དོན་ཚན་དྲུག་ཅུ་པ། ཁྲིམས་མིས་རང་ཉིད་ཀྱི་རྒྱུ་ནོར་ཡོངས་རྫོགས་ཀྱི་ཐོག་ནས་རང་ཚུགས་སུ་དམངས་དོན་འགན་འཁྲི་འཁུར་དགོས།

དོན་ཚན་རེ་གཅིག་པ། བཅའ་ཁྲིམས་སམ་ཁྲིམས་མིའི་སྒྲིག་ཡིག་གི་གཏན་འབེབས་ལྟར། ཁྲིམས་མིའི་འཐུས་ཚབ་བྱས་ནས་དམངས་དོན་བྱེད་སྒོ་སྤེལ་བའི་འགན་འཁུར་པ་ནི་ཁྲིམས་མིའི་ཁྲིམས་བཀོད་འཐུས་ཚབ་ཡིན།

ཁྲིམས་བཀོད་འཐུས་ཚབ་པས་ཁྲིམས་མིའི་མིང་ཐོག་ནས་དམངས་དོན་བྱེད་སྒོ་སྤེལ་བ་ཡིན་ན། དེའི་བཅའ་ཁྲིམས་མཇུག་འབྲས་ནི་ཁྲིམས་མིས་འཁུར་དགོས།

ཁྲིམས་མིའི་སྒྲིག་ཡིག་གམ་ཁྲིམས་མིའི་དབང་འཛིན་སྒྲིག་གཞིས་ཁྲིམས་བཀོད་འཐུས་ཚབ་པའི་འཐུས་ཚབ་དབང་ཆ་ཚོད་འཛིན་བྱེད་པ་ལ། སེམས་བཟང་བལྟོས་བཅས་མིར་འགྲན་རྒོལ་བྱེད་མི་ཆོག །

དོན་ཚན་རེ་གཉིས་པ། ཁྲིམས་བཀོད་འཐུས་ཚབ་པས་ལས་འགན་བསྒྲུབས་པའི་རྐྱེན་གྱིས་མི་གཞན་ལ་གནོད་རྐྱེན་བཟོས་ཚེ། ཁྲིམས་མིས་དམངས་དོན་འགན་འཁྲི་འཁུར་དགོས།

ཁྲིམས་མིས་དམངས་དོན་འགན་འཁྲི་ཁུར་རྗེས། བཅའ་ཁྲིམས་སམ་ཁྲིམས་མིའི་སྒྲིག་ཡིག་གི་གཏན་འབེབས་ལྟར། ནོར་འཛོལ་ཡོད་པའི་ཁྲིམས་བཀོད་འཐུས་ཚབ་པར་སྐྱིན་གསབ་བདའ་འདེད་བྱེད་ཆོག །

དོན་ཚན་རེ་གསུམ་པ། ཁྲིམས་མིས་རང་ཉིད་ཀྱི་དོན་གཅོད་སྒྲིག་གཞི་གཙོ་བོ་ཡོད་ས་དེ་གཞིས་གནས་བྱེད་དགོས། ཁྲིམས་ལྟར་ན་ཁྲིམས་མི་ཐོ་འགོད་བྱེད་དགོས་པ་ཡིན་ན། དོན་གཅོད་སྒྲིག་གཞི་གཙོ་བོ་ཡོད་ས་དེ་གཞིས་གནས་སུ་ཐོ་འགོད་བྱེད་དགོས།

དོན་ཚན་རེ་བཞི་པ། ཁྲིམས་མི་སོར་གནས་ཀྱི་རིང་ལ་ཐོ་འགོད་དོན་ཚན་ལ་འགྱུར་ལྡོག་བྱུང་བ་ཡིན་ན། ཁྲིམས་ལྟར་ཐོ་འགོད་ལས་ཁུངས་ལ་ཐོ་འགོད་སྒྱུར་བའི་རེ་འདུན་ཞུ་དགོས།

དོན་ཚན་རེ་ལྔ་པ། ཁྲིམས་མིའི་གནས་ཚུལ་དངོས་དེ་ཐོ་འགོད་བྱས་པའི་དོན་ཚན་དང་མི་མཐུན་ས་བྱུང་ན། སེམས་བཟང་བལྟོས་བཅས་མིར་འགྲན་རྒོལ་བྱེད་མི་ཆོག །

དོན་ཚན་རེ་དྲུག་པ། ཐོ་འགོད་ལས་ཁུངས་ཀྱིས་ཁྲིམས་ལྟར་ཁྲིམས་མི་ཐོ་འགོད་བྱས་པའི་འབྲེལ་ཡོད་ཆ་འཕྲིན་དུས་ཐོག་ཏུ་ཡོངས་བསྒྲགས་བྱེད་དགོས།

དོན་ཚན་རེ་བདུན་པ། ཁྲིམས་མི་ཟླ་སྒྲིལ་བཏང་བ་ཡིན་ན། དེའི་ཁེ་དབང་དང་འོས་འགན་ནི་ཟླ་སྒྲིལ་བཏང་རྗེས་ཀྱི་ཁྲིམས་མིས་སྤྱོད་ཅིང་འཁུར་དགོས།

ཁྲིམས་མི་ཁ་ཁར་བཙུགས་ཡོད་ན། དེའི་ཁེ་དབང་ནི་ཁ་ཁར་བཙུགས་རྗེས་ཀྱི་ཁྲིམས་མིས་སྤྱོད་ལ་ཞོར་འདྲུད་བུན་དབང་ཡང་སྤྱོད་རྒྱུ་ཡོད་པ་དང་། འོས་འགན་ནི་ཁ་ཁར་བཙུགས་རྗེས་ཀྱི་ཁྲིམས་མིས་འཁུར་ལ་ཞོར་འདྲུད་བུན་འགན་ཡང་འཁུར་དགོས། ཡིན་ནཡང་བུན་བདག་དང་འགན་འཁུར་མིས་ལོགས་སུ་གྲོས་དན་བཞག་ཡོད་པ་འདིའི་ཁོངས་སུ་མི་ཚུད།

དོན་ཚན་རེ་བརྒྱད་པ། གཤམ་གསལ་རྒྱུ་མཚན་གྲས་ཤིག་ཡོད་པ་དང་སྦྲགས། ཁྲིམས་ལྟར་གཙང་རྩིས་བྱས་ཚར་པ་དང་ཐོ་བསུབ་བྱས་ཚར་པ་ཡིན་ན། ཁྲིམས་མི་མཇུག་སྒྲིལ་བ་ཡིན།

གཅིག །ཁྲིམས་མི་ཁ་ཐོར་བཏང་བ།

གཉིས། ཁྲིམས་མི་མ་རྩ་སྟོངས་པར་ཁྱབ་བསྒྲགས་བྱས་པ།

གསུམ། བཅའ་ཁྲིམས་ཀྱིས་གཏན་འབེབས་བྱས་པའི་རྒྱུ་མཚན་གཞན་དག །

ཁྲིམས་མི་མཇུག་སྒྲིལ་ཚེ། བཅའ་ཁྲིམས་དང་སྲིད་འཛིན་ཁྲིམས་སྲོལ་དུ་འབྲེལ་ཡོད་ལས་ཁུངས་ཀྱི་ཆོག་མཆན་འཐོབ་དགོས་པར་གཏན་འབེབས་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

དོན་ཚན་རེ་དགུ་པ། གཤམ་གསལ་གནས་ཚུལ་གྲས་ཤིག་ཡོད་པ་ཡིན་ན། ཁྲིམས་མི་ཁ་ཐོར་གཏོང་དགོས།

གཅིག །ཁྲིམས་མིའི་སྒྲིག་ཡིག་ཏུ་གཏན་འབེབས་བྱས་པའི་སོར་གནས་ཡུན་ཚད་ལོངས་པའམ་ཁྲིམས་མིའི་སྒྲིག་ཡིག་ཏུ་གཏན་འབེབས་བྱས་པའི་ཁ་ཐོར་གཏོང་དགོས་པའི་རྒྱུ་རྐྱེན་གཞན་དག་ཐོན་པ།

གཉིས། ཁྲིམས་མིའི་དབང་འཛིན་སྒྲིག་གཞིས་ཁ་ཐོར་གཏོང་དགོས་པའི་ཆོད་དོན་བཞག་པ།

གསུམ། ཁྲིམས་མི་ཟླ་སྒྲིལ་བཏང་བའམ་ཁ་ཁར་བཙུགས་པའི་རྐྱེན་གྱིས་ཁ་ཐོར་གཏོང་དགོས་པ།

བཞི། ཁྲིམས་མིའི་ལས་གཉེར་ལག་ཁྱེར་དང་ཐོ་འགོད་ལག་ཁྱེར་ཁྲིམས་ལྟར་ཕྱིར་བསྡུ་བྱས་པ་དང་། བཀའ་བཀོད་བཏང་ནས་སྒོ་རྒྱག་ཏུ་བཅུག་པའམ་ཕྱིར་འཐེན་བྱས་པ།

ལྔ་། བཅའ་ཁྲིམས་ཀྱིས་གཏན་འབེབས་བྱས་པའི་གནས་ཚུལ་གཞན་དག །

དོན་ཚན་བདུན་ཅུ་པ། ཁྲིམས་མི་ཁ་ཐོར་བཏང་ཚེ། ཟླ་སྒྲིལ་བཏང་པའམ་ཁ་ཁར་བཙུགས་པའི་གནས་ཚུལ་ཕུད། གཙང་རྩིས་འོས་འགན་འཁུར་མིས་དུས་ཐོག་ཏུ་གཙང་རྩིས་ཚོ་ཆུང་བཙུགས་ནས་གཙང་རྩིས་རྒྱག་དགོས།

ཁྲིམས་མིའི་ཏུང་ཧྲི་དང་ལས་འཛིན་སོགས་ལག་བསྟར་སྒྲིག་གཞིའམ་ཇུས་གཅོད་སྒྲིག་གཞིའི་ཁོངས་མི་ནི་གཙང་རྩིས་འོས་འགན་འཁུར་མི་ཡིན། བཅའ་ཁྲིམས་དང་སྲིད་འཛིན་ཁྲིམས་སྲོལ་དུ་ལོགས་སུ་གཏན་འབེབས་བྱས་ཡོད་པ་ཡིན་ན། དེའི་གཏན་འབེབས་གཞིར་འཛིན་དགོས།

གཙང་རྩིས་འགན་འཁུར་མིས་གཙང་རྩིས་འོས་འགན་དུས་ཐོག་ཏུ་མ་བསྒྲུབས་པར་གནོད་རྐྱེན་བཟོས་པ་ཡིན་ན། དམངས་དོན་འགན་འཁྲི་འཁུར་དགོས་པ་དང་། གཙོ་སྐྱོང་ལས་ཁུངས་སམ་ཁེ་གྱོང་འབྲེལ་བ་ཡོད་མིས་མི་དམངས་ཁྲིམས་ཁང་ལ་འབྲེལ་ཡོད་མི་སྣ་དམིགས་འཛུགས་ཀྱིས་གཙང་རྩིས་ཚོ་ཆུང་བཙུགས་ཏེ་གཙང་རྩིས་རྒྱག་དགོས་པའི་རེ་འདུན་ཞུ་ཆོག །༼ མུ་འགོད། ༽