ཤོག་དཀར་ངོས་སུ་མི་ཚེ་ཡང་ཡང་བྲིས།།

དེ་ལ་ལམ་གྱི་སྣེ་མོ་མང་དུ་བྲིས།།

ང་ནི་རེ་བའི་རླུང་གིས་དེད་པ་ཡིས།།

ལོ་ཟླའི་མདུན་དུ་རྒྱུག་སྟེ་སྒོ་ཁར་འཚང་།།

 

ལམ་དེར་དུས་ཀྱི་དྲག་ཆར་རབ་ཏུ་འབབ།།

ང་ནི་ཁ་ཕྱོགས་མེད་པའི་ལོ་མ་ལྟར།།

ཕྱི་རོལ་གཙང་པོར་ལྕེབས་ཏེ་འཆི་ཡང་སྲིད།།

གྲོག་རོང་རྡོ་བའི་ཕག་ནས་འགག་ཀྱང་སྲིད།།

 

ཡིན་ཡང་ཁོ་བོ་ད་དུང་གསོན་དགོས་པས།།

ཚེ་ཡི་དགུན་གཞུང་དག་ནི་རིང་ནས་འཁྱག །

ང་ནི་འཚོ་བའི་ནང་གི་སྡོད་ཁང་དེར།།

དུངས་པའི་དབང་གིས་བསྐྱར་དུ་ལོག་དགོས་བྱུང་།།

 

སྔོན་ཆད་ང་དང་མཉམ་དུ་འདུག་མྱོང་བའི།།

ཆུང་འདྲིས་དག་ནི་དཀའ་སྡུག་རྒྱ་མཚོ་བརྒལ།།

ང་ལ་ཕྱི་རྐྱེན་ནང་རྐྱེན་དུ་མ་ཡིས།།

ད་དུང་འཚོ་བའི་སྒོ་གླེགས་ཕྱེ་མ་ནུས།།

 

ང་ཡི་ནར་སོན་དུས་ཚོད་འགའ་ཞིག་ཏུ།།

སྙིང་སྡུག་ཤུལ་དུ་ལུས་པའི་གཏམ་རྒྱུད་བརྡོལ།།

སྐྱོ་བའི་མིག་ཆུ་མི་ལྷུང་སྡུག་བསྔལ་དེ།།

ང་ནི་རྒྱང་དུ་ལོག་པའི་སེམས་ཤུགས་ལགས།།

 

བརྩེ་བའི་མེ་ཏོག་ལྷན་དུ་བཏབ་མྱོང་བའི།།

ང་ཡི་དྲན་ཤིང་སྣུམ་པོ་གང་དུ་མཆིས།།

ད་ལྟ་ང་ནི་ཧ་ཅང་གཉོམ་ཞིང་ཆུང་།།

ནང་སེམས་དྲོད་ཐིག་ཙམ་ཡང་རྙེད་མ་བྱུང་།།

 

མི་ཡུལ་ཉེ་རིང་ཆགས་སྡང་རེ་རེ་ནི།།

ཕྱི་ནང་རབ་ཏུ་གསལ་བའི་ཆོས་ཉིད་ཀྱིས།།

བདེན་པའི་ངག་བཞིན་ཁོ་བོར་འཆད་པ་ན།།

ང་ཡིས་ཁྱོད་ཀྱི་སྙིང་གི་ཟབ་ཚད་འཚོལ།།

 

ང་ནི་རྒྱང་ནས་ཐོན་པའི་བསིལ་རླུང་ལགས།།

ཡིད་འདབ་རེ་རེ་འཐོར་བའི་ཕྱི་དྲོར་ཆགས།།

ནམ་ཡང་སྐྲ་ཡི་ཉག་མ་རེ་རེ་བཞིན།།

ཁྱོད་ནི་ཁེར་རྐྱང་ཡིན་པ་ང་ཡིས་གོ།།

 

ལས་ཀྱིས་བྲལ་བའི་སོ་སོའི་བྱིས་དུས་ནི།།

འུ་གཉིས་ད་བར་ལུས་པའི་ནོར་འཆུག་མིན།།

ང་ཡིས་རང་ལ་རིན་ཐང་འཚོལ་ཚུལ་ཡིན།།

ང་ཡིས་ཁྱོད་ལ་རང་དབང་སྟེར་ཚུལ་ཡིན།།

 

འཚོ་བའི་རྨི་ལམ་རིང་མོའི་མགོ་མཇུག་ཀྱང་།།

ང་ཡིས་ཁྱོད་ལ་བྲིས་པའི་སྙན་ངག་ཅིག །

སྙན་ངག་དེ་ཡིས་རང་ལམ་སྙེག་བཞིན་དུ།།

ང་ཡིས་ཚེ་ཕྱེད་ཙམ་དུ་སྙན་ངག་བྲིས།།

 

                                            2017.7.28