སེམས་ཀྱི་རེ་བ།
མདོག་འགྱུར་བའི་གོ་རིམ་ནི
གཏན་ནས་ཡིད་དུ་འོང་བ་ཞིག་ཡིན་མི་སྲིད
མི་རྣམས་ཀྱི་འདོད་པའི་ཁ་དོག་ནི་དཀར་པོ་རེད
དེ་ནག་པོར་བསྒྱུར་མི་འོས་པ་བཞིན
ཆེས་སྙིང་ཉེ་བའི་དུས་ཚིགས་འདིར
ཁྱོད་ཀྱི་སྐྱོ་སྣང་མཐའ་དག་ལས
ངས་བཙལ་བའི་རི་མོ་ཡག་ཤོས་དེ
སྐྱེ་འཆིའི་མཐིལ་དུ་བཞད་པའི་རེ་བ་འདི་ཡིན
༢༠༡༧ལོའི་ཟླ༧པའི་ཚེས༢༢ཉིན།
གླུ་དབྱངས་ཤིག་གི་ཉན་འཕྲོ།
ལིས་ནཱ གྲོང་ཚོ་འདི་རུ་ཁྱོད་ཀྱི་ལོ་ཟླའི་གསེང་གི་འགྲོ་འདུག་མཐའ་དག
རླུང་བུ་ལྟར་ནུབ་ལ་བཞུད་པ་དང་མཚུངས
དོན་ངོ་མར་ངས་སུ་ལའང་བརྩེ་དུངས་ཀྱི་སྐད་ཆ་གླེང་དུས
འུ་གཉིས་ཀྱི་བར་དུ་ཡིད་འོང་གི་གངས་རི་ལྟ་བུའི་ཁ་དོག་ཅིག་ཡོད་པ
ད་ལྟ་ཆེས་ཁ་ཐག་རིང་བའི་སྡུག་ཡུས་ཀྱི་བཙོན་ར་ཞིག་ཏུ་གྱུར་འདུག་པ་ཚོར
ལིས་ནཱ ང་ཚོའི་སེམས་ཀྱི་ཟབ་སར་བཞག་པའི
རྨི་ལམ་འདིའི་ཡུལ་ལྗོངས་གཅིག་པུ་རྒྱང་རིང་ཞིག་ལྟར་བཞག་ཡོད་ནའང
ད་ལྟ་ཞེན་ཆགས་ཀྱི་མཚན་མོ་རེ་རེ་ནི
སྲང་ལམ་འདིའི་གྲིབ་མ་སྣ་ཚོགས་ཀྱི་ཕམ་ཉེས་བཞིན
རྒས་ལ་ཉེ རྒས་ལ་ཉེ
༢༠༡༧ལོའི་ཟླ༦པའི༡༤ཉིན།
གྲོགས་པོ་ཞིག་ལ་ཕུལ་བའི་སྙན་ངག
ཤིན་ཏུ་ཚ་བའི་འཇིག་རྟེན་གྱི་འཁོར་བ་འདི
མུན་པ་སྲབ་མོ་ཞིག་གིས་ཡོངས་སུ་བཏུམས་ཚར་བ་བཞིན
མི་ཚོགས་ཀྱི་འུར་ཟིང་གི་འདམ་མྱག་ལས
བཞད་པའི་མེ་ཏོག་ལ་སྙིང་བོ་མི་འདུག་ཟེར་ན
དེ་ནི་གྲོགས་མེད་ཁེར་རྐྱང་ངང་བཤད་པའི་སྐད་ཆ་ཞིག་ཡིན་ངེས
ངས་ནམ་ཡང་སྨྲེང་སྐྱོ་དང་འབྲེལ་བ་ཡོད་པའི
དུས་ཚོད་ཀྱི་སྔ་ཕྱི་གང་རུང་དང
གཏམ་རྒྱུད་ཀྱི་སྔ་ཕྱི་གང་རུང
ཉིན་གང་བོར་འཐེན་པའི་ཐ་མག་འགའི་དུ་སྣེ་བཞིན
གར་སོང་ཆ་མེད་དུ་གྱུར་ཚར་དུས
སྙིང་བོ་མེད་པའི་ལས་ཀ་དག་རྒྱན་ཆ་སྤྲས་པས་ཀྱང་མི་མཛེས་པ
ཞོར་ནས་རྟོགས་ཡོང
ངས་རང་གི་སེམས་པ་འདི
ནག་པོ་ཡུག་གཅིག་གི་ངོས་སུ་བྲིས་མ་མྱོང་བ་ནང་བཞིན
རླུང་བུའི་རྒྱུ་ཕྱོགས་ལྟར་གོམས་པའི་འཇིག་རྟེན་འདིར
ཇི་མི་སྙམ་པའི་སྐད་ཆ་དག ཆུང་ངུར་བཏང་ནས
བརྒལ་དཀའ་བའི་དུས་ཆད་ཅིག་གི་ངོས་སུ་བཏབ་ཡོད
༢༠༡༧ལོའི་ཟླ༦པའི་ཚེས༢༨ཉིན།
