༡
དབྱར་ཁ་མི་ཞིག་སླེབས་དུས
རྟ་ཕོ་སྤང་ནས་བོར་ཟིན
རྨིག་རྗེས་ཡལ་ལ་ཉེ་དུས
སླར་ཡང་མི་ཞིག་སླེབས
ཐོད་པའི་རྒས་གཉེར་གྱི་གསེང་དུ
བྱིས་པའི་སྣང་བ་གསལ་ལ་མི་གསལ་བ་ཞིག་མངོན
༢
རྨི་ལམ་ལས་བོར་བའི་རང་ཡུལ
ཨར་འདམ་གྱིས་སྦགས་པའི
འཇིམ་སྐུ་དེ་དང་འདྲ་ཨང
སུ་ཞིག་གི་ཧམ་སེམས་ལ་མེ་འབར་དུས
ཁྱོད་སླར་ཡང་མི་མངོན་པར་གྱུར
སྐུད་པ་ཕྲ་མོ་དེ་ལ་བརྒྱུས་པའི
ཕྱི་མིག་གི་སྣེ་གཉིས་སུ
འུ་གཉིས་ཀ སྨྲེང་ཞིང་འཐོམས
༣
ཁ་མང་པོ་བརྩེགས་པའི་ཤུལ་ན
དགེ་ཆོས་ཀྱི་ཀེང་རུས་ལས་མི་འདུག
ལག་པ་མང་པོ
སྙིང་དང་མཆིན་པར་རེག་དུས
མཚན་མོའི་གཞུང་གི་འཁུན་སྒྲ
ལྷས་ར་སྟོང་བ་དེ་ནས་ཐོས་ཙམ་ཐོས་ཙམ
སླར་ཡང་ཡལ་བར་གྱུར
༤
མི་གཉིས་ཀྱི་མདུན་རྒྱབ
རི་ཞིག་དང་འདྲ་བར
སྐྱེ་ནས་འཆི་རག་བར
རང་ཉིད་སོ་སོ་ཡིན་པའི་ཟོལ་གྱིས་བསྡད་འདུག
༥
བུ་མོ་ཞིག་གི་ཁ་པར་ལས
ས་གཞི་འགུལ་གྱིན་པ་ཚོར
ནམ་མཁའི་སྐར་མ་འདར་བའི་ཟོལ་གྱིས
ང་ཡང་ཡོམ་ཡོམ་འདར
ལག་པ་གཉིས་འཇུ་སའི་ལྕགས་སྦུག་དེའང་ཆད
༦
ལྷ་ས་ཞེས་བཤད་པའི་ཡུལ་ལུང་དེ
མི་མང་པོ་འདུས་སྡོད་བྱས་འདུག
ལོ་རྒས་དུས
སྨན་བླའང་དེར་བུད་སོང
འཆི་ཁའི་ངལ་གསོ་ཙམ་པོ
ང་ཚོ་སོ་སོ་ལ་དབང་སོང་བ་ཡིན་ནམ
༧
གནམ་གཤིས་ཀྱི་འགྱུར་ལྡོག་དེ
མི་སེམས་སུ་འཐིམ་དུས
མཐོན་པོའི་ཁྲི་དང་འབོལ་གདན་ལས
ཁྲོ་གཉེར་གྱི་སྤྲིན་པ་འཁྲིགས
དྲག་ཆར་བར་མེད་དུ་བབས
ང་རང་བརླན་པར་བྱས
ནང་སེམས་སུ་ལྷུང་བའི་མེད་མུག
སྤང་གི་ཁོད་ཡངས་སུ་འཐབ
མེ་ཏོག་གི་མཛེས་སྡུག
འཇམ་མཉེན དེ་གཉིས་ཀ
སླར་ཡང་སྐྱེ་བར
ལྟ་མཁན་ང་གཅིག་པུ་ཡིན་མི་སྲིད
