་བསྒྲགས སིང་སིང་གྱེར
རླུང་བར་མེད་དུ་གཡུགས་ཏེ་མེ་ལྕེ་དགུང་ལ་གཏད
སྲིད་གསུམ་བསྒྱུར་བའི་སྤོབས་པའི་མེ་དཔུང་དམར་པོ་དེ་ཡང
བར་སྣང་ཁམས་ནས་རླུང་ལྷས་བདག་ཏུ་བཟུང
2017.5.28ལ་བྲིས།
