༄༅།། ལྷ་སར་ལོག་པ།

ས་དམར་གྲགས་པ། རྩོམ་སྒྲིག་པ།ཚེ་དཔལ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། 07-11


ས་དམར་གྲགས་པ། 

ལྕགས་སྒམ་རྒྱབ་ལ་གྱོན་པའི་ང་འདིར་ཡོད།།

 རླུང་དང་ཁ་བ་ཙག་དང་བསེར་བུ་སོགས།།

 འདིར་ཤོག་འདིར་ཤོག་ང་ལ་ཅུང་ཙམ་ཉོན།།

 ང་ཡིས་ཉི་ནུབ་འདི་ལ་སྐད་ཅིག་བསྐུར།།


 མཚན་མོར་སྙིང་ཁམས་དྭངས་པའི་སྐར་ཚོགས་ལ།།

 འདི་ཟེར་གན་ཟེར་ཞེས་ཀྱང་མི་ཤོད་རོགས།།

 སྐད་ཆ་ས་ལ་ལྷུང་ཚེ་རུས་པ་ན།།

 སྙིང་ལ་རུས་པ་མེད་ན་ཁོག་པ་སྟོང་།།


 ཤེལ་དེམ་ནང་གི་མེ་འོད་འཁྱག་པ་འདི།།

 ང་ལས་གཞན་མིན་སུ་དང་གང་ཡང་མིན།།

 ཅི་ཡིན་འདི་ཡིན་མེད་པའི་སྟོང་པ་འདི།།

 འདི་ནས་ཕར་ལ་ཅུང་ཙམ་འཁྱེར་རོགས་གནང་།།


 ང་ཡི་ལུས་ལ་ཤུགས་མེད་དྲན་པ་མེད།།

 མེད་པ་གང་ལས་མེད་པ་འདི་ན་འདུག།

 སང་ཞོགས་ཉི་འོད་འདི་རུ་འོངས་པའི་ཚེ།།

 བདག་པོ་འདི་ཞེས་གཞན་ཡང་གན་ཞེས་ཤོད།།


 ལྕགས་ཀྱི་རྐང་ལག་བར་གྱི་ལུས་པོ་འདི།།

 རེ་ཞིག་འདི་ནས་མགྱོགས་པོར་འགྲོ་དགོས་སོང་།།

 ལྷ་སར་ལོག་དགོས་དེ་ན་ང་ཡང་ཡོད།།

 ཁྱོད་ཀྱང་ཡོད་ལ་མེད་པ་ང་ཡིན་ནོ།།


 ཙོང་ཁ་གོར་མོ་ཨ་ཆེན་གངས་རྒྱབ་སོགས།།

 ནག་ཆུས་དྲུད་ནས་ཡངས་པ་ཅན་ལ་སླེབས།།

 ཐང་ལྷའི་ཕར་ན་གནམ་མཚོ་སྔོ་ལམ་མེ།།

 ལྷ་སར་བལྟས་ནས་ཉི་འོད་འཛིན་བཞིན་འདུག།


 མེ་འཁོར་འདི་ཡང་ལྕགས་ཀྱི་ཁང་ཆུང་ཞིག།

 སྒེའུ་ཁུང་འདི་ཡང་དུ་ཁུང་འདྲ་ལེ་འདུག།

 ཕྱི་ལ་ཤོར་བའི་ཁ་རླངས་དཀར་ནག་སོགས།།

 ལྷ་སའི་གླིང་ན་མེ་ཏོག་བཞད་འདུག་གམ།།


 གཞན་ལ་མ་བཤད་ངས་ཀྱང་མི་འཆད་ལགས།།

 ང་ཡང་འདི་ཡིན་ཁྱོད་ཀྱང་གན་ཡིན་ནམ།།

 ས་རྡོ་བརྩེགས་པའི་ཚིག་གི་གྲིབ་མ་འདི།།

 ནམ་མཁའ་སྟོང་པ་འདི་ཡི་བདག་པོ་ཡིན།།


 ལྕགས་ཀྱིས་གྲུབ་པའི་སེམས་པ་རྒོད་པོ་འདི།།

 རུ་ཁོག་གཤགས་ནས་ལྷ་སར་བལྟས་པ་ཡིས།།

 མིག་གཉིས་ལྷུང་བས་རླུང་གི་སྒོ་མོ་བཀག།

 ང་ཡང་འདི་ནས་ལུས་སོང་ལྷ་ས་ལགས།།


 དྲན་པའི་རིམ་པ་མཐོ་བ་གནམ་ལས་ཡངས།།

 དགའ་བའི་སྐྱོ་བ་དམའ་བ་མཚོ་ལས་ལྗིད།།

 ལམ་འདི་དེ་རིང་སོང་ཡང་སང་ཉིན་འདུག།

 ང་ཡང་དེ་རིང་ཡོད་ཀྱང་སང་ཉིན་མེད།།


 གང་ནས་བལྟས་ན་ནང་ཁོག་མཐོང་ས་འདིར།

 ཅི་ཞིག་བཙལ་ཡང་མ་རྙེད་ལྷག་པ་ང་།།

 ཉི་འོད་སྤུངས་པའི་འཁོར་བའི་དཀྱིལ་འཁོར་ནང་།།

 ང་ཡང་མཛེས་པ་ཞིག་སྟེ་འཇིགས་པ་མེད།།


རྩོམ་ཡིག་སྔོན་མ།
༄༅།། མཐར་བལྟས་པ།
རྩོམ་ཡིག་རྗེས་མ།
༄༅།།ཤར་ཇ་མཁར་རིང་མོ།

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1