དེའང་གླིང་གེ་སར་རྒྱལ་པོ་མཆོག་ནི་རབ་བྱུང་དང་པོ་ཚུགས་ཁ་མའི་དྲུག་ཅུ་སྐོར་གྱི་ནང་སྤྱི་ལོ༡༠༠༠ལོ་སྟེ་བོད་ལྕགས་བྱི་ལོར་སྐུ་འཁྲུངས།འཁྲུངས་ལོའི་ཐད་ལ་འདོད་ཚུལ་མི་མཐུན་པ་མང་དུ་མཆིས་མོད་འདི་ནི་སྔོན་གྱི་སྒྲུང་དཔེ་རྙིང་བ་ཁུངས་བཙུན་གྱི་དབང་དུ་བྱས་ཏེ་བྲིས་པ་ཡིན། འཁྲུངས་ཡུལ་གྱི་ཕྱོགས་ལའང་མི་མཐུན་པ་མང་དུ་མཆིས་མོད་དོན་དུ་ད་ལྟ་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་གི་ཁོངས་གཏོགས་ཨ་ཕྱུག་ཡུལ་ཚོའི་ས་ཆ་ས་སྐྱིད་སོས་ཡག་གི་ཁ་མདོ་རུ་ངོས་འཛིན།འཁྲུངས་ཡུལ་ལྕི་སུག་ལ་ངོས་འཛིན་མཁན་ནི།སི་ཏུ་པཎ་ཆེན།སུམ་པ་ཡེ་ཤེས་དཔལ་འབྱོར།གཏེར་ཆེན་མཆོག་གྱུར་གླིང་པ།མི་ཕམ་འཇམ་དཔལ་དགྱེས་པའི་རྡོ་རྗེ།རིག་འཛིན་འགྲོ་འདུལ་དཔའ་བོ།གཏེར་ཆེན་ལས་རབ་གླིང་པ།གཞན་ཡང་ལྷ་གླིང་གབ་ཙེ་རྩོམ་པ་པོ་དང་།འབྲི་འཇམ་དབྱངས་གྲགས་པ།རྗེ་འཇིགས་མེད་ཕུན་ཚོགས་འབྱུང་གནས་སོགས་སྔོན་དང་ཕྱིས་ཀྱི་མཁས་གྲུབ་གཉིས་ལྡན་སྐྱེས་བུ་དམ་པ་གང་མང་ཞིག་གི་དགོངས་པ་གཅིག་མཐུན་ལགས་ཤིང་།དེར་མ་ཟད་རྒྱ་བཟའི་སྦྲ་མལ་དང་།ཇོ་རུའི་སྐུ་རྗེས།བླ་མཚོ་ཆུ་མིགབྲག་ནག་ལུང་མདོར་ཨ་མྱེ་སྒོམ་པའི་སྒྲུབ་ཕུགསྐྱི་རྒྱལ་སྟག་རི།ལྕི་ཡི་ལུང་པ་བཅུ་གསུམ་གྱི་ཆུ་རྒྱུན་དང་ལུང་གདོང་ཁ་གྱུར་ཕྱོགས་སོགས་མངོན་སུམ་མིག་གི་ཡུལ་དུ་སྔར་གྱི་བཤད་སྲོལ་མ་ཉམས་པར་ད་ལྟའང་བདེན་པ་ར་འཕྲོད་པ་ཡོད།དགུང་ལོ་ལྔ་པའི་དུས་སུ་བླ་མ་ཨོ་རྒྱན་པདྨས་རྨ་ཁོག་ཏུ་ས་བཟུང་དགོས་པའི་ལུང་བསྟན་བྱུང་བ་ལྟར་ལམ་ནས་སྦྲུལ་མགོ་མདའ་རུ་ལོ་གཅིག་ལྷག་ཙམ་ལ་བཞུགས།དགུང་གྲངས་བདུན་ལ་སོན་པ་ན་རྨ་ཡུལ་དུ་འགོག་མོ་མ་བུས་ས་བཟུང་པ་ནས་ས་བཟུང་དང་པ་དང་།དེ་ནས་རྨ་སྨད་དུ་བསེ་རག་ཨ་བྲས་གང་ཡོད་པ་ན་ཇོ་རུས་ཨ་བདུད་བསྒྲལ་བ་སོགས་ལ་ས་བཟུང་གཉིས་པ་དང་།ཇོ་རུ་དགུང་ལོ་བརྒྱད་ཀྱི་དུས་ཡན་ལ་གླིང་པ་སྤྱི་ཁྱབ་རྫ་འབྲི་གཉིས་སུ་གཞིས་ཆགས་ཡོད་པས་ད་ལྟའང་ཁམས་སྡེ་དགེའི་ས་ཆ་སོགས་སུ་གླིང་གི་མཁར་ཤུལ་མང་པོ་ཡོད།དེ་དུས་གླིང་ཡུལ་ཁ་བས་མནན་ཏེ་གླིང་ལ་ས་བགོས་བྱས་ནས་རྨ་ཡུལ་དུ་ཆགས་པ་ལ་ས་བཟུང་གསུམ་པ་ཞེས་བྱ།དེ་ལྟར་ན་གླིང་གེ་སར་རྒྱལ་པོ་ནི་ཁམས་ཀྱི་སྡེ་དགེ་རུ་འཁྲུངས་ཤིང་ཁོང་དགུང་ལོ་བརྒྱད་ཀྱི་དུས་གླིང་པ་སྤྱི་ཁྱབ་ཨ་མདོའི་རྨ་ཡུལ་དུ་གཞིས་ཆགས།དགུང་གྲངས་བཅུ་གཉིས་ཀྱི་དུས་སུ་མ་ནེ་ནེ་གནམ་སྨན་དཀར་མོས་ལུང་བསྟན་ལ་ལྷ་རྟ་རྐྱང་བུ་བཟུང་ནས་རྟ་རྒྱུགས་ཀྱི་རྒྱལ་འཇོག་བྱས་ཏེ་སྐྱ་ལོའི་རྒྱུ་བདགའབྲུག་མོའི་སྐྲ་བདགགླིང་དཀར་གྱི་རྒྱལ་པོ་རྣམས་བྱེད་དགོས་པར་སྐུལ་མ་གནང་མཐར་ཁྲོ་ཐུང་ལ་ལུང་རྫུན་ཕབ་རྗེས་གླིང་དཀར་པོའི་དཔལ་བརྟུལ་ཐམས་ཅད་ཀྱིས་གསེར་ཁྲི་ཁམས་གསུམ་ཟིལ་གནོན།སྐྱ་ལོའི་སེང་ལྕམ་འབྲུག་མོ།ཕ་ཟོག་ནོར་བུ་ཆ་བདུན།ཀླུ་འབུམ་པོ་ཏི་བཅུ་གཉིས།ཀླུ་སྦྲ་མཐིང་ཤོག་གུང་དགུ།སྐུ་མཁར་སེང་ཕྲུག་སྟག་རྩེ།གླིང་སྡེ་ཁྲི་སྐོར་བཅུ་གཉིས་བཅས་རྟ་རྒྱུག་གི་རྒྱན་ལ་འཇོག་རྒྱུའི་གྲོས་ཐག་བཅད།གླིང་གེ་སར་རྒྱལ་པོ་སྟོབས་ཀྱི་འཁོར་ལོས་བསྒྱུར་བའི་རྒྱལ་པོ་ཡིན་པས་རྒྱལ་སྲིད་སྣ་བདུན་དབང་དུ་བྱས་ཏེ།དེའང་སྒྲོལ་མ་གདཀར་མོའི་རྣམ་འཕྲུལ།སྐྱ་ལོའི་སེང་ལྕམ་འབྲུག་མོའི་སྒོ་གསུམ་དབང་དུ་བསྡུས་པ་ནི་བཙུན་མོ་རིན་པོ་ཆེ་དང་།མ་འགོག་མོ་དང་སྲུ་འབྲུག་མོ་གཉིས་ཀྱིས་བོད་ཀྱི་སྤེན་ནེ་རི་བཀྲ་ནས་གླང་ཆེན་གྱི་སྟོབས་དང་རྟ་མཆོག་གི་འགྲོས་དང་ལྡན་པའི་ལྷ་རྟ་རྐྱང་རྒོད་འཕེལ་བོ་འཕྲུལ་གྱི་ཞགས་པས་དབང་དུ་བསྡུས་པ་ནི་གླང་པོ་རིན་པོ་ཆེ་དང་རྟ་མཆོག་རིན་པོ་ཆེ་དབང་དུ་བྱས་པ་དང་།མི་མགོན་དཀར་པོའི་ཕུག་ནོར་ལྕག་ཚན་བསམ་པའི་དོན་གྲུབ་སེང་ལྕམ་འབྲུག་མོས་ཕུལ་བ་ནོར་བུ་རིན་པོ་ཆེ་དང་།པཎ་ཆེན་བི་མའི་རྣམ་འཕྲུལ་འདན་མ་རིན་ཆེན་བསམ་གྲུབ་ལ་དབང་དང་གདམས་པ་གནང་ནས་དམག་དཔོན་དུ་མངའ་གསོལ་བ་དམག་དཔོན་རིན་པོ་ཆེ་དང་།མ་འདྲེས་བཅོ་བརྒྱད་ཀྱི་མུ་ཁྱུད།མི་འཇིགས་པ་རྣམ་བཞིའི་ལྟེ་བ།སྟོབས་བཅུའི་རྩིབས་དང་ལྡན་པའི་སྐུ་དངོས་ཀྱི་འཁོར་ལོ་གདུལ་བྱ་རྣམས་ལ་ངོམ་ནས་གསེར་གྱི་ཁྲི་ལ་དབང་བསྒྱུར་བ་ནི་འཁོར་ལོ་རིན་པོ་ཆེ་དང་།རྨ་ཆེན་སྤོམ་རས་རང་གི་སྲོག་སྙིང་ཕུལ་ནས་བྲན་དུ་ཁས་བླངས་ཁྱིམ་བདག་རིན་པོ་ཆེ་སྟེ་རྒྱལ་སྲིད་སྣ་བདུན་ལ་དབང་བསྒྱུར་བའོ།།
རྒྱལ་སྲིད་སྣ་བདུན་ལ་དབང་བསྒྱུར་ཚུལ་འདི་ཆོས་རྗེ་ཡིད་བཞིན་ནོར་བུ་མཆོག་གི་ཞལ་གསུང་ལྟར་བྲིས་པ་ཡིན།དེའང་དགུང་གྲངས་བཅུ་གཉིས་ཡན་ཆད་དུ་ཆས་ངན་པའི་ཚུལ་བཟུང་ནས་སྐུ་དངོས་སུ་མ་བསྟན་ཅིང་དགུང་གྲངས་བཅུ་གསུམ་པར་གསེར་ཁྲི་ལ་རོལ་པ་དང་མཛེས་སྐུ་དངོས་དེ་འཁོར་རྣམས་ཀྱི་མིག་གི་དགའ་སྟོན་དུ་སྣང་བར་བྱས་ཏེ་ད་ལྟ་དར་ལག་རྫོང་ཁོངས་ཁྲ་གླིང་དགོན་པའི་ཉེ་འདབས་ཀྱི་ཕོ་བྲང་སེང་ཕྲུག་སྟག་རྩེ་གླིང་གི་རྒྱལ་ས་བྱས།ཕོ་བྲང་སེང་ཕྲུག་སྟག་རྩེའི་ཤུལ་དེ་ནི་ཆོས་རྗེ་དམ་པ་ཡིད་བཞིན་ནོར་བུས་ངོས་འཛིན་བྱས་ཏེ།དེའང་སྤྱི་ལོ༡༩༩༠ལོ་སྟེ་བོད་ལྕགས་རྟ་ལོར་མགོ་ལོག་དར་ལག་ས་ཆའི་ཁྲ་གླིང་དགོན་དུ་ཕེབས།དགེ་འདུན་པ་སྟོང་ཕྲག་ལྷག་ལ་དམ་ཆོས་བདུད་རྩིས་མངོན་པར་བསྐྱངས་ཏེ་རྗེ་ཉིད་ཀྱི་དག་སྣང་ཆོས་སྐོར་ལས་འཛམ་གླིང་གེ་སར་གྱི་ཆོས་སྐོར་གྱི་དབང་བསྐུར་ཅིང་གླིང་རྗེ་གེ་སར་རྒྱལ་པོ་དགྲ་བླ་ཝེར་མའི་ཚོགས་ལ་ཕྲིན་ལས་བཅོལ་ཏེ།ཁོང་གི་ཞལ་ནས།ས་འདི་གླིང་ས་མཐོང་བ་ཀུན་སྨོན་རེད།རྨ་སྨད་གཡུ་ལུང་སུམ་མདོར་སྟོད་ན་སེང་ཕྲུག་སྟག་རྩེ་ཡོད།བར་ན་རྒོད་ཚང་ཁ་གཡེལ་ཡོད།སྨད་ན་ཇ་མཁར་རིང་མོ་ཡོད།ཁྱད་པར་སེང་ཕྲུག་སྟག་རྩེའི་མཁར་ཤུལ་རྙེད་ན་དགོས་པ་ཆེན་པོ་ཡོད།ཁྱེད་ཅག་མཁྱེན་ལྡན་ཁ་ཤས་གཟིགས་ཞིབ་བྱེད་དུ་སོང་དང་།ནམ་རྒྱུན་མི་མངོན་པའི་གནས་སུ་གྱུར་ཡོད་ཀྱང་དེ་རིང་གེ་སར་དགྲ་བླ་ཝེ་མའི་ཚོགས་ལ་འཕྲིན་བཅོལ་བྱས་པའི་མཐུས་ངེས་པར་རྙེད་འོང་གསུངས།ལྕགས་རྟ་ལོའི་ཟླ་བ་གསུམ་པའི་ཚེས་ཉེར་བཞི་གཟའ་སྤེན་པ་རྒྱུ་སྐར་མོན་གྲུའི་ཉིན་མཁན་སྤྲུལ་བཞི་རླངས་འཁོར་ལ་བསྡད་ནས་སོང་ཚེ་ལམ་ནས་རྟགས་དང་རྟེན་འབྲེལ་ཕུན་སུམ་ཚོགས་པ་བྱུང་སྟེ་ཁྲ་གླིང་དགོན་ནས་ལེ་བར་ལྔ་ལྷག་ཙམ་ལ་སླེབས་པ་ན་གནས་ཡིད་དུ་འོང་བ་ཐང་ཆེན་པོ་པདྨ་འདབ་མ་སྟོང་དང་འདྲ་བའི་དཀྱིལ་ན་ཡོང་ཁུངས་འཚོལ་ནའང་མི་རྙེད་པའི་བོ་ཐོའི་ཐོ་གསར་བའི་རྟགས་ཤིག་བསླངས་འདུག་པ་མཐོང་།དེའི་ཚེ་ནམ་མཁའ་ནས་འབྲུག་སྒྲ་སྙན་པར་བསྒྲགས་ཤིང་སྦྲང་ཆར་ཡང་བབ་པ་དང་།ས་དེར་ངོ་མཚར་བའི་མེ་ཏོག་གསར་དུ་བཞད་འདུག་པ་སོགས་སྔོན་ཆད་མཐོང་མ་མྱོང་བའི་ངོ་མཚར་བའི་རྟགས་མཚན་དུ་མ་བྱུང་།དེ་ཐམས་ཅད་ཀྱིས་ཐོ་ཡོད་ས་དེ་ནི་མཁར་ཤུལ་ཡིན་པར་ཐག་ཆོད་ནས་དར་དཀར་པོ་སྲིད་དུ་རིང་བ་ཞིག་ཕུལ།དེར་མ་ཟད་ས་དེ་ནས་སྒྲོམ་བུ་གསུམ་རྙེད་པ་ཆོས་རྗེ་མཆོག་ལ་ཕུལ་ནས་ལོ་རྒྱུས་ཞིབ་ཏུ་སྙན་ལ་ཞུས་པར་ཐུགས་ཤིན་ཏུ་དགྱེས་ནས་མཁར་ཤུལ་དེ་ནོར་འཁྲུལ་མེད་པར་འདུག་གསུངས།རྗེ་ཉིད་ཀྱང་དེ་ལ་ཕེབས་པར་མ་ཟད་བྱོན་ཁར་ཁོང་གིས་བསམ་ཡས་ནས་གཏེར་དུ་བཞེས་པའི་གེ་སར་ཡབ་ཡུམ་གྱི་བྱང་སེམས་དཀར་དམར་དང་བྱེ་མ་ཨ་ཀྲོང་ལས་གྲུབ་པའི་གུ་རུའི་སྐུ་སོར་བཞི་ཙམ་འདུག་པ་དེ་དང་སྐུ་གསུང་ཐུགས་རྟེན་བཅས་གནས་ནས་གེ་སར་ཕོ་བྲང་དེ་བཞེངས་དགོས་ཤིང་འགྲུབ་ངེས་པ་ཡིན་པའི་བཀའ་བསྩལ།ཕོ་བྲང་འདིའི་ནང་རྟེན་ཕེར་བ་ལ་འཛམ་གླིང་ན་གུ་རུའི་སྐུ་འདི་ལས་མེད་ཅིང་གེ་སར་གྱི་སྐུ་དངོས་དང་ཁྱད་པར་མེད་ཅེས་གསུངས་སོ།། དེ་ལྟར་སྔོན་གནས་རྗེས་དྲན་གྱིས་སྔོན་ཆད་གླིང་གེ་སར་རྒྱལ་པོའི་ཕོ་བྲང་སེང་ཕྲུག་སྟག་རྩེ་དུས་ཀྱིས་བསྐལ་བས་བར་ལམ་ཞིག་ནས་སུས་ཀྱང་ངོ་མི་ཤེས་པར་གྱུར་པ་ལ་རྗེ་ཉིད་ཀྱིས་རྟགས་མཚན་ཁྱད་པར་ཅན་གྱི་སྒོ་ནས་ངོས་བཟུང་ཏེ་ཀུན་ཡིད་ཆེས་པར་བྱས།རྗེས་སུ་ཁྲ་གླིང་དགོན་པའི་བླ་སྤྲུལ་འགས་འགན་ཁུར་ཏེ་སེང་ཕྲུག་སྟག་རྩེ་བསྐྱར་བཞེངས་བྱེད་པའི་སྐབས་ཀྱང་ངོ་མཚར་བའི་རྟགས་མཚན་མང་དུ་བྱུང་འདུག་ཅིང་བར་ཆད་མེད་པར་གྲུབ་པ་ད་ལྟ་ཀུན་གྱིས་ལྗོངས་རྒྱུ་དང་མཇལ་བསྐོར་གྱི་རྟེན་དུ་ཡོད་པ་འདིའོ།།སླར་ཡང་ཤིང་ཁྱི་ལོའི་ཟླ་བ་ལྔ་པའི་ཚེས་ཉེར་དྲུག་ལ་རྗེ་ཉིད་ཕེབས་ནས་ཚེས་ཉེར་བདུན་ཉེན་ཕོ་བྲང་ནང་ནས་བླ་གྲྭ་སུམ་བརྒྱར་ཉེ་བ་ལ་ཕུར་བ་མགུར་ཁུག་མ་དང་གླིང་གེ་སར་གྱིས་སྨིན་བྱེད་ཀྱི་དབང་བསྐུར།ཡེ་ཤེས་པ་དབབ་པའི་སྐབས་གསུང་མཐོན་པོས་ཕི་ཕི་ཞེས་གསུངས་ཚེ་གློ་བུར་དུ་གེ་སར་གྱི་ཕྱག་གི་མདུང་མོ་འཕག་ཏེ་མཆོད་ཁྲིའི་སྟེང་དུ་བབ་པའི་རྟགས་ངོ་མཚར་བ་བྱུང་ཞིང་ས་དེ་ནི་གངས་ལྗོངས་སྤྱིའི་སྙེགས་པའི་རྒུད་པ་ཞི་བའི་ས་གནད་ཁྱད་པར་ཅན་ཞིག་ཡིན་པར་འདུག་གོ།
གླིང་གི་ལོ་རྒྱུས་འདི་ལ་ཁ་ཅིག་ན་རེ།གངས་ཀྱི་སེང་གེ་གར་ཡང་མ་མཆིས་ཤིང་།།གེ་སར་རྒྱལ་པོ་གུད་དུ་མི་བཞུགས་མོད།སྒྲོ་བཏགས་སེམས་ལ་དངོས་སུ་སྣང་བ་འདི།།སྙན་ཚིག་སྒྲ་ཡི་བརྗོད་བྱར་ཅིས་མི་རུང་།།ཞེས་ཟེར་བ་དང་།ཡང་དཔེར་ན་གེ་སར་ཡང་གྲུ་གུའི་རྒྱལ་པོ་མི་ཉག་ལ་གཡུལ་འགྱེད་མཁན་ཞིག་ཡོད་པ་དེའི་གཏམ་ཡིན་མདོག་ཁ་བས་ཙ་བ་ཙམ་ཡོད་ཀྱང་མི་སྲིད་མོད།ཆེས་ཆེར་ཐལ་ནས་མཛུབ་མོ་འཛུགས་ས་འདི་ཡིན་སྟོན་རྒྱུ་མེད་པ་བཞིན་ནོ།།ཞེས་གླིང་གེ་སར་ཞེས་བྱ་བ་ཞིག་མེད་པར་འདོད་མཁན་ཡང་ཡོད་མོད་ཁོང་ལ་དགོས་དབང་རེ་ཡོད་ན་དེར་ཟད་ལ་དེ་མིན་རྒྱུ་མཚན་མེད་པའི་གཏམ་སྟེ།གོང་དུ་བཤད་པ་ལྟར་འཁྲུངས་ཡུལ་དང་འཁྲུངས་སྐབས་དང་རྒྱལ་ས་སོགས་རེ་རེ་ན་བདེན་པ་ར་སྤྲོད་པ་དེ་ག་རང་རེད་ལ།དེ་ལ་དངོས་ཡོད་ལོ་རྒྱུས་མི་ཟེར་ན་དངོས་ཡོད་ལོ་རྒྱུས་ཟེར་བ་ཅི་འདྲ་ཞིག་ལ་སྨྲ་དགོས་སོ།།དེར་མ་ཟད་ཡིད་རྟོན་འོས་པའི་སྔོན་གྱི་ལོ་རྒྱུས་མང་པོ་ཞིག་ན་གླིང་གི་ལོ་རྒྱུས་བཤད་ཡོད་མོད་འདིར་རེ་རེ་ནས་ལུང་དུ་དྲངས་ན་ཡི་གེ་མང་བར་འགྱུར་བས་བཞག་ཅིང་།འདིར་དེ་ལས་རླངས་ཀྱི་པོ་ཏི་བསེ་རུ་ཞེས་ལོ་རྒྱུས་རྙིང་པ་དེ་ལས་ཇི་ལྟར་བསྟན་ཡོད་པའི་སྐོར་ལུང་དྲངས་ནས་བཤད་པར་བྱ་སྟེ།དེ་ལས།དེ་ནས་ཁོང་གིས་ཤར་དུ་བྱོན།གེར་འཚོའི་མགུལ་དུ་བྱོན་པ་ལ།།གླིང་རྗེ་གེ་སར་གྱིས།སྲིན་གྱི་བེར་ནག་པོ་ཐོག་གདུགས།སྲིན་རལ་ཁྲའོ།སྲིན་རྟ་ནག་པོ་གསུམ་ཕུལ་ནས།མི་འཆི་ཚེའི་དབང་ཞིག་ཞུ།ངས་གདུག་པའི་ལྷ་འདྲེ་འདུལ་བ་ལ།ཁྱེད་ཀྱིས་བདག་གི་ལུས་སྐྱོབ་མཛོད།།ཟེར་ནས།ཁོང་གི་ཞལ་ནས།ཁྱོད་འཆི་བའི་དུས་ལ་བབ་པ་ལ།།རང་རེས་འབད་ཀྱང་ག་ལ་བརྟེན།།བདུད་ཀྱི་བར་ཆད་མི་འབྱུང་བ།།རྣལ་འབྱོར་བདག་གིས་སྲུང་མ་བྱེད།།ལོ་ནི་བརྒྱད་ཅུ་རྩ་བརྒྱད་བར།།སྐྱེས་བུ་ཁྱོད་ཀྱི་ཚེ་ཚད་ཡིན།།དེར་ཁོང་ལ་སྤོམ་རས་མགོ་བྱས་པའི་མདོ་ཁམས་ཀྱི་ལྷ་འདྲེ་ཐམས་ཅད་ཀྱིས་བསུ་བ་བྱས་ནས།རྒྱ་ནག་རི་བོ་རྩེ་ལྔར་བྱོན།ཞེས་སོགས་དང་།ཡང་ཡང་གེ་སར་རྒྱ་ལ་བྱོལ་རྟ་བསྐྱལ་ནས།ཁྱེད་གདན་འདྲེས་པ་ལ་ཡོང་བས།གྲུབ་པ་ཐོབ་པའི་རྣལ་འབྱོར།།བོད་ཀྱི་ཡུལ་དུ་འབྱོན་པར་ཞུ།།བདག་ལ་ཁྲིམས་ཀྱི་དངུལ་མདུང་ཀེ་རུ་དང་།ཁྲིམས་ཀྱི་རྔ་བོ་ཆེ་ཟིལ་གནོན་དང་།ཁྲིམས་དར་ནག་པོ་ཟིལ་གནོན་དང་།རྒྱ་ནོར་བསམ་གྱིས་མི་ཁྱབ་པ་འབུལ་རྒྱུ་ཡོད་ཟེར་ནས་ཞུས།དེར་གྲུབ་ཐོབ་ཆེན་པོ་ལ་མཁའ་འགྲོ་མའི་ལུང་བསྟན་བྱུང་ནས།སྟོད་ནུབ་ཕྱོགས་ཨོ་རྒྱན་བྱང་ངོས།།སྲིན་པོ་ཕོ་མོ་འདུ་བ་དང་།།ཐང་ཡིག་རིན་ཆེན་སྒྲོན་མེ་དང་།།བསྟན་པ་འགྱོགས་པའི་གླང་པོ་དང་།།རྣལ་འབྱོར་ཁྱེད་ལ་མཁོ་བ་ཡི།།རླངས་ཀྱི་པོ་ཏི་བསེ་རུ་དང་།།བཀའ་དང་བསྟན་བཅོས་གཏེར་དུ་ཡོད།།རྣལ་འབྱོར་བཀའ་དང་གླིང་ཕྲུག་ཆོངས།།གཏེར་ཁ་ཆེན་པོ་ཐོན་པར་ཡོད།།ཟེར་བའི་མཁའ་འགྲོའི་ལུང་བསྟན་བྱུང་ནས།དེ་ནས་ཁོང་གིས་གླིང་གེ་སར་བཀའ་ལ་གནང་ནས།ཞེས་སོགས་དང་།ཡང་གླིང་གི་གླིང་ཡུལ་གོར་མདོར་བྱོན་པ་དང་།གླིང་གི་རྒྱལ་པོ་གེ་སར་དེས།ཡོལ་གྱི་ཡོལ་སྟོད་དུ་ཕྱག་ཕབ་དང་།གླིང་རིང་གི་མི་ཚོ་དེར་འབུལ་བ་བྱེད་དུ་བྱུང་།ཁོང་གིས་ཐང་ཡིག་རིན་པོ་ཆེའི་སྒྲོན་མ།བསྟན་པ་འགྱོགས་པའི་གླང་པོ།རླངས་ཀྱི་པོ་ཏི་བསེ་རུ།ཁྲིམས་ཀྱི་རྔ་བོ་ཆེ་ཟིལ་གནོན།ཁྲིམས་ཀྱི་དངུལ་མདུང་ཀེ་རུ།ཁྲིམས་དར་ནག་པོ་དགྲ་འདུལ།སློབ་དཔོན་པདྨའི་ཆོས་སྐོར།དབུ་ཞྭ།ན་བཟའ།ཆགས་འུ་དང་བཅས་པ་རྣམས་དང་།ཆིབས་པ་ཕ་བོང་ག་པ་རྟ་འདྲ་ཕུལ་ནས་ཞུ་བ་བྱས་པ་ལ།ཁྱེད་གྲུབ་པ་ཐོབ་པའི་རྣལ་འབྱོར་པ།སངས་རྒྱས་ཀྱི་བསྟན་པ་འཛིན་པ་དང་།གདུག་པའི་ལྷ་འདྲེ་འདུལ་བ་དང་།གླིང་གི་མི་ནོར་འཕེལ་བ་དང་།།མི་ནད་ཕྱུགས་ནད་གཅོད་པ་དང་།།བོད་ཁམས་བདེ་བས་ཐུགས་ལ་ཞོག།གྲུབ་ཐོབ་བཞུགས་པའི་སྐུ་རིང་ལ།།རྒྱུན་ཆད་མེད་པར་མཇལ་བར་ཞུ།།མི་རྟག་འདའ་བའི་ཚུལ་སྟོན་ན།།བདེ་བའི་གནས་སུ་བདག་ཀྱང་ཁྲིད།།ད་རེས་འབུལ་བའི་སྔ་མར་ཞུ།།ཟེར་ནས་ཞུས་སོ།།སེང་བློན་གྱིས་ཁྲ་བོ་གཡང་ལུགས།ཁྲ་རྒན་གྱིས་ཐོག་རྒྱུགས་དཀར་པོ།ཁྲོ་ཐུང་གིས་ཤང་ལང་ནག་པོ།ལྡོམ་བུའི་དཀར་མོ་རུབ་གདུགས།ཞལ་དཀར་གྱིས་གངས་དཀར་ལྷ་རྩེ།བན་དེས་གཡུལ་དམར་འོད་གསལ།།ཤེལ་རིས་གསེར་གྱི་མཆོད་རྟེན་ཕུལ།གླིང་གི་གཙོ་བོ་སུམ་ཅུ།ཐུལ་པ་སུམ་ཅུ།སྟག་ཤར་སུམ་ཅུ།བླ་མཆོད་སུམ་ཅུ།མོ་བཙུན་སུམ་ཅུ་རྣམས་ཀྱིས།མི་རེས་འབུལ་བ་རེ།ཞུ་བ་རེ་བྱས།གྲུབ་ཐོབ་ཆེན་པའི་ཞལ་ནས།ཁ་བ་ཅན་ལ་གནོད་པའི་འདུལ་དགོས་ཅི་འདྲ་ཡོད།།བདག་གིས་བཀའ་དང་དབང་བསྐུར་ན།།ཡོན་བདག་ཁྱེད་ཀྱིས་ཐུལ་ནས་ཡོང་།།མི་དགེ་སྤོངས་དང་དགེ་བ་ཡོང་།སྙིང་རྗེ་བསྒོམ་ན་བྱམས་སེམས་ཡོང་།།བླ་མ་བསྒོམ་ན་བྱིན་རླབས་ཡོང་།།ཡི་དམ་བསྒོམ་ན་དངོས་འགྲུབ་ཡོང་།།སྙིང་རྗེ་སྒོམས་ལ་སྦྱིན་པ་ཐོང་།།སྡིག་པ་སྤོངས་ལ་དགེ་བ་གྱིས།།བསོད་ནམས་རྒྱུན་ཆད་མེད་པར་ཡོང་།།དགེ་སྡིག་ཤན་འབྱེད་ཀྱི་ཆོས་སྐོར་འདི།།སྐལ་ལྡན་རྣམས་ཀྱི་ཆོས་སྐལ་ཡིན།།གསུང་བའི་བསྟན་ཆོས་གསུངས་ནས།འགྲོ་དགོས་གསུངས་པ་ལ།གླིང་གེ་སར་གྱིས་ཞུས་ནས།ཁ་བ་ཅན་ལ་གནོད་པ་ཀུན།།བདག་གིས་ཐུལ་ཡང་མི་ཐུལ་བས།།ཁྱོད་སློབ་དཔོན་བཀའ་ལ་མི་བརྩི་བར།།སེམས་ཅན་ཀུན་གྱི་སྲོག་བཅད་ན།།རྒྱལ་ཁམས་ཙམ་ལ་གནོད་པ་ཡིན།ཤར་ན་དྲི་ཟ་རྒྱལ་པོ་ཡོད།།ལྷོ་ན་གཤིན་རྗེ་རྒྱལ་པོ་ཡོད།།ནུབ་ན་སྲིན་པོ་གུར་དུམ་ཡོད།།བྱང་ན་གནོད་སྦྱིན་ཕོ་མོ་ཡོད།།ཕྱོགས་འདི་ཐུལ་ལ་དམ་དུ་ཁོལ།།བོད་ཁམས་བདེ་བས་ཐུགས་པ་ཐོགས།།གླིང་གི་ཐང་བརྒྱད་ཐང་སྟོད་འདི།།གྲུབ་ཐོབ་ཁྱེད་ཀྱི་དགོན་པར་འབུལ།།གླིང་གི་ས་ཡུལ་གར་བདེ་དེ།།གྲུབ་ཐོབ་བཞུགས་པའི་གནས་སུ་འབུལ།།ཕ་བོང་ག་པ་རྟ་འདྲ་དེ།།ལྷ་འདྲེ་འདུལ་བའི་ཆིབས་པར་འབུལ།།ཟེར་བ་ཞུས་པ་དང་།།ཁོང་ཡོན་མཆོད་གཉིས།།གླིང་གི་ཡུལ་ཐང་བརྒྱད་ཡོལ་དེ་ཡག་ཐང་དང་།ཡུལ་རྣམས་ཀྱི་སྟོད་སྨད་ལ་བྱོན་ནས།ཕ་བོང་ག་པ་རྟ་འདྲའི་རྩར་བཞུགས།དཀོན་མཆོག་ལ་མཆོད་པ་ཕུལ།ཆོས་སྐྱོང་རྣམས་ལ་གཏོར་མ་བྱིན།ལྷ་འདྲེ་རྣམས་ལ་དམ་གཏོར་བཏང་།ཞེས་སོགས་དང་།ཡང་དེ་ལས་གྲུབ་ཐོབ་དང་།སྤོམ་རས་གླིང་གི་ཡུལ་དུ་བྱོན་པ་ལ།སྤོམ་རས་ཞུས་ནས།ང་ཡི་ཡུལ་དུ་འབྱོན་པར་ཞུ།ཞེས་སོགས་དང་།ཡང་གྲུབ་ཐོབ་དང་།སྤོམ་རས་གླིང་གི་ཡུལ་དུ་བྱོན་པ་ལ་ཞེས་སོགས་དང་།ཡང་དེ་ནས་ཁོང་གིས།གླིང་གི་ཡོན་བདག་ཕོ་མོ་རྣམས་ལ།དངོས་གྲུབ་ཀྱི་གནང་སྦྱིན་བྱས།ཆོས་ཀྱི་དབང་ལུང་མང་དུ་བྱས་ནས་གསུང་བྱོན་ནོ།།ང་རྣལ་འབྱོར་བྱང་ཆུབ་འདྲེ་བཀོལ་ངེས།།གུང་ནས་རིག་པ་ཆོས་ལ་སད།།སངས་རྒྱས་བསྟན་པ་དར་བར་བྱས།།གནོད་པའི་ལྷ་སྲིན་བཏུལ་ནས་ཡོད།གླིང་གི་མི་ནོར་འཕེལ་བར་ཡོང་།།ཁྱེད་ཡོན་བདག་ཚེ་སྲོག་བརྟན་པར་ཡོང་།།ད་རྣལ་འབྱོར་པ་ང་རང་རྒྱུད་པ་སྤེལ།།གསུངས་ནས་བྱོན།དེར་གེ་སར་གྱིས་ཁོང་ལ་ཞུས་ནས།ཁྱེད་གྲུབ་ཐོབ་གར་འབྱོན་ངའི་ཡུལ་དུ་བཞུགས་པར་ཞུ།དེ་ནས་མི་བཞུགས་འབྱོན་པ་ན།སྒྲུབ་གནས་གར་ཡོད་གསུང་བར་ཞུ།འབུལ་བ་མཁྱེར་ནས་མཇལ་དུ་ཡོང་།།དེ་མིན་བདག་ཀྱང་འཁྲིད་པ་ཞུ།གྲུབ་ཐོབ་ཀྱི་གསུངས་ནས།ཡོན་བདག་གླིང་རྗེ་དད་པ་ཆེ།མི་རབས་མང་བའི་གོང་རོལ་ནས།།ཚེ་རབས་མང་པོའི་གོང་རོལ་ནས།སྨོན་ལམ་བཏབ་པའི་ཡོན་མཆོད་ཡིན།།ང་ཡི་ཕ་ཡུལ་སྟོད་དུ་ཡོད།།སོགས་ནས་དགོན་པ་དང་སྒྲུབ་པ་བྱེད་པ་ཡིན་ཞེས་པའི་བར་གསུངས་ནས་བྱོན།གེ་སར་ཡང་ཡུལ་ལ་བྱོན།ཞེས་དང་།ཡང་གླིང་རྗེ་གེ་སར་གྱིས་སྔར་འབུལ་བྱས་པ་དང་དའི་འབུལ་བ་སྐྱེལ་བ་ལ་ཡོང་བས།བདག་ལ་རིགས་ཀྱི་རྒྱུད་ཀྱང་མེད།བདག་ཀྱང་ཁྱེད་ལ་དངོས་གྲུབ་ཞུ།ཟས་འཛད་པ་མེད་པའི་དངོས་སུ་གྲུབ་ཞུ།ལུས་ངལ་དུབ་མེད་པའི་དངོས་གྲུབ་ཞུ།སེམས་མཉམ་བཞག་མི་སྡུག་པའི་དངོས་གྲུབ་ཞུ།ལུས་ངལ་དུབ་མེད་པའི་དངོས་གྲུབ་ཞུ།སེམས་མཉམ་བཞག་མི་སྡུག་པའི་དངོས་གྲུབ་ཞུ།ཁ་མི་སྐོམ་བདུད་རྩིའི་དངོས་གྲུབ་ཞུ།མཚོན་གྱིས་མི་ཆོད་པའི་དངོས་གྲུབ་ཞུ།ཞུས་པ།མཚན་ལྡན་གྱི་ཀ་པྰ་ལ་ལྟག་སྤྲོད།ཟད་མེད་བཅུད་ལེན་གྱི་གདམས་པ།སྐོམ་མེད་ཆུའི་བདུད་རྩི་ཆད་མེད།ཆོད་མེད་ལུས་ཀྱི་བརྟན་པ།རྟ་མེད་ལུང་གི་རྩོལ་བ།གདམས་ངག་དང་དངོས་གྲུབ་རྟག་ཅིང་ཡོད་པ་གནང་ནས་གེ་སར་ཡང་སོང་།དེ་ཉིན་བཙུན་མོ་ལ་སྲས་གཅིག་འཁྲུངས་པས།ཁོང་གི་ཚེས་སུ་སྲས་ལ་མིང་རྟག་ཚབ་ཏུ་བཏགས།སོགས་གླིང་གི་སྐོར་གླེང་པ་མང་དུ་ཡོད་ཅིང་གླིང་གེ་སར་གྱིས་རླངས་བྱང་ཆུབ་འདྲེ་བཀོལ་བསྟེན་ཚུལ་དང་གླིང་གེ་སར་གྱི་སྐུ་ཚེའི་ཚད་ལ་རླངས་བྱང་ཆུབ་འདྲེ་བཀོལ་གྱིས་དགུང་གྲངས་བརྒྱད་ཅུ་གྱ་བརྒྱད་ཡིན་པའི་ལུང་བསྟན་དང་།ཕ་བོང་ག་པ་རྟ་འདྲ་ལ་བཅིབས་ནས་གདོན་འདྲེ་བཏུལ་བ་དང་གླིང་དང་རླངས་གཉིས་ཡོན་མཆོད་ཡིན་པ་དང་གླིང་དེ་རྨ་རྒྱལ་སྤོམ་རའི་ཉེ་འདེབས་ན་ཡོད་ཚུལ་སོགས་རླངས་ཀྱི་པོ་ཏི་བསེ་རུར་གསལ་པོར་གསུངས་པ་རྣམས་ཀྱིས་གླིང་གེ་སར་རྒྱལ་པོའི་ལོ་རྒྱུས་གསལ་བར་བཤད་པས་ཁོ་རང་ཚོའི་ཐེ་ཚོམ་བསལ་བར་བྱས་སོ།།དེའང་རླངས་བྱང་ཆུབ་འདྲེ་བཀོལ་ནི།ཨོ་རྒྱན་པདྨའི་བརྒྱུད་འཛིན་རྣལ་འབྱོར་བ་སྐུ་ཚེ་ཤིན་ཏུ་རིང་ཞིང་མངོན་ཤེས་དང་རྫུ་འཕྲུལ་ལ་མངའ་དབང་འབྱོར་བའི་གྲུབ་ཐོབ་རླངས་ཀྱི་གདུང་བརྒྱུད་ལས་བྱོན་པ་ཞིག་གོ།གླིང་གེ་སར་རྒྱལ་པོས་བོད་སིལ་བུའི་དུས་སྐབས་སུ་བོད་ཕྱི་ནང་གི་བསྟན་པ་ལ་འཚེ་བའི་རྫོང་ཆེན་དང་རྫོང་ཕྲན་མང་པོ་ཕབ་ཏེ་བོད་ཁམས་ལ་ཕན་བདེ་རྒྱ་ཆེན་པོ་བསྐྲུན་ཏོ།།
