གྲུ་ཆུང་ནི་ཆུང་ཆུང་ལྟར་སྣང་ཡང
དོན་གྱིས་གྲུ་གཟིངས་ལས་ཀྱང་ཆེ
གལ་ཏེ་ཁྱོད་ཉིད་གྲུ་ཆུང་ལ་བསྡད་ཚེ
ཁ་ལོ་རང་མོས་ཀྱིས་བསྒྱུར་ཆོག་ལ
གང་དུ་འགྲོ་འདོད་ན་དེར་ཕྱིན་ཀྱང་རུང
གྲུ་ཆུང་ནི་རང་དབང་ལ་མོས་པས
སོ་སོའི་འདོད་པ་གང་ཡིན་པ་དེར་བསྟུན་ངེས་ཤིང
གྲུ་ཆུང་ལ་བསྡད་པ་ལྟ་བུའི་རང་དབང་ཞིག་ཡེ་ནས་མེད
གྲུ་ཆུང་ནི་མི་གཤིས་ཀྱི་མཚོན་རྟགས་དང
དུས་རབས་ཀྱི་གདོང་ཁར་འགྲེང་བའི
ཡིད་དུ་འོང་བའི་སྔོན་བསྐྱོད་པར་གྱུར་གཤིས
རྒྱ་མཚོའི་རྒྱབ་སྐྱོར་མཁོ་ལ
བསིལ་རླུང་གི་རམ་འདེགས་དེ་བས་ཀྱང་མཁོ
ཇི་ལྟར་བཤད་ཀྱང མཐར་དེད་ན
གྲུ་ཆུང་ནི་སྙིང་རྗེ་བའི་གཡོར་གྲུ་ཆུང་ཆུང་ཞིག་ལགས་པས
འབྲུག་སྒྲ་ལྡིར་ཞིང་འཐོར་རླུང་རྒོད་དུས
མཚོ་ངོགས་ཅི་འདྲ་ཡངས་ཀྱང
མཚོ་ལ་གོམས་པའི་མཉན་པ་ཞིག་ངེས་པར་དགོས་འདུག
དེ་བས རྒྱ་མཚོ་ནི་གྲུ་ཆུང་གི་འཇིག་རྟེན་དུ་གྲུབ་ཀྱང
གྲུ་ཆུང་གི་བདག་པོར་ནམ་ཡང་འགྱུར་ཐབས་མེད་དེ
གྲུ་ཆུང་ནི་མཉན་པ་ཁོ་ནར་དབང་བས་རེད
ཡིན་ན་ཡང གྲུ་ཆུང་རྒྱ་མཚོར་བསྐྱོད་པའི་སྣང་བ་དང
རྒྱ་མཚོར་གྲུ་ཆུང་ཞུགས་པའི་དགའ་བ་དེ
རྟེན་འབྱུང་ཆོས་ཉིད་ཟབ་མོ་ལས་བྱུང་བ
བསྐལ་བ་སྟོངས་པར་གྱུར་ཀྱང
སུས་ཀྱང་བསྙོན་འདིང་མི་རིགས་སོ
༢༠༡༧.༧.༥
