བྱམས་བརྩེ།
རྡོ་རྗེ་འཚོ། (ཟི་ལིང)
ཟླ་དགུ་ཞག་བཅུར་ལུས་ལ་ཁུར་བས་ཨ་མའི་བཀའ་དྲིན་མཚོ་ལས་ཟབ།།
འགྲོ་འདུག་སྤྱོད་གསུམ་གཙང་མར་སྐུལ་བས་མ་ལོའི་དྲིན་ལན་རི་ལས་མཐོ།།
བྱམས་བརྩེ་འོ་མའི་མངར་ཁ་བསྩལ་བས་མཛའ་མཐུན་ཆུ་བོའི་རྒྱུན་ལས་རིང་།།
དེ་རིང་བདག་གིས་མ་ཡུམ་ཉིན་མོར་དྲིན་ཆེན་མ་ལོའི་ངོ་སོ་བསྟོད།།
བདག་གི་མ་ནི་ཤེས་བྱ་མ་སྦྱངས་ཕ་ཡུལ་འབྲོག་གི་ས་ཆ་རུ།།
དགོ་དགོ་བཞོ་དབྱངས་ངག་ལ་གྱེར་བའི་ཐང་སྨུག་མགོ་སྦྲའི་བདག་མོ་ཡིན།།
ཆེ་བར་བཀུར་ཞིང་ཆུང་ལ་བྱམས་པ་ཁོ་མོའི་རྒྱུད་ཀྱི་གཤིས་ཀ་སྟེ།།
བོད་པའི་གཤིས་བཟང་རྒྱུད་ལ་འཛོམས་པའི་མ་ལོའི་ངོ་སོ་ཡར་ལ་བསྟོད།།
སངས་རྒྱས་ཆོས་དང་རྩ་བའི་བླ་མ་ཁོ་མོའི་བསམ་པའི་གཏད་སོ་ཡིན།།
དཀར་ཆོས་ལྷ་ལ་མཆོད་ཁ་འཕེན་པ་ཁོ་མོའི་རྒྱུན་ཆགས་ལས་ཀ་ཡིན།།
སྙིང་རྗེ་མ་ཎི་ཡང་ཡང་བཟློ་བ་ཁོ་མོའི་ངག་གི་འདོན་པ་ཡིན།།
དད་པའི་ཕྱག་ཟུང་ཐོད་ལ་འཇོག་པའི་དྲིན་ཆེན་མ་ལོའི་ངོ་སོ་བསྟོད།།
འཇིག་རྟེན་དཀར་ངོགས་མིག་གིས་ཟིན་ནས་མི་ལོ་གསུམ་ལ་སོན་རག་བར།།
དྲིན་ཆེན་མ་ལོའི་ནུ་ཞོར་བརྟེན་པས་ལུས་པོ་ཆུང་ངུར་གཉོམ་ལག་རྒྱས།།
སྐད་དང་དོན་སོགས་རེ་རེ་བསླབས་པས་འགྲོ་བ་མི་ཡི་མཚན་ཉིད་ཚང་།།
ཀྱ་ཙེ་གོམ་ཙེ་ཐོག་མར་བསླབ་མཁན་མ་ལོའི་དྲིན་ལན་ཚིག་གིས་བསྟོད།།
ནས་བཅུད་སྦྲང་དཀར་རྩམ་པའི་ཁ་ཟས་མ་ལོས་བསྩལ་བའི་ཟས་མཆོག་ཡིན།།
སྲོལ་རྒྱུན་རིག་གནས་རྒྱུད་འཛིན་བྱེད་པ་མ་ལོས་བཏོན་པའི་རེ་བ་ཡིན།།
ཆེ་བཀུར་ཆུང་བྱམས་སྙིང་རྗེ་དགོས་པ་མ་ལོས་གནང་བའི་བསླབ་བྱ་ཡིན།།
དྲིན་ལན་གཞལ་མེད་མ་ལོའི་གདམས་ངག་སེམས་ལ་ཉར་བཞིན་ངོ་སོ་བསྟོད།།
དབྱར་དགུན་དུས་བཞིར་དབྱེ་བ་མེད་པར་གཅེས་ཕྲུག་ཚོ་དང་ཁྱིམ་གཞིའི་ཆེད།།
སེན་མགོ་ཁྲག་དང་སེན་རྟིང་རྣག་བྱས་དངུལ་ལོ་ག་ཙམ་གསོག་འཇོག་གིས།།
རང་གི་བཅུ་དྲུག་ལང་ཚོའི་མེ་ཏོག་ག་དུས་ཟད་པ་མ་ཚོར་བའི།།
གཞན་གྱི་ཆེད་དུ་གཏོང་ཕོད་ཆེ་བའི་དྲིན་ཆེན་མ་ལོའི་ངོ་སོ་བསྟོད།།
ཐོག་མའི་ཚེ་སྲོག་ཕངས་མེད་གནང་མཁན་དྲིན་ཆེན་མ་ལོའི་བཀའ་དྲིན་དེ།།
སྙན་མོ་ཚིག་གི་ཕྲེང་བར་བརྒྱུས་ནས་ཀུན་གྱི་མིག་ལ་བཤམས་འདོད་ཀྱང་།།
རིག་མེད་ནུས་མེད་ཉམ་ཆུང་བུ་མོ་ང་འདྲའི་ཚིག་འབྲུ་སྐམ་པོ་ཡིས།།
བརྗོད་པར་མ་ནུས་བསྐྱུར་དགོས་བྱུང་བས་མ་ལོ་མཆོག་ལ་དགོངས་དག་ཞུ།།
དེ་རིང་འཛམ་གླིང་མ་ཡུམ་ཉིན་མོར་གཟུགས་མེད་ཁ་པར་སྐུད་ལམ་ནས།།
རྒྱང་རིང་ཡུལ་ན་ལས་ཀར་བྲེལ་བའི་དྲིན་ཆེན་མ་ལོར་རྟེན་འབྲེལ་ཞུ།།
ཁ་གཡང་འབོད་པའི་ཁ་ཚིག་སྙན་མོ་པྲ་ཆལ་བུ་མོར་མི་ལྡན་ཡང་།།
ཁ་ཡག་མིན་པའི་སེམས་གཏམ་ཞིག་གིས་དྲིན་ཆེན་མ་ལོར་རྟེན་འབྲེལ་ཞུ།།
