སྣང་སྲིད་རོ་བཅུད་དྭངས་མའི་ཁམས།།
མིང་དང་བརྡ་རུ་ཤར་བ་ནི།།
པི་ཝང་སྔོན་པོར་འཛུམ་པ་དེ།།
གཉུག་མའི་གཤིས་ལ་འཁྱུད་འདི་མཚར།།
གཡུ་སྤང་འཐབ་པའི་ཟུར་ངོས་ནས།།
འཇའ་སྤྲིན་ལག་པ་སྦྲེལ་བ་དེར།།
གསང་བའི་ཐེལ་ཙེ་གདབ་པ་ལ།།
སེམས་འགྲོས་ཆར་བའི་ཟོལ་དུ་འབབ།།
ཕྲ་ཞིང་ཕྲ་བའི་སེམས་རིས་ཀྱིས།།
ཐ་སྙད་བཤིགས་པའི་རྟེན་འབྲེལ་ནི།།
རི་དང་གཙང་པོར་ཐིམ་པ་ཡིས།།
གཤིས་ཀྱི་སྙན་ངག་འོད་དུ་གྲུབ།།
བླ་སྲོག་དེ་ལ་གླན་པ་ན།།
ངལ་བའི་རྡུལ་དང་གསེག་མའི་ཕོན།།
དུབ་པའི་འབག་བཙོག་ཅི་དང་ཅི།།
སྟོང་བའི་དབྱིངས་དང་རོ་གཅིག་བྱེད།།
དེ་བས་བདག་གི་རྣམ་ཤེས་ནི།།
ཕྱི་ནང་གསང་གསུམ་གསལ་བ་ཡི།།
ཡང་ན་འོད་ཀྱི་གླེགས་བམ་ཞིག །
མིན་ན་ཤེལ་གྱི་རྒྱུད་མངས་ཤིག །
སྐབས་རེར་རྒོད་པོ་འཕུར་སྟངས་ཀྱིས།།
ཉི་ཟླའི་བརྩེ་བ་གཤོག་པས་སྦྲེལ།།
ལན་རེར་གཙང་པོ་བཞུར་ཤུགས་ཀྱིས།།
རླབས་ཀྱི་དུངས་པ་མཁའ་རུ་གཏོར།།
