ཧོར་པོའི་ལག་ཤེས་བཟོ་ལས་དེ་དར་སོང་།

དམངས་ཁྲོད་ངོ་མཚར་ཟློས་གར་དེ་མཛེས་སོང་།

ཧོར་པོ་ལག་ཤེས་བཟོ་ལས་དང་འབྲེལ་ཡོད་ཀྱི་དམངས་ཁྲོད་ཀྱི་ཟློས་གར།

        ཧོར་པོ་ལག་ཤེས་བཟོ་རྩལ་གྱི་ཐོན་རྫས་ནི་དུས་རབས་ཀྱི་འགྲོས་དང་བསྟུན་ཏེ་འགྱུར་བ་འགྲོ་བཞིན་ཡོད་པ་ཇི་བཞིན། དེ་ཡང་དམངས་ཁྲོད་ཀྱི་ལག་ཤེས་བཟོ་རྩལ་ཕུན་སུམ་ཚོགས་པ་ཞིག་དུས་ཀྱི་དགོས་མཁོ་ཡི་དབང་གིས་ཆོས་ལུགས་རིག་གནས་ཀྱི་ཁྱབ་ཁོངས་སུ་དགོས་མཁོ་ཆེ་བར་གྱུར་ཡོད།

མཆོད་པའི་ཡོ་བྱད།

        དེ་ཡང་གོ་གླུ་ཞེས་པའི་དམངས་ཁྲོད་ཀྱི་ཟློས་གར་འདི་ནི་ཁམས་དཔལ་ཡུལ་རྫོང་ཞབས་ཀྱི་རྙིང་མའི་དགོན་ཆེན་ཤར་རྒྱལ་བ་ཀཿཐོག་དགོན་པའི་ཐུན་མོང་མ་ཡིན་པའི་ཟོར་འཆམ་ཞིག་ཡིན། ད་བར་དུ་འཆམ་འདི་དར་ནས་ལོ་ངོ་བརྒྱ་ཕྲག་དུ་མ་སོང་ཡོད། དེ་ཡང་ཐོག་མར་འཆམ་འདི་དགོན་པའི་དགུ་གཏོར་ཆེན་མོ་དང་བསྟུན་ནས་དགྲ་བགེགས་དང་རྐྱེན་ངན་བར་ཆད་དག་བསྒྲལ་བའི་ཕྱིར་དུ་ལོ་ལྟར་རྒྱུན་མ་ཆད་པར་འཆམ་སྲོལ་ཡོད། དེ་བཞིན་དུ་གོ་གླུ་འདི་ཡང་ཁམས་དཔལ་ཡུལ་ཧོར་པོའི་ལག་ཤེས་བཟོ་རྩལ་དང་འབྲེལ་བ་ཆེན་པོ་ཡོད་དེ། འཆམ་འདིས་གཙོ་བོ་གླིང་གི་དཔའ་རྒྱ་ཚ་ཞལ་དཀར་དང་ཁོང་གི་རྟ་ཕོ་རྒྱ་བྱ་སོག་དཀར་དང་། གྲི་ཡ་ཟི་སྐར་ཕྲན། ཁྲབ་རྨོག་སོགས་ལ་རྣམ་བཤད་བྱས་ཏེ་མགར་ལས་ཕྱོགས་ཀྱི་རིག་གནས་དག་ཕུན་སུམ་ཚོགས་པའི་སྒོ་ནས་མིག་མདུན་དུ་མངོན་ཡོད་དོ། །
        གོ་གླུ་འཆམ་མཁན་ནི་ཀཿཐོག་དགོན་པའི་ཆོས་སྡེ་ཐོག་མ་པད་ལུང་སྡེ་བའི་ཆེས་སྤྱི་བཏང་གི་སྡེ་མི་སེར་རྣམས་ཀྱིས་འཆམ་ཞིང་། སྡེ་མི་སེར་དག་གི་ཆས་སྤྲོས་ནི་ལག་གཡས་པས་རལ་གྲི་འཛིན། གཡོན་པས་ཕུབ་བཟུང་བ། ལུས་ལ་ཁྲབ་གོན་པ་དང་། མགོ་ལ་རྨོག་གྱོན་པའི་ཁྲབ་རྨོག་འཁོར་གསུམ་སྐོར་བའི་གོ་པ་བཅུ་དྲུག་གིས་གྲུབ་པའི་གོ་མཚོན་ཅན་གྱི་འཆམ་ཞིག་ཡིན།

གསེར་སྒ་ཉི་མ་རང་ཤར།

        འཆམ་ཡིག་ལས། གོ་གླུ་གོ་བཤད་དཔའ་བོའི་གད་རྒྱངས་ལ། ཐོག་མར་ར་མདའ་སྦྲན་པའི་གླུ་ནི། གོ་པ་རྣམས་ཡར་མར་གཉིས་ནས་འོང་བའི་གོང་མ་རྣམས་ཀྱིས། འོ་འོ་འོ། ལྷ་བསྭོ་བསྭོ་དཀོན་མཆོག་གསུམ་པོ་བསྭོ། དུས་དེ་རིང་བདག་གི་གྲོགས་ལ་བྱོན། ལན་དུ་འོག་མས་ངག་ལྟ་གོང་བཞིན་བྱས་ལ། འོ་འོ་འོ། ལྷ་བསྭོ་བསྭོ་ཡི་དམ་ལྷ་ཚོགས་བསྭོ། ལས་ངན་པའི་སེམས་ཅན་བསྒྲལ་དུ་གསོལ། གོང་མས། འོ་འོ་འོ། ལྷ་བསྭོ་བསྭོ་ཆོས་སྐྱོང་སྲུང་མ་བསྭོ། དུས་དེ་རིང་བསྟན་དགྲ་ཟས་སྐལ་བཞེས། འོག་མས། འོ་འོ་འོ། ལྷ་བསྭོ་བསྭོ་ཡུལ་ལྷ་གཞི་བདག་བསྭོ། དུས་དེ་རིང་བདག་ལ་སྡོང་གྲོགས་མཛོད། ལིང་གའི་ཡར་མར་འཛིང་ཚུལ་བྱས་ནས། ཡར་མར་གོ་དཔོན་གཉིས་གྲལ་མགོ་ཕྱོགས་གཅིག་ཐད་དུ་ཡོད་པའི་གོ་འགྲོས་བྱེད་བཞིན། ལས་བཞིའི་གྲལ་བསྡེབ་ནི། དྲི་བ། ཡ་ཁོ་རེ། དཀར་པོ་གསུམ་གྱི་གྲལ་འགྲིག་འདི་གང་ཡིན་པར་ཤོད་ཁོ་རེ། གོང་མས་ལན་དུ། ཡ་ཁོ་རེ། དཀར་པོ་གསུམ་གྱི་གྲལ་འགྲིག་འདི། མགོ་རྨོག་དཀར་དར་འཕྲུ་དཀར་དང་གཅིག དཔའ་རྒྱ་ཚའི་ཞལ་ངོ་དཀར་དང་གཉིས། ཕྱག་མཐེ་བོང་བ་སོ་དཀར་དང་གསུམ། དཀར་པོ་གསུམ་གྱི་གྲལ་འགྲིག་འདི། གྲལ་བསྡེབ་ལེ་མ་ཡིན་འགྲིག་ལེ་ཡིན་ཁོ་རེ། འོག་མས་ཡར་དྲི་བ་སོགས་འདྲེས། ཡ་ཁོ་རེ། སེར་པོ་གསུམ་གྱི་གྲལ་འགྲིག་འདི་གང་ཡིན་པ་ཤོད་ཁོ་རེ། ལན་དུ། ཡ་ཁོ་རེ། སེར་པོ་གསུམ་གྱི་གྲལ་འགྲིག་འདི། མགོ་རྨོག་དཀར་འདབ་ར་གསེར་ལས་བྱས། རྒྱབ་ཁྲབ་དཀར་གཤོག་བཞི་གསེར་ལས་བྱས། རྟ་འདོ་བའི་ཡོབ་ཆེན་གསེར་ལས་བྱས། སེར་པོ་གསུམ་གྱི་གྲལ་འགྲིག་འདི། གྲལ་བསྡེབ་ལེ་མ་ཡིན་འགྲིག་ལེ་ཡིན་ཁོ་རེ། དྲི་བར། ཡ་ཁོ་རེ། དམར་པོ་གསུམ་གྱི་གྲལ་འགྲིག་འདི་གང་ཡིན་པར་ཤོད་ཁོ་རེ། ལན་དུ། ཡ་ཁོ་རེ། དམར་པོ་གསུམ་གྱི་གྲལ་འགྲིག་འདི། དཔའ་རྒྱ་ཚའི་སྤྱན་རྩ་དམར་དང་གཅིག མདའ་ཉག་ཕྲན་གཏོང་ཁ་དམར་དང་གཉིས། གཞུ་འཁྱོག་དཀར་མཆོང་བཟུང་དམར་དང་གསུམ། དམར་པོ་གསུམ་གྱི་འགྲལ་འགྲིག་འདི། གྲལ་བསྡེབ་ལེ་མ་ཡིན་འགྲིག་ལེན་ཡིན་ཁོ་རེ། དྲི་བར། ཡ་ཁོ་རེ། ནག་པོ་གསུམ་གྱི་གྲལ་འགྲིག་འདི་གང་ཡིན་པར་ཤོད་ཁོ་རེ། ལན་དུ། ཡ་ཁོ་རེ། ནག་པོ་གསུམ་གྱི་གྲལ་འགྲིག་འདི། མདའ་ཉག་ཕྲན་གཤོག་སྒྲོ་ནག་དང་གཅིག མཚོན་ཡ་ཟིའི་སོ་ཁ་ནག་དང་གཉིས། སྡོང་དགྲ་བོའི་སྙིང་རྩ་ནག་དང་གསུམ། ནག་པོ་གསུམ་གྱི་གྲལ་འགྲིག་འདི། གྲལ་བསྡེབ་ལེ་མ་ཡིན་འགྲིག་ལེ་ཡིན་ཁོ་རེ། མཆོག་གི་གྲལ་བསྡེབ་བཤད་པ་ནི། དྲི་བ། ཡ་ཁོ་རེ། སྨུག་པོ་གསུམ་གྱི་གྲལ་འགྲིག་འདི་གང་ཡིན་པར་ཤོད་ཁོ་རེ། ལན་དུ། ཡ་ཁོ་རེ། སྨུག་པོ་གསུམ་གྱི་གྲལ་འགྲིག་འདི། མགོ་དབུ་སྐྲའི་ལྕང་ལོ་སྨུག་དང་གཅིག རྒྱབ་ཚ་ཆུང་གཡོག་པགས་སྨུག་དང་གཉིས། སྐེད་མདོ་དྲུག་ཆབ་གདན་སྨུག་དང་གསུམ། སྨུག་པོ་གསུམ་གྱི་གྲལ་འགྲིག་འདི། གྲལ་བསྡེབ་ལེ་མ་ཡིན་འགྲིག་ལེ་ཡིན་ཁོ་རེ། ཟེར་ནས་འཛིང་ཚུལ་བྱས་ན་ལྟ་བུའོ། །

ནན་ཏན་གྱིས་སྒྲོས་གཏོང་བཞིན་པ།

        དེ་ཡང་གོ་གླུ་འདིའི་སྒྱུ་རྩལ་གྱི་རིན་ཐང་ནི་ཕུན་སུམ་ཚོགས་པ་ཞིག་སྟེ། འདི་ལ་ནང་བསྟན་གྱི་དགོན་པའི་ཆོ་ག་དང་། ལོ་རྒྱུས་ཀྱི་ཟློས་གར། དམངས་ཁྲོད་ཀྱི་གླུ་སོགས་ཀྱི་རིག་གནས་སྒྱུ་རྩལ་གྱི་རྣམ་གྲངས་སྣ་མང་འདུས་པ་ཞིག་དང་དམངས་ཁྲོད་རིག་གནས་ཀྱི་ཡང་སྙིང་ལྟ་བུ་ཞིག་ཏུ་ཆགས་ཡོད་པ་དང་། གོ་གླུའི་གླུ་ཚིག་ནི་ཕུན་སུམ་ཚོགས་པ་ཞིག་སྟེ། གླུ་ཚིག་ནང་གི་དཔལ་རྒྱ་ཚ་དང་རྒྱ་ཚའི་གྲི་སོགས་རྣམ་བཤད་བྱས་པའི་ཚིག་དག་ནི་ཧ་ཅང་སྙན་ཆ་ལྡན་པ་དང་། ཞེ་ལ་འཛིན་བདེ་བ། དམངས་ཁྲོད་ཀྱི་སྐད་ལུགས་དང་མཐུན་པ་སོགས་ཀྱི་ཁྱད་ཆོས་ཡོད་པས་རིག་གནས་འདི་མི་རབས་ནས་མི་རབས་ལ་བརྒྱུད་ཐུབ་པ་ཡིན་པར་འདོད། འདི་ལ་ཆ་མཚོན་ན། ཚད་ངེས་ཅན་ཞིག་གི་ཐོག་ནས་ཁམས་དཔལ་ཡུལ་ཧོར་པོ་ལག་ཤེས་བཟོ་རྩལ་འདི་རྒྱུད་འཛིན་བྱེད་པའི་མ་ལག་ཅིག་ཏུ་གྲུབ་ཡོད་པར་སྣང་ངོ་། །

ཆུ་རྡུག་སྤ་ཁུག

དཔལ་ཡུལ་ས་ངན་གྱི་གླུ་གར་རིག་གནས།

        ས་ངན་གྱི་གླུ་གར་ཞེས་གྲགས་པའི་འབྱུང་ཁུངས་ནི་ཕ་རྒྱུད་རིག་གནས་ལ་ཐུག་ཡོད་པ་ཡིན་ཞིང་། ཕ་ཚོ་སོ་སོ་ནང་ལ་མཐུན་སྒྲིལ་ཡོང་དགོས་པའི་ཆེད་དུ་ཚོགས་དཔོན་གྱིས་བཀོད་སྒྲིག་འོག་ཚོགས་པའི་ནང་མི་ཡོངས་ཀྱི་ཆུང་དུས་ནས་གླུ་གར་དང་གཏམ་དཔེ་སོགས་ལ་མཐོང་ཆེན་བྱས་ནས་ངག་དང་རྡོག་བྲོ་སོགས་སྦྱོང་། རིམ་བཞིན་ས་ངན་འབངས་མི་ཡོངས་ཀྱི་འཚོ་བའི་ནང་ལ་གླུ་གར་རིག་གནས་མེད་དུ་མི་རུང་བར་གྱུར། སྤྱིར་ས་ངན་ཕྱོགས་ཀྱི་ཕ་རྒྱུད་རིག་གནས་དར་ཁྱབ་ཆེ་བའི་རྐྱེན་གྱི་རིག་རྩལ་སྐོར་གྱི་རིག་གནས་ནི་ཕུན་སུམ་ཚོགས་པར་གྱུར་ཡོད། མི་རྣམས་ཀྱིས་ཐོག་མར་རྐང་པས་རྡོག་བྲོ་མ་བྱས་པའི་སྔོན་མཛུབ་མོའི་ཅོག་ཙེའི་སྟེང་རྡོག་བྲོ་སྦྱོང་བ་མཐར་ཕྱིན་པར་བྱས་པ་ཡང་ཡོད། དེའི་རྗེས་རྐང་པས་རྡོག་བྲོ་བརྒྱབ་སྟེ་ཕ་ཚོའི་བཤད་པའམ་ཡང་ན་ལོ་རྒྱུས་དང་དཔའ་ངར་སོགས་ལ་བསྟོད་བསྔགས་བྱས་ཡོད། ས་ངན་གྱི་གླུ་གར་རིག་གནས་ཕུན་སུམ་ཚོགས་པར་གྱུར་པའི་རྒྱུ་མཚན་གཙོ་བོ་ནི་ཕ་རྒྱུད་རིག་གནས་ཀྱི་རྗེས་ཤུལ་ཆེ་བའི་ས་ངན་ལུང་པའི་ནང་ལ་གཙོ་བོ་སྐོར་ཁག་སྟོབས་ཤུགས་ཆེ་ཆུང་ལ་ལྟ་དགོས་པས། གཉེན་སྒྲིག་བྱེད་རྒྱུ་དེ་གཙོ་བོ་ཕ་ཚོའམ་སྐོར་པ་ཕན་ཚུན་གྱི་སྟོབས་ཤུགས་ཆེ་རུ་ཕྱིན་པའི་རྒྱུ་རྐྱེན་ལ་དམིགས་ཡོད། སྐོར་པའི་ནང་ལ་གཉེན་སྒྲིག་གི་གོམས་སྲོལ་མེད། གཉེན་སྒྲིག་ཉིན་མོ་དེར་མག་པ་དང་བག་མའི་སྐོར་པ་བར་གླུ་གར་སོགས་ཀྱི་འགྲན་རྩོད་ཉིན་གསུམ་ལ་བྱེད་དགོས། དེ་ནས་མི་དཔོན་བླ་ཆེན་རྣམས་ཀྱིས་ཐུགས་སྤྲོ་གཏོང་བ། ལོ་དུས་རྒྱུན་ཆགས་སུ་དར་བའི་ཡུལ་ལུང་གི་དགའ་སྟོན། གནམ་ལོ་གསར་ཚེས་ཀྱི་དུས་སྟོན། མག་པ་དང་བག་མའི་གཉེན་སྟོན་སོགས་ཀྱི་སྐབས་སོ་སོའི་སྐོར་པ་ལ་གླུ་གར་ཁྲལ་སྤྲོད་དགོས། དེའི་ཕྱིར་སྦྱང་འབྲས་ཕུལ་དུ་ཕྱིན་པར་གྱུར་ཡོད།

ཁམས་པའི་ཕོ་རྒོད་ཁྱུ་གཅིག་གིས་ཞབས་བྲོ་འཁྲབ་བཞིན་པ།

        སྤྱིར་གླུ་གར་རིག་གནས་ནི་ས་ངན་ཡུལ་གྱི་དམངས་ཁྲོད་རིག་གནས་ནང་ཕུན་སུམ་ཚོགས་པའི་དམངས་ཁྲོད་རིག་གནས་ཡིན་པ་མ་ཟད་ས་ངན་ཕ་རྒྱུད་རིག་གནས་ནང་འགངས་ཆེ་བའི་སྒྱུ་རྩལ་རིག་གནས་ཀྱང་ཡིན་ལ། དེ་ནི་ལོ་རབས་མང་པོའི་ནང་ས་ངན་མི་དམངས་ཀྱི་འཚོ་བ་དང་ངལ་རྩོལ་ལས་ཐོན་པའི་དམངས་ཁྲོད་རང་བཞིན་ཅན་གྱི་སྒྱུ་རྩལ་གལ་ཆེན་ཞིག་དང་ཕ་རྒྱུད་རིག་གནས་ཞིབ་འཇུག་བྱེད་སའི་རྒྱུ་ཆ་འགངས་ཆེན་ཞིག་ཏུ་བརྩི་བཞིན་ཡོད། སྤྱིར་གླུ་གར་ལ་རིགས་སྣ་ཚོགས་དབྱེ་རྒྱུ་ཡོད་པ་དེ་ནི་སྨྲ་མི་དགོས་པ་ཞིག་ཡིན་མོད། ས་ངན་གྱི་གླུ་གར་རིག་གནས་ལ་ས་ཕྱོགས་གཞན་དང་མ་འདྲ་བའི་ཁྱད་ཆོས་ཤིག་ཡོད་པ་ནི་བོད་ཀྱི་ཕ་རྒྱུད་སྤྱི་ཚོགས་སྐབས་ནས་དར་བའི་གླུ་གར་རིག་གནས་ལ་ཤ་འདྲེས་པགས་འདྲེས་སུ་གྱུར་ཡོད། དེའི་ཕྱིར་ས་ངན་གྱི་གླུ་གར་རིག་གནས་ལ་ས་ཕྱོགས་གཞན་དང་མི་འདྲ་བའི་ཆེས་སྔ་བའི་དམངས་ཁྲོད་རང་བཞིན་ཅན་དང་བབ་ཆགས་རང་བཞིན་ལྡན། ས་ངན་གྱི་གླུ་གར་རིག་གནས་ནི་གདོད་མའི་གླུ་བྲོ་རྒྱུན་འཛིན་གྱི་ཁྱད་ཆོས་འབུར་ཏུ་ཐོན་པས། བྲོ་ཡི་འཁྲབ་སྟངས་ཀྱི་སྐོར་ནི་བདེ་ལྕག་འཁྱུག་པོ་ཡིན་ལ་དལ་འབྲིང་མགྱོགས་གསུམ་གྱི་སྒོ་ནས་འཁྲབ་སྟོན་བྱེད་པ་དང་། དབྱངས་ཀྱི་འགྱུར་ཁུགས་སྙན་ཞིང་སྟངས་སྟབས་བརྗིད་ཉམས་ལྡན་པ་ཞིག་ཀྱང་ཡིན། བྲོ་ལ་མཚོན་ན་སྲིད་པའི་ཕུགས་བྲོ་དང་གཡང་བྲོ། དཔེ་བྲོ། མགུར་བྲོ། མཐུན་བྲོ། བཤིག་འཁྱིལ་བཅས་དྲུག་ཙམ་ཡོད། བྲོ་སོ་སོའི་གོ་རིམ་ལ། བྲོའི་འགོ་མ་དང་། གཞུང་བྲོ། མཇུག་མ་སྟེ་གསུམ་གྱི་ཁོངས་སུ་མ་འདུས་པ་ཞིག་མེད་ཅིང་། ས་ངན་གྱི་གླུ་ལ་དབྱེ་ན་བྲོ་དཀྱུས་དང་གླུ་དཀྱུས། མགུར་དཀྱུས། བྱམས་པོ་སྟེ་རིགས་ཆེན་བཞི་ཡོད། གླུ་ལ་རབ་འབྲིང་ཐ་གསུམ་ཡོད་དེ་དཔེར་ན་བྱམས་པོའི་གླུ་ལ་མཚོན་ན་གླུ་ཡག་པོ་ལེན་མི་ཤེས་མཁན་རྣམས་ཀྱིས་ཨ་ལ་ཡོ་ཟེར་ནས་ངག་བཀུག་པ་ཙམ་གྱིས་འགྲིག་པ་ཡིན། དེ་ཚོའི་ཁྱད་པར་གཙོ་བོ་ནི་དབྱངས་གྱེར་སྟངས་མི་འདྲ་བ་དང་ངག་འགུག་སྟངས་སོགས་ཁྱད་པར་ཤིན་ཏུ་ཆེ། ཚིག་རྐང་དང་ཚེག་བར་མང་ཉུང་མི་འདྲ། ཚིག་གི་ནང་དོན་ཕུན་སུམ་ཚོགས་ལ་ཁྱད་ཆོས་གཙོ་བོ་ནི་ཟུར་ཟའི་ཚིག་མང་ལ་སྐབས་དེའི་སྤྱི་ཚོགས་ཀྱི་ངོས་ན་ས་ངན་ལུང་པའི་ཕ་རྒྱུད་རིག་གནས་ཀྱི་ཁྱད་ཆོས་འབུར་དུ་ཐོན་ཡོད། དེ་དག་ལ་ལྟད་མོ་བ་རྣམས་ཀྱིས་ནམ་རྒྱུན་དགའ་བསུ་ཐོབ་དང་འཐོབ་མུས་སུ་མཆིས། བྲོ་ཡི་རིགས་ཀྱི་ནང་གསེས། དང་པོ་སྲིད་པའི་ཕུག་བྲོ་ཟེར་ན་སྐལ་བ་ཡ་ཐོག་ནས་བོད་སིལ་བུར་འཐོར་པའི་བར་གྱི་ལོ་རྒྱུས་དག་ཚིག་བཅད་ཀྱི་རྣམ་པའི་ངང་དབྱངས་ལ་གྱེར་བཞིན་བྲོ་བརྡུང་བར་ཟེར། འཁྲབ་སྟོན་བྱེད་སྐབས། བྲོ་པ་ཚང་མས་ལུས་ལ་རྒྱན་ཆ་བཏགས་དགོས་ལ། བྲོ་པ་དག་རུ་ཁག་གཉིས་སུ་བགོས་ནས་དབྱིབས་གོར་གོར་བྱས་ཏེ། རུ་ཁག་སོ་སོའི་བྲོ་དཔོན་གྱིས་སྣེ་ཁྲིད་འོག་ནས་བྲོ་ཡི་དབྱངས་འགྲོས་དང་བསྟུན་ནས་འཁྲབ་སྟོན་བྱེད་པར་གཞན་དང་མི་མཚུངས་པའི་རྔམ་བརྗིད་ཟིལ་ཤུགས་ལྡན་པར་ཡོད་པ་དང་ལུས་སེམས་ཀྱི་དཀའ་དུབ་ཀྱི་སྐྱོ་བ་སེལ་ཞིང་དགའ་སྤྲོ་ཡི་བདེ་སྐྱིད་སྟེར་ཐུབ་པར་མ་ཟད་བཀྲ་ཤིས་རྟེན་འབྲེལ་གྱི་སྒོ་བརྒྱ་འབྱེད་ཅིང་། འབྱུང་འགྱུར་ལེགས་ཚོགས་ཀྱི་དཔལ་གཡང་སྤེལ་བར་བྱེད་པས་དེང་དུས་ན་གཞོན་ཕོ་མོ་རྣམས་ཀྱིས་ཉམས་པ་སླར་གསོ་དང་མ་ཉམས་གོང་སྤེལ་བྱེད་པའི་ཐུགས་ཁུར་གནང་བ་ནི་ཕྲག་ཏུ་བབ་པའི་འོས་འགན་དུ་སེམས་ཞེས་རེ་བསྐུལ་ཞུས་པ་ཡིན། །

རྡོག་བྲོ་ཆ་འགྲིག

ཡ་ཆེན་ཨོ་རྒྱན་བསམ་གཏན་གྱི་གླིང་གར།

འདན་སྲས་རྟོགས་བརྗོད་ཟློས་གར་དེ་འཕེལ་སོང་།

ཡ་ཆེན་ཨོ་རྒྱན་བསམ་གཏན་གླིང་གི་འདན་སྲས་རྟོགས་བརྗོད་ཟློས་གར་ཆེན་མོ།

        འདན་སྲས་རྟོགས་བརྗོད་ཟློས་གར་ནི་བགྲང་བྱ་བཅུ་ཕྲག་ཙམ་གྱི་ཡར་སྔོན་ལ་གསེར་རྟ་བླ་རུང་ལྔ་རིག་ནང་བསྟན་སློབ་གླིང་ནས་ཐོག་མར་སྲོལ་ཕྱེས་ཤིང་དར་བའི་གླིང་གེ་སར་རྒྱལ་པོའི་སྒྲུང་གི་ཟློས་གར་ཞིག་ཡིན་ལ། ཕྱིས་སུ་རིམ་གྱིས་ཁམས་ཕྱོགས་ཀྱི་རྙིང་མའི་དགོན་སྡེ་མང་པོ་ཞིག་ཏུ་དར། རྟོགས་བརྗོད་གླུ་གར་ཆེན་མོ་འདི་དཔལ་ཡུལ་ཡ་ཆེན་ཨོ་རྒྱན་བསམ་གཏན་གླིང་དུ་ལོ་རེའི་ཟླ་5པའི་ཚེས་13ནས་17བར་ཉིན་ལྔ་ཙམ་ལ་འཁྲབ་སྟོན་བྱེད་བཞིན་ཡོད་ལ། དེ་ནི་དགོན་པའི་སྒྲུབ་མཆོད་ཆེན་མོ་བཞིའི་གྲས་སུ་བཀོད་ཡོད་པས་ཤིན་ཏུ་གལ་ཆེན་གྱི་ཆོས་ལུགས་བྱ་འགུལ་ཞིག་རེད།

ཡ་ཆེན་ཨོ་རྒྱན་བསམ་གཏན་གླིང་།

འདན་སྲས་རྟོགས་བརྗོད་ཟློས་གར་ཆེན་མོའི་འཁྲབ་ཚན་ངོ་སྤྲོད་མདོར་བསྡུས།

        ཟློས་གར་ཆེན་མོ་འདི་ནི་ཞི་རྒྱས་དབང་དྲག་དང་མཆོག་གི་འཕྲིན་ལས་བཅས་འཕྲིན་ལས་རྣམ་པ་ལྔའི་རིམ་པ་དང་མཐུན་པར་ལེའུ་ལྔའི་སྒོ་ནས་གླིང་རྗེ་གེ་སར་རྒྱལ་པོའི་བཀའ་བློན་ཚ་ཞང་འདན་མ་བྱང་ཁྲ་མཆོག་གི་གདུང་སྲས་འདན་སྲས་གཡུ་འོད་འབུམ་མེ་ཡི་སྐུ་ཚེ་ཧྲིལ་པོའི་མཛད་པ་བརྗོད་བྱར་བྱས་ཤིང་དོན་གྱིས་འདན་སྲས་དཔའ་བོའི་སྤྲུལ་བའི་ཟློས་གར་མཁན་ཆེན་འཇིགས་མེད་ཕུན་ཚོགས་འབྱུང་གནས་ཀྱི་ཕྱི་ནང་གསང་གསུམ་གྱི་བླ་མའི་རྣལ་འབྱོར་གྱི་སྒྲུབ་མཆོད་ཡིན་པར་གསུངས། ཟློས་གར་འདི་རྣམ་པ་ཤིན་ཏུ་རྒྱ་ཆེ་ཞིང་ནང་དོན་ཕུན་སུམ་ཚོགས་པ་ཞིག་ཡིན་ཞིང་འཁྲབ་རིམ་ཡོངས་ལ་ལེའུ་ལྔ་ཡོད་དེ།

སྒེག་ཉམས་དོད་པའི་མ་སྲུ་མོ་སྨན་རྣམས།

        ལེའུ་དང་པོ། ཞི་བའི་འཕྲིན་ལས་ཀྱི་རིམ་པ་སྟེ་དེ་ལ་འཁྲབ་ཚན་གཉིས་ཡོད་དེ། འཁྲབ་ཚན་དང་པོ། རིགས་གསུམ་སེམས་དཔའི་སྒྱུ་འཕྲུལ་གར། །སྲས་ཆུང་གཡུ་འོད་འབུམ་མེ་བལྟམས། །ལྔ་བདོའི་རྒུད་པ་དབྱིངས་སུ་དྭངས། །རྫོགས་ལྡན་གསར་བའི་པད་ཚལ་བཞད། ཅེས་གླིང་གེ་སར་རྒྱལ་པོའི་བཀའ་བློན་དང་འདན་སྡེ་ཁྲི་སྐོར་བཅུ་གཉིས་ཀྱི་བདག་པོ་ཚ་ཞང་འདན་མ་བྱང་ཁྲ་དང་གླིང་བཟའ་ལྷ་སྒྲོན་ཆོས་མཚོ་གཉིས་ལ་ལྟས་དང་མཚན་མ་བཟང་པོ་དང་བཅས་རིགས་སྲས་མཚན་ལྡན་ཞིག་འཁྲུངས་ཤིང་འདན་བླ་མ་བདེ་ཆེན་རང་གྲོལ་གྱིས་བསམ་དོན་འགྲུབ་པའི་རྟེན་འབྲེལ་གྱི་ལུང་བསྟན་གནང་ཞིང་འདན་སྲས་གཡུ་འོད་འབུམ་མེ་ཞེས་མཚན་གསོལ། གླིང་སྤྱི་དཔོན་རོང་ཚ་ཁྲ་རྒན་གྱིས་བཀྲ་ཤིས་པའི་ཁ་བཏགས་ཕུལ་ནས་རྟེན་འབྲེལ་ཞུས། གླིང་ཚོ་དྲུག་ལྷ་སྡེས་བཙས་སྟོན་བྱས་ཤིང་གླིང་གེ་སར་རྒྱལ་པོའི་བཀའ་ལུང་ལྟར་ཁྲོ་ཐུང་གིས་རྟེན་འབྲེལ་གྱི་ཤིས་ཚིག་བརྗོད། གླིང་བ་རྒན་རིམ་རྣམས་ཀྱིས་བཀྲ་ཤིས་པའི་གཏམ་གླེང་དང་ཕུ་ནུ་རྣམས་ཀྱིས་རྟ་རྒྱུག་མདའ་འཕེན། མ་སྲུ་རྣམས་ཀྱིས་གླུ་བྲོ་སོགས་རྩེད་འཇོའི་དགའ་སྟོན་གྱི་ཡོ་ལང་ལ་རོལ་བའོ། །
        འཁྲབ་ཚན་གཉིས་པ། སྲས་ཆུང་གཡུ་འོད་འབུམ་མེ་ཡིས། སྒྱུ་རྩལ་མ་ལུས་བྱང་ཞིང་ཆུབ། །ནེའུ་ཆུང་ཌཱཀི་གྲོགས་སུ་བཀུགས། རྟེན་འབྲེལ་ལེགས་པའི་ཕྱོགས་སུ་འགྲིགས། །ཞེས་འདན་སྲས་གཡུ་འོད་འབུམ་མེ་དེ་དགུང་ལོ་བདུན་ལ་སོན་པའི་སྐབས་དེར་གླིང་ལྷ་སྡེའི་སྤྱི་ཆུས་དང་སྒོས་གེ་སར་རྒྱལ་པོའི་དགོངས་བཞེད་སྒྲུབ་པ་ལ་བློ་རིག་སྤྱང་གྲུང་ལྡན་དགོས་པར་མ་ཟད་ཁྱད་པར་དུ་དྲག་པོའི་སྒྱུ་རྩལ་ལ་བྱང་དགོས་པར་དགོངས་ནས་ཕོ་རྩལ་སྣ་དགུ་སྦྱང་བར་དཔའ་བོ་ཆོས་ཀྱི་སེང་གེའི་དྲུང་དུ་བྱོན་པར་ཞུས་པ་དང་གླིང་གེ་སར་རྒྱལ་པོས་བསྔགས་པ་བརྗོད་ཅིང་གླིང་གི་རྒྱལ་བློན་ཡབ་ཡུམ་སོགས་གླིང་པ་རྣམས་ཀྱིས་སྐྱེལ་མ་མཛད། འདན་སྲས་ཁོང་དམག་དཔོན་ཆོས་ཀྱི་སེང་གེའི་དྲུང་དུ་བྱོན་ནས་མོས་གུས་ཀྱིས་ཚུལ་བཞིན་བསྟེན་ཏེ་མདའ་རྩལ་དང་གྲི་རྩལ་སོགས་སྒྱུ་རྩལ་གྱི་བྱེ་བྲག་ཀུན་ལ་བྱང་ཆུབ་པར་སྦྱང་ནས་དཔའ་རྩལ་གཉིས་ལ་འགྲན་ཟླ་བྲལ་བར་གྱུར། དམག་དཔོན་ཆོས་ཀྱི་སེང་གེས་རང་གི་གསེར་རྨོག་འདན་སྲས་ལ་གཟེངས་རྟགས་སུ་ཕུལ་ཅིང་བསྔགས་བརྗོད་དང་རེ་བའི་ཁ་ཏ་གནང་། འདན་སྲས་དེ་ཉིད་རྩལ་དྲུག་ལུས་ལ་རྫོགས་ཤིང་དཔའ་མཛངས་ཕུལ་ཏུ་ཕྱིན་ནས་ཕྱིར་ཁྲ་མོ་གླིང་ལ་བྱོན། གླིང་སྤྱི་དཔོན་རོང་ཚ་ཁྲ་རྒན་གྱིས་གྲོས་མགོ་བཏོན་པ་ལྟར་འདན་སྲས་གཡུ་འོད་འབུམ་མེ་ལ་ནེའུ་ཆུང་དབྱིངས་ཀྱི་ཌཱཀི་ཁབ་ཏུ་བསུས་ཤིང་གླིང་སྟོད་སྨད་བར་གསུམ་དགའ་བདེའི་དཔལ་ལ་རོལ་ཅིང་གནས་པའོ། །
        ལེའུ་གཉིས་པ། རྒྱས་པའི་འཕྲིན་ལས་ཀྱི་རིམ་པ་ལ་ཡང་འཁྲབ་ཚན་གཉིས་ཏེ། འཁྲབ་ཚན་དང་པོ། མཁའ་འགྲོ་ཡེ་ཤེས་མཚོ་རྒྱལ་གྱིས། །གཡུ་འོད་བུ་ལ་ལུང་བསྟན་ལྟར། །གསེར་ལུང་པདྨ་འདབ་དྲུག་དེར། །ས་གནད་བཙལ་ཞིང་རྟེན་འབྲེལ་འགྲིགས། །ཞེས་པ་ལྟར་འདན་སྲས་གཡུ་འོད་འབུམ་མེ་ཡིས་མཁའ་འགྲོ་ཡེ་ཤེས་མཚོ་རྒྱལ་དང་གླིང་རྗེ་གེ་སར་ནོར་བུ་དགྲ་འདུལ་གྱི་བཀའ་བཀོད་དང་དུ་བླངས་ནས་ཡུལ་གསེར་ལུང་པདྨ་འདབ་དྲུག་དུ་བྱོན། ལྷ་སྲས་དགྲ་ལྷ་རྩེ་རྒྱལ་གྱིས་རྟེན་འབྲེལ་གྱི་བདེན་ཚིག་བདར་ནས་ལྷ་མདའ་འཕངས་ཤིང་ས་ཡི་ལྷ་མོ་བརྟན་མས་ས་གནད་བསྟན་ཏེ་མཁར་གཞིས་ངོས་བཟུང་བའོ། །
        འཁྲབ་ཚན་གཉིས་པ། ལྷག་པའི་ལྷ་ཡི་ལུང་བསྟན་ལྟར། ཆོས་དང་ནོར་གྱི་གཏེར་ཁ་བླངས། ། རྒྱ་ཚ་གཙོ་བྱས་ལྷ་བབས་བྱས། སྲས་ཆུང་རྒྱལ་པོའི་ཚབ་ཏུ་བསྐོས། །ཞེས་པ་སྟེ་ལྷག་པའི་ལྷ་ཡི་ལུང་བསྟན་ལྟར་འདན་སྲས་ཀྱིས་གླིང་གི་དཔུང་ཆེན་ལ་ཁ་ལོ་བསྒྱུར་ནས་ཕྱོགས་ཀྱི་རྒྱལ་ཁག་ལ་དཔུང་འཇུག་བྱས་ཤིང་གཏེར་གཡང་དང་རིན་ཆེན་སྣ་ཚོགས་གླིང་ལ་དྲངས། གླིང་རྗེ་སེང་ཆེན་ཁོང་ནི་ཕྱི་ནང་གསང་གསུམ་གྱི་དགོས་དབང་གིས་རེ་ཞིག་མཁའ་སྤྱོད་ཞིང་དུ་བྱོན་པས་འདན་སྲས་གཡུ་འོད་འབུམ་མེ་དེ་ཉིད་ཁོང་གི་རྒྱལ་ཚབ་ཏུ་བསྐོས་ཤིང་། འདས་པོ་རྒྱ་ཚ་ཞལ་དཀར་སོགས་ལྷ་བབ་བྱས་ཏེ་གླིང་གི་ལྷ་མི་ཞལ་འཛོམས་བྱུང་བའོ། །
        ལེའུ་གསུམ་པ། དབང་གི་འཕྲིན་ལས་ཀྱི་རིམ་པ་ལ་ཡང་འཁྲབ་ཚན་གཉིས་ཏེ། འཁྲབ་ཚན་དང་པོ། འདན་སྲས་གཡུ་འོད་འབུམ་མེ་ཡིས། །ཕྱོགས་བཞིའི་རྒྱལ་ཁམས་དབང་དུ་བསྡུས། །དགེ་བ་བཅུ་ཡི་ལམ་བཟང་བསྟན། །སྐྱེ་འགྲོ་ཐར་བའི་ལམ་ལ་བཀོད། །ཞེས་པ་ལྟར་འདན་སྲས་ཀྱིས་འདུ་ར་སྟག་ཐང་ཁྲ་མོ་རུ་གླིང་ཚོ་དྲུག་ལྷ་སྡེའི་ལས་དམག་བསྡུས་ནས་གླིང་བཞིའི་ཡུལ་ཁམས་དབང་དུ་བསྡུས་ཤིང་འགྲོ་རྣམས་ཆོས་ལ་བཀོད་ནས་སླར་གླིང་ལ་བྱོན་པའོ། །
        འཁྲབ་ཚན་གཉིས་པ། ལྷ་དབང་བརྒྱ་བྱིན་བསྐུལ་བ་བཞིན། ། མ་གཟའ་དམ་གསུམ་འཁོར་བཅས་བྱོན། །དགའ་རབ་དབང་ཕྱུག་ཆམ་ལ་ཕབ། །རྒྱལ་ཚབ་བྱམས་པར་མཇལ་འཕྲད་གནང་། །ཞེས་པ་ལྟར་ལྷའི་དབང་པོ་བརྒྱ་བྱིན་གྱིས་འདན་སྲས་ལྷའི་ཡུལ་དུ་སྤྱན་དྲངས་ནས་ཆོས་ཀྱི་མཛད་པ་སྐྱོང་བ་ལ་བདུད་ཀྱིས་བར་ཆད་བརྩམས་པ་ན་ཁོང་གིས་རྫུ་འཕྲུལ་གྱིས་བདུད་དཔུང་ཚར་བཅད་པ་ན་རྗེ་བཙུན་བྱམས་པ་མགོན་པོས་བསྔགས་པ་བརྗོད། ལྷ་དང་ལྷ་མིན་མ་ལུས་དབང་དུ་བསྡུས་ནས་ཕྱིར་ཁྲ་མོ་གླིང་ལ་བྱོན་པའོ། །
        ལེའུ་བཞི་བ། དྲག་པོ་གཡུལ་འགྱེད་ཀྱི་འཕྲིན་ལས་ཀྱི་རིམ་པ་ལ་ཡང་གཉིས་ཏེ། འཁྲབ་ཚན་དང་པོ། ཐོག་རྒྱལ་བསམ་སྦྱོར་ངན་པ་ཡིས། །ཁྲ་མོ་གླིང་ལ་བར་ཆད་བརྩམས། །སློབ་དཔོན་པདྨའི་བཀའ་ལུང་ལྟར། །གླིང་དཀར་ལྷ་སྡེ་གཡུལ་ལ་ཆས། །ཞེས་པ་ལྟར་གླིང་གེ་སར་རྒྱལ་པོ་མཁའ་སྤྱོད་ཞིང་ལ་བྱོན་ཤུལ་དུ་དོལ་གྱི་བདུད་རྗེ་གནམ་ལྕགས་ཐོག་རྒྱལ་གྱིས་བདུད་དམག་གི་དཔུང་ཆེན་བསྐུལ་ནས་དམག་སྣ་གླིང་ལ་གཏད་པ་ན། གླིང་སེང་ཆེན་ནོར་བུ་དགྲ་འདུལ་ཁོང་མཁའ་སྤྱོད་ཞིང་ན་ཡོད་པ་ལ་སློབ་དཔོན་གྱི་ལུང་བསྟན་བྱུང་ནས་བདུད་རྒྱལ་འདུལ་སྐལ་དེ་འདན་སྲས་ཁོ་ན་ལ་ཡོད་པར་གསུངས་པས། གེ་སར་རྒྱལ་པོས་མྱུར་དུ་ཕོ་ཉ་མངགས་ཤིང་འདན་སྲས་གཡུ་འོད་འབུམ་མེ་ཡིས་གླིང་ཚོ་དྲུག་ལྷ་སྡེའི་འདུ་ར་བསྡུས་ཤིང་གླིང་གི་དཔའ་རྟུལ་བརྒྱད་ཅུ་གཙོས་རུ་བཞིའི་དཔུང་ཆེན་ལ་ཁ་ལོ་བསྒྱུར་ནས་བདུད་དཔུང་འདུལ་བར་ཆས་པའོ། །
        འཁྲབ་ཚན་གཉིས་པ། སྲས་ཆུང་གཡུ་འོད་འབུམ་མེ་ཡིས། བདུད་རྒན་ཐོག་རྒྱལ་གཙོ་བྱས་པའི། །བདུད་སྡེ་མ་ལུས་ཆམ་ལ་ཕབ། དཀར་ཕྱོགས་ལྷ་ཡི་རྒྱལ་མཚན་བསྒྲེངས། །ཞེས་པ་ལྟར་བདུད་གླིང་བར་གཡུལ་འགྱེད་དྲག་པོ་བྱུང་ཞིང་མཐར་བདུད་རྗེ་གནམ་ལྕགས་ཐོག་རྒོད་དེ་ངར་རྒོད་ཀྱིས་གླིང་སྒར་དུ་ཤོར་བྱུང་བ་ན་དཔའ་འདན་སྲས་གཡུ་འོད་འབུམ་མེ་དེས་བདུད་རྗེ་འདུལ་བའི་དུས་ལ་བབ་པ་མཁྱེན་ནས་གཞུ་མོ་ཁམས་གསུམ་དབང་སྡུད་ཀྱི་སྟེང་དུ་ལྷ་མདའ་དགྲ་ཁྲག་ཧུབ་འདྲེན་དེ་བཞག་སྟེ་འཕངས་པས་སྐད་ཅིག་ཉིད་ལ་ཚར་བཅད་དེ་རྣམ་ཤེས་འཇམ་དཔལ་གྱི་ཞིང་དུ་སྤར་ཞིང་བདུད་ཡུལ་ཆོས་ལ་བཀོད་ནས་བདུད་འདུལ་མཆོད་རྟེན་བཞེངས་པའོ། །
        ལེའུ་ལྔ་བ། མཆོག་གི་འཕྲིན་ལས་ཀྱི་རིམ་པ་ལ་ཡང་གཉིས་ཏེ། འཁྲབ་ཚན་དང་པོ། གླིང་དཀར་དཔའ་ཐུལ་གཙོ་བྱས་པའི། །ལྷ་སྡེ་ཡོངས་ཀྱིས་བསང་མཆོད་བཏང་། །སེང་ཆེན་མཁའ་སྤྱོད་ཞིང་ནས་ཕེབས། །གཞིས་བྱེས་ལྷན་འཛོམས་དགའ་སྟོན་བྱས། །ཞེས་པ་ལྟར་གླིང་གེ་སར་ནོར་བུ་དགྲ་འདུལ་གྱིས་མཁའ་སྤྱོད་ཞིང་ནས་འགྲོ་དོན་རེ་ཞིག་རྫོགས་ཏེ་ཕྱིར་གླིང་ལ་བྱོན་པར་ཆས་པ་ན། འདན་སྲས་གཡུ་འོད་འབུམ་མེ་གཙོས་དཔའ་རྟུལ་ཕུ་ནུ་རྣམས་ཀྱིས་གླིང་ཆུང་རྒྱུད་འབུམ་པའི་བླ་རི་ནས་ལྷ་བསང་རྒྱ་ཆེན་པོ་ཕུལ་པའི་ཚེ་ན་རྒྱལ་མཆོག་སེང་ཆེན་ནོར་བུ་དགྲ་འདུལ་ཉིད་ཤར་རྨ་རྒྱལ་ལྷ་རིའི་མདུན་ངོས་ཀྱི་སྤྲིན་དཀར་པོའི་གུར་ཁང་གི་ཀློང་ནས་རྫུ་འཕྲུལ་གྱིས་བྱོན་ཅིང་། ཁོང་གིས་འདན་སྲས་ཀྱིས་ནག་ཕྱོགས་བདུད་དགྲ་བཏུལ་བར་གཟེངས་བསྟོད་རྒྱ་ཆེན་པོ་གནང་བའོ། །
        འཁྲབ་ཚན་གཉིས་པ། ཡེ་ཤེས་མཁའ་འགྲོའི་ལུང་བསྟན་ལྟར། གླིང་དཀར་ལྷ་སྡེ་ཕྱི་ནང་ལ། །ཟབ་རྒྱས་ཆོས་ཀྱི་གདམས་པ་གནང་སྐྱེ་འགྲོ་ཐར་བའི་ལམ་ལ་བཀོད། །ཞེས་པ་ལྟར་དཀར་ཕྱོགས་ལྷའི་ལུང་བསྟན་དང་རྒྱལ་མཆོག་སེང་ཆེན་ནོར་བུ་དགྲ་འདུལ་གྱི་བཀའ་གསུང་ལྟར་འདན་སྲས་གཡུ་འོད་འབུམ་མེ་ཡིས་སྐར་མ་རྒྱལ་ཕུར་འཛོམས་པའི་དུས་བཟང་གི་ཉིན་མོ་ལ་གླིང་འདུ་ར་མེ་ཏོག་ཆོས་གླིང་ནས་ཐུགས་འོད་གསལ་མཉམ་བཞག་ཆེན་པོའི་ངང་གླིང་གོང་འོག་བར་གསུམ་ལ་ཆོས་གླུ་སྟོང་ཉིད་ལྡེམ་གླུ་བླངས་ཏེ་ཟབ་ཆོས་བདུད་རྩིའི་གདམས་ངག་རྒྱ་ཆེར་གནང་ཞིང་ཐར་བའི་ལམ་ལ་བཀོད་པའོ། །

སློབ་དཔོན་པདྨ་འབྱུང་གནས།

        འདན་སྲས་རྟོགས་བརྗོད་ཟློས་གར་ཆེན་མོ་ནི་གླིང་སྒྲུང་གི་ཟློས་གར་གྱི་རྣམ་པ་ཁོ་ན་ཙམ་ཞིག་མ་ཡིན་པར་དེ་ནི་བོད་ཀྱི་དགོན་སྡེའི་གར་འཆམ་དང་ནང་བསྟན་གྱི་ཆོ་ག རྣམ་ཐར་ཟློས་གར། དམངས་ཁྲོད་ཀྱི་ཞབས་བྲོ་སོགས་རིག་གནས་སྒྱུ་རྩལ་གྱི་རྣམ་གྲངས་མང་པོ་འོ་ཆུ་ལྟར་འདྲེས་ནས་གྲུབ་པའི་དགོན་སྡེའི་གླུ་གར་གྱི་རྣམ་པ་ཞིག་ཡིན་པས། འདི་ལ་གཤམ་གྱི་ཕྱོགས་འགའི་ཐད་ཀྱི་རིག་གནས་རིན་ཐང་དང་དོན་སྙིང་ཡོད་པར་འདོད།
        གཅིག ཡ་ཆེན་དགོན་གྱི་འདན་སྲས་རྟོགས་བརྗོད་ཟློས་གར་ཆེན་མོ་འདི་ནི་བོད་ཀྱི་གླིང་སྒྲུང་ཟློས་གར་ལས་གཞི་རྒྱ་ཆེས་ཆེ་བའི་ཟློས་གར་གྱི་རྣམ་པ་ཞིག་ཡིན་ཏེ། ཟློས་གར་འདི་ནི་འཁྲབ་སྟོན་པ་ཉིས་བརྒྱ་ལྷག་གིས་འཁྲབ་ཡུན་ཉིན་ལྔའི་རིང་ལ་རྒྱ་ཆེ་བའི་ནང་བསྟན་གྱི་ཆོ་ག་དང་གླིང་གེ་སར་རྒྱལ་པོའི་སྒྲུང་ལས་འདན་སྲས་གཡུ་འོད་འབུམ་མེའི་རྟོགས་བརྗོད་གཉིས་ཟུང་དུ་འབྲེལ་ནས་འཁྲབ་སྟོན་བྱེད་པ་དང་། ལོ་རེར་ལྟད་མོ་བ་མི་སུམ་ཁྲི་ལྷག་འདུ་བཞིན་ཡོད་ཅིང་། འཁྲབ་སྟོན་གྱི་གར་སྟེགས་ནི་མེ་ཏོག་རྣམ་པར་བཞད་པའི་ཁྲོམ་གཞུང་སྤང་ལྗོངས་ཀྱི་གཞི་ཡིན་པས་མཐོ་སྒང་གི་མཛེས་ལྗོངས་དང་གླིང་སྒྲུང་སྒྱུ་རྩལ་གྱི་མཚར་ཉམས། བོད་ཀྱི་དགོན་སྡེའི་རིག་གནས་ཀྱི་སྟོབས་ཤུགས་བཅས་གཞི་གཅིག་ཏུ་གྲུབ་པའི་བོད་ཀྱི་སྲོལ་རྒྱུན་རིག་གནས་སྒྱུ་རྩལ་གྱི་དོ་ར་ཆེན་པོ་ཞིག་ངང་གིས་ཆགས་ཡོད་པ་རེད།
        གཉིས། ཡ་ཆེན་དགོན་གྱི་འདན་སྲས་རྟོགས་བརྗོད་ཟློས་གར་ཆེན་མོ་འདི་ནི་བོད་ཀྱི་རྟོགས་བརྗོད་ཟློས་གར་གྱི་རྣམ་པའི་སྒོ་ནས་འཁྲབ་སྟོན་བྱེད་པའི་ནང་བསྟན་དགོན་སྡེའི་ཆོས་ལུགས་ཀྱི་མཆོད་པ་དང་སྒྲུབ་ཐབས་ཀྱི་ཆོ་ག་རྒྱ་ཆེན་པོ་ཞིག་དང་། གླིང་སྒྲུང་ཟློས་གར་སྒྱུ་རྩལ་འཕེལ་རྒྱས་ཀྱི་རྣམ་པ་གལ་ཆེན་ཞིག་ཡིན་ཏེ། འདིས་སྔོན་གྱི་གླིང་སྒྲུང་ཟློས་གར་གྱི་རྣམ་པ་དེ་དགོན་པ་དང་དམངས་ཁྲོད་གང་ཡིན་ཡང་གླིང་སྒྲུང་གི་བརྗོད་བྱ་གཞིར་བཟུང་ནས་འཁྲབ་སྟོན་བྱེད་པ་ནས་གླིང་སྒྲུང་དང་བོད་ཀྱི་ནང་བསྟན་གྱི་ལྟ་གྲུབ་ཟུང་འབྲེལ་བྱས་ཤིང་། དགོན་སྡེའི་འཆམ་དང་གླིང་བྲོ་སོགས་སྒྱུ་རྩལ་རྣམ་གྲངས་དུ་མས་ཟུར་བརྒྱན་པས་རྣམ་པ་དང་ནང་དོན་གྱི་ཆ་ནས་གཏིང་ཟབ་ཅིང་ཕུན་སུམ་ཚོགས་པར་གྱུར་ཡོད་པ་རེད།
        གསུམ། ཡ་ཆེན་དགོན་གྱི་འདན་སྲས་རྟོགས་བརྗོད་ཟློས་གར་ཆེན་མོ་འདི་ནི་འཁྲབ་གཞུང་གི་རྩོམ་སྒྲིག་པ་དང་འཁྲབ་ཁྲིད་པ། ཇུས་འགོད་པ། ཟློས་གར་གྱི་འཁྲབ་སྟོན་པ་ནས་ཞབས་བྲོ་དང་རོལ་དབྱངས། གླུ་གཞས་སོགས་ཐད་ཀྱི་མི་སྣ་ཡོད་ཚད་དགོན་སྡེ་རང་ཁོངས་ཀྱི་གྲྭ་བ་དང་བཙུན་མ་ཁོ་ན་ཡིན་པས་འདིས་བོད་ཀྱི་དགོན་སྡེའི་རིག་གནས་སྒྱུ་རྩལ་ཐད་ཀྱི་སྟོབས་ཤུགས་རྒྱ་ཆེན་པོ་ཞིག་མངོན་པར་མ་ཟད། བོད་ཀྱི་སྲོལ་རྒྱུན་རིག་གནས་སྒྱུ་རྩལ་གྱི་ཤུལ་བཞག་སྔོག་འདོན་དང་རྒྱུན་འཛིན། གསར་སྤེལ་བཅས་ཀྱི་ཐད་ལ་སྔར་མེད་ཀྱི་སྒོ་འཕར་ཕྱེས་ཤིང་བགྲོད་ལམ་ཡངས་པོ་ཞིག་བསྟན་ཡོད་པར་འདོད་དོ། །

འཁོར་གསུམ་ལུས་ལ་སྐོར་བའི་དཔའ་རྟུལ།

མཇུག་གཏམ།

        ལྷུན་སྟུག་ནགས་ཚལ་གྱི་ཚང་ཚིང་འཁྲིགས་ཤིང་། དཀར་དམར་མེ་ཏོག་གི་བཀྲག་མདངས་རྒྱས་པ། རིན་ཆེན་སྣ་ཚོགས་ཀྱི་གཏེར་ཁ་འཛོམས་ཤིང་རྩ་ཆེའི་རི་དྭགས་ཀུན་བག་ཡེངས་སུ་རྒྱུ་བ། གཞན་ཡང་ཡངས་པའི་རྩྭ་ཐང་དང་། བརྗིད་པའི་རི་བོ། དྭངས་གཙང་གི་ཆུ་བོ་སོགས་རང་བྱུང་སྣོད་ཀྱི་བཀོད་པ་མཛེས་པའི་ཡུལ་དེ་ལ་དཔལ་ཡུལ་ཞེས་འབོད། མིང་དོན་མཚུངས་པའི་ཡུལ་དེར་ཞིང་ལ་ལོ་ལེགས་ཤིང་ཕྱུགས་ཀྱི་འཕེལ་ཁ་དར་བས་རོང་འབྲོག་མང་ཚོགས་ཀྱི་འཚོ་བ་རྒྱས། གནས་དེར་ཕ་མེས་གོང་མས་བཞག་པའི་སྲོལ་རྒྱུན་གྱི་ལག་ཤེས། གསེར་དངུལ་ཟངས་ལྕགས་སོགས་བཞུ་བཏུལ་གྱིས་རྒྱན་ཆ་སྣ་ཚོགས་བཟོ་ཤེས་པ། གཞན་ཡང་ཤིང་བཟོ་དང་། རྡོ་བཟོ། ཐགས་འཐག་པ་དང་། ལུགས་བླུགས་པ། རི་མོ་འབྲི་བ་སོགས་ཚད་མཐོའི་རྒྱལ་ཁབ་རིམ་པའི་གྲས་སུ་འགྲོ་བའི་ལག་རྩལ་གྱི་ཕ་ས་རུ་གྲུབ། མི་རྣམས་ཀྱང་རང་གཤིས་བརྟན་ཅིང་། ཆོས་ལ་དད་པ་མ་ཟད་གླུ་གཞས་དང་། ཞབས་བྲོ། རྟ་རྒྱུགས་དང་། མདའ་རྩེད་སོགས་སྲོལ་རྒྱུན་གྱི་རྩེད་མོ་སྣ་ཚོགས་ལ་མཁས། རིས་སུ་མ་མཆིས་པའི་སྐྱེས་ཆེན་མང་པོས་ཞབས་ཀྱིས་བཅག་ལ་བྱིན་གྱིས་བརླབས་པ་མ་ཟད། རླབས་ཆེན་འཁོར་ལོ་གསུམ་གྱི་མཛད་པ་བསྐྱངས་པས་སྣོད་བཅུད་ལ་གཡང་ཆགས། བན་བོན་དང་། གསར་རྙིང་གི་བསྟན་པ་དར་ཞིང་རྒྱལ་བ་ཀཿདཔལ་གཉིས་དང་། ཁྲོཾ་རྡོ་ཁོ་དགོན་ཆེན། ཡ་ཆེན་ཨོ་རྒྱན་བསམ་གཏན་གླིང་སོགས་ཆོས་གྲྭ་ཆེན་པོ་རྣམས་སུ་ཆོས་དང་རིག་གནས་ཀྱི་རྒྱུན་བཟུང་བས། སྤྱི་ཚོགས་གསར་རྙིང་གཉིས་ལ་ཆོས་དང་རིག་གནས་དོན་དུ་གཉེར་བའི་སྐལ་བ་ལྡན་པའི་རབ་བྱུང་དང་། བཙུན་མའི་སྡེས་ལི་ཁྲིའི་རྒྱ་མཚོ་འཁྱིལ་བའི་ཚུལ་ལ་འགྲན་ཅིང་། སྙན་གྲགས་ཀྱི་དབྱར་རྔ་ཕྱོགས་མཐར་ཁྱབ་པའོ། །
(དཔལ་ཡུལ་དམངས་སྲོལ་རིག་གནས་འཚོལ་བསྡུ་ཚན་ཆུང་དང་འཇུ་རབ་གསལ།  དཔལ་ཡུལ་རྫོང་རིག་གནས་ཡུལ་སྐོར་དང་རྒྱང་བསྒྲགས་བརྙན་འཕྲིན་ཁང་བཅས་ཀྱིས་པར་དང་ཡི་གེ་མཁོ་འདོན་བྱས།)

འདན་སྲས་དཔའ་བོའི་ཟློས་གར།