ཡ། ད་ཨ་ཅེ་བསམ་དོན་འགྲུབ་རྒྱུ་པོ། །ས་གཞི་སེར་པོའི་ཡང་སྟེང་ནས། །གོམ་གསུམ་གོམ་པ་གྱེན་ལ་སྤོས། །མཐའ་ཡར་ལ་འགྲོ་བའི་རྟེན་འབྲེལ་རེད། །ལས་ཅི་བསམ་འགྲུབ་པའི་སྨོན་ལམ་འདེབས། །ཞེས་པས་མཚམས་སྦྱར་ནས།
སྔོན་དུ་ས་བཤད་མདོར་བསྡུས་ཤིག་བྱེད་ན། གནས་ཁམས་ཆེན་བྲག་དཀར་སྤྲེལ་རྫོང་ལ། ངས་བསྟོད་པ་རྣམ་གསུམ་རེ་རྒྱབ་ན། ས་འདི་ནས་ཡར་ལ་ལྟོས་དང་། རི་མགོ་སྤང་གིས་བརྒྱན་ས།རྟ་ནོར་ལུག་གིས་གང་ས། རི་ཁོག་གཏེར་གྱིས་གང་ས། གསེར་སེར་པོ་རྒྱ་མ་བཀྱག་ས། རི་འདབས་ཟངས་ཀྱིས་བསྐོར་ས། འབྲུ་དྲུག་སྣ་ལྔ་འཁྲུངས་ས། སངས་རྒྱས་སྟོང་གི་བླ་རི། དགེ་འདུན་སྟོང་གི་གདན་ས། ཁ་མི་དལ་མ་ཎི་ཡིག་དྲུག་འདོན་ས། ལུས་མི་དལ་ཕྱག་དང་བསྐོར་བ་བྱེད་ས། ད་སྟོད་ཀྱི་ཡུལ་དུ་འབྲོག་གི་ས། ཐང་ཆེན་པོ་གོས་གདན་བཏིང་འདྲ། སྨན་མེ་ཏོག་ལོ་འདབ་རྒྱས་ས། རྟ་ནོར་ལུག་འཕེལ་ཁ་དར་ས། ཤིང་སིལ་ཏོག་འབྲས་བུ་སྨིན་ས། ད་སྨད་ཀྱི་ཡུལ་དུ་རོང་གི་ས། ས་ཞིམ་པོ་སྣུམ་གྱིས་བཟུང་ས། འབྲུ་ལོ་ཡག་སྙེ་མ་འཁྲུངས་ས། ཆར་སིལ་མ་དུས་ལྟར་འབབ་ས། སྐྱིད་སྐལ་བཟང་ལོ་ཡག་འཁྲུངས་ས། འཛོམ་གསུམ་འཛོམས་པའི་ས་ཆ། ཡ་དེང་ལྷ་ཡི་སྡེ་པ། སྟོབས་འབྱོར་རྒྱས་པའི་ཡུལ་གྲུ། རི་ནག་པོ་གོ་མཛོད་གཡུ་རྩེ། སྤང་སེར་པོ་གསེར་ཐང་དྲུག་མདོ། ཆུ་གཙང་པོ་རྫ་ཆུ་ཟིལ་མ།དཀར་འོ་མའི་རྒྱ་མཚོ་འཁྱིལ་འདྲ། སོགས་གང་འོས་སྦྱར།
དེ་ནས་དར་བཤད་དངོས་ནི། ཡ། ད་དེ་རིང་དར་དཀར་པོ་འདི་ལ་བཤད་པ་ཅུང་ཟད་ཅིག་བྱས་ན། སྟོད་རྒྱ་གར་ཡུལ་ནས་ཆོས་གཅིག་དར། །ཆོས་མ་དར་གོང་ནས་དར་གཅིག་དར། །དར་དཀར་པོས་ཆོས་ཀྱི་སྣ་འདྲེན་བཟོས། །བར་བལ་པོའི་ཡུལ་ནས་རྒྱུ་གཅིག་དར། །རྒྱུ་མ་དར་གོང་ནས་དར་གཅིག་དར། །དར་དཀར་པོས་རྒྱུ་ཡི་རྒྱལ་པོ་བཟོས། །སྨད་རྒྱ་ནག་ཡུལ་ནས་ཁྲིམས་གཅིག་དར། །ཁྲིམས་མ་དར་གོང་ནས་དར་གཅིག་དར། །དར་དཀར་པོས་ཁྲིམས་ཀྱི་སྲོག་ཤིང་བཟོས། །དར་དཀར་འདི་ལ་འདོམ་གང་ཡོད། །ཁ་ལས་ཀླུང་རྟ་དར་བའི་དར་དཀར་ཟེར། །ཁ་ཚར་འདི་ལ་ཁྲུ་གང་ཡོད། །ལས་དབང་ཐང་དར་བའི་ཁ་ཚར་ཟེར། །བླ་མ་གསེར་ཞྭ་ཅན་གྱིས་ཆོས་དར་བཟོས། །དཔོན་པོ་ལྭ་ཐོད་ཅན་གྱིས་ཁྲིམས་དར་བཟོས། །སྟག་ཤར་དགྲ་ལྷ་ཅན་གྱིས་སྒེར་དར་བཟོས། །མ་སྲུ་མོ་སྨན་རྣམས་ཀྱིས་བསུ་དར་བཟོས། །ངས་དར་དཀར་གཡས་ལ་འཕྱར་རྒྱུ་འདི། །གཡས་རི་འདི་ལ་བསྟོད་པ་ཡོད། །གཡས་རི་སྟག་མོ་འགྱིང་འདྲ་ཡོད། །དར་དཀར་གཡོན་ལ་འཕྱར་རྒྱུ་འདི། །གཡོན་རི་འདི་ལ་བསྟོད་པ་ཡོད། །གཡོན་རི་ཉི་ཟླ་ཁ་སྤྲོད་ཡོད། །རྒྱབ་ལ་དར་དཀར་འཕྱར་རྒྱུ་འདི། །རྒྱབ་རི་འདི་ལ་བསྟོད་པ་ཡོད། །རྒྱབ་རི་ནོར་གྱི་བང་མཛོད་ཡོད། །མདུན་ལ་དར་དཀར་འཕྱར་རྒྱུ་འདི། །མདུན་རི་འདི་ལ་བསྟོད་པ་ཡོད། །མདུན་རི་གླང་ཆེན་འགྱིང་འདྲ་ཡོད། །ཐང་འདི་ལ་བཀྲ་ཤིས་ཆོས་ཐང་ཟེར། །ཆུ་འདི་ལ་བདུད་རྩི་ཟིལ་མ་ཟེར། །མི་ང་ལ་བཀྲ་ཤིས་དོན་འགྲུབ་ཟེར། །བདེ་སྐྱིད་འཛོམས་པའི་ཚོ་པ་ཟེར། །ཟས་ནོར་འཛོམས་པའི་གཡང་ས་ཟེར། །ཁྱོད་དགའ་སྤྲོའི་ངང་ནས་འབབས་འདོད་གྱིས། །ཞིམ་མངར་བདུད་རྩིའི་གསོལ་འདྲེན་ཡོད། །ཤ་མར་ཐུད་ཀྱི་སྟོན་མོ་ཡོད། །འབབ་སྟན་གཡུང་དྲུང་གཡས་འཁྱིལ་ལ། །ལུག་ཤ་ཟན་བརྒྱ་ཡི་ཁ་ཆུ་ཡོད། །ཐོང་པ་བརྒྱ་ཡི་དུང་ཡུ་ཡོད། །ལུ་གུ་བརྒྱ་ཡི་ནུ་ཡུ་ཡོད། །བཞག་མི་བཀྲ་ཤིས་དོན་འགྲུབ་ཟེར། །དྲིལ་མི་བསོད་ནམས་དོན་འགྲུབ་ཟེར། །ལེན་མི་འགྱུར་མེད་བསམ་འགྲུབ་ཟེར། །སེར་པོ་གསེར་གྱི་དགུ་ཚན་ཡོད། །ཁམ་པ་དངུལ་གྱི་དགུ་ཚན་ཡོད། །སྔོན་པོ་གཡུ་ཡི་དགུ་ཚན་ཡོད། །སྨན་ཆུང་བུ་མོ་འབབ་ས་གྱིས། །ཞེས་དང་།
དེ་ནས་སྐྱེལ་མིའི་རྩར་སོང་ནས། སྐྱེལ་མ་བསམ་དོན་འགྲུབ་རྒྱུ་པོ། །དར་དཀར་གནམ་ལ་འཕྱར་རྒྱུ་འདི། །གནམ་ཨ་སྔོན་འདི་ལ་བསྟོད་པ་ཡོད། །གནམ་ཨ་སྔོན་འཁོར་ལོ་རྩིབས་དགུ་ཡོད། །དར་རྔ་ས་ལ་འདྲུད་རྒྱུ་འདི། །ས་དོག་མོ་འདི་ལ་བཤད་པ་ཡོད། །ས་དོག་མོ་པདྨ་འདབ་བརྒྱད་ཡོད། །བར་འདི་ལ་བཀྲ་ཤིས་རྟགས་བརྒྱད་ཚང་། །བསོད་ནམས་རི་བོ་བཞིན་དུ་བརྟན་སྤྱད་ཡིན། །རྒྱུད་ནི་ཉི་ཟླ་བཞིན་དུ་གསལ་སྤྱད་ཡིན། །སྙན་གྲགས་ནམ་མཁའ་ལྟ་བུ་ཁྱབ་སྤྱད་ཡིན། །བཀྲ་ཤིས་པའི་དར་དཀར་ཁྱོད་ལ་འཕེན། །དོན་འགྲུབ་པའི་སྲབ་མདའ་ང་ལ་གཏོད། །ཅེས་གླིང་ཡ་དེང་གི་ས་ནས་དར་བའི་བག་མའི་རྟ་ཁ་ལེན་དུས་ཀྱི་བཤད་པ་འདི་ནི། རབ་བརྟན་དགེ་ལེགས་ཕུན་ཚོགས་པས་ཆུ་འབྲུག་ཐ་སྐར་ཟླ་བའི་ཚེས་ཉེར་དྲུག་ལ་གླིང་རྗེའི་འཁྲུངས་ཡུལ་ལྕི་སོས་ཡག་མདོ་ནས་བསྡུས་པ་དགེའོ། །
