སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་ཚོགས་གྲོས་ཚོགས་ཐེངས་དང་པོས་སྤྱི་ཟླ་3པའི་ཚེས་4ཉིན་གྱི་སྔ་དྲོའི་ཆུ་ཚོད་11པར་མི་དམངས་ཚོགས་ཁང་ཆེན་མོའི་གསར་འགྱུར་ཁྱབ་བསྒྲགས་ཚོམས་ཆེན་དུ་གསར་འགྱུར་ཁྱབ་བསྒྲགས་ཚོགས་འདུ་ཚོགས་ཡོད་པ་དང་། ཚོགས་ཆེན་གྱི་མགྲིན་ཚབ་པ་ཀྲང་ཡེ་སུའེ་ཡིས་ཚོགས་ཆེན་གྱི་གྲོས་རིམ་དང་མི་དམངས་འཐུས་ཚོགས་ལས་དོན་གྱི་འབྲེལ་ཡོད་གནད་དོན་ཐད་རྒྱལ་ཁབ་ཕྱི་ནང་གི་གསར་འགོད་པས་བཏོན་པའི་དྲ་བར་ལན་བསྐྱོན་ཡོད་པ་རེད། 
        ཀྲང་ཡེ་སུའེ་ཡིས། སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་དང་པོ་ནི་སྐབས་བརྗེ་བའི་ཚོགས་ཆེན་ཞིག་ཡིན་པ་དང་། ཏང་གི་ཚོགས་ཆེན་བཅུ་དགུ་པའི་དགོངས་དོན་ལག་བསྟར་བྱེད་པའི་འགོ་འཛུགས་ལོ་དང་། སྒྱུར་བཅོས་སྒོ་དབྱེ་བྱས་ནས་ལོ་ངོ་༤༠འཁོར་བའི་ལོ། འབྱོར་འབྲིང་སྤྱི་ཚོགས་ལ་རྒྱལ་ཁ་ཕུ་ཐག་ཆོད་པ་ལེན་པ་དང་ལོ་ལྔ་ཚན་གྱི་འཆར་འགོད་བཅུ་གསུམ་པ་ལག་བསྟར་བྱེད་པའི་སྔ་ཕྱི་རྒྱུན་མཐུད་ཀྱི་འགག་རྩའི་ལོ་བཅས་ཀྱི་སྐབས་སུ་སྐོང་ཚོགས་བྱས་པའི་གྲོས་ཚོགས་གལ་ཆེན་ཞིག་ཡིན་ལ། རང་རྒྱལ་གྱི་མི་དམངས་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཀྱང་ཡིན་ཞེས་གསུངས་ཡོད་པ་དང་། 
        ཀྲང་ཡེ་སུའེ་ཡིས། སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་ཚོགས་ལ་དོན་དངོས་ཐོག་འཐུས་མི་2980ཡོད་པ་དང་། མིག་སྔར་འཐུས་མི་2976གིས་ཚོགས་ཆེན་ལ་འབྱོར་ཐོ་བཀོད་ཟིན་ཡོད། ཚོགས་ཆེན་གྱི་གྲ་སྒྲིག་ལས་དོན་ཁག་ཚང་མ་གྲུབ་ཟིན་ཡོད། སྤྱི་ཚེས་༤ཉིན་གྱི་སྔ་དྲོ་ཚོགས་ཆེན་གྱི་གྲ་སྒྲིག་གྲོས་ཚོགས་སྐོང་ཚོགས་བྱས་ཡོད་པ་དང་། ཚོགས་ཆེན་གྱི་གྲོས་རིམ་ཁག་ལ་གྲོས་འཆམ་བྱུང་ཡོད་པ་མ་ཟད། མི་190ལས་གྲུབ་པའི་ཚོགས་ཆེན་གྱི་ཀྲུའུ་ཞི་ཚོགས་པ་བདམས་པ་དང་། ཝང་ཁྲེན་ཚོགས་ཆེན་གྱི་དྲུང་ཆེར་བདམས་ཡོད། ཚོགས་ཆེན་སྤྱི་ཟླ་༣པའི་ཚེས་༥ཉིན་གྱི་སྔ་དྲོ་འགོ་འཛུགས་རྒྱུ་དང་། སྤྱི་ཟླ་༣པའི་ཚེས་༢༠ཉིན་གྱི་སྔ་དྲོ་མཇུག་སྒྲིལ་རྒྱུ་ཡིན་ཞིང་། དུས་ཡུན་ཉིན་༡༥དང་ཕྱེད་ཀ་ཡིན་པས། སྐབས་བཅུ་གཉིས་པའི་རྒྱལ་ཡོངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་དང་པོའི་དུས་ཚོད་ལས་ཅུང་རིང་བ་ཡོད། དེ་ནི་གཙོ་བོ་ཚོགས་ཆེན་གྱི་གྲོས་རིམ་ཀྱིས་གཏན་འཁེལ་བྱས་པ་ཞིག་ཡིན། ད་རེས་ཀྱི་ཚོགས་ཆེན་ལ་ཁྱོན་གྲོས་རིམ་ཁག་བཅུ་ཡོད་པ་དང་། གྲོས་རིམ་ཁག་དང་པོ་ནས་གསུམ་པ་བར་ནི་སྲིད་གཞུང་གི་ལས་དོན་སྙན་ཞུར་གྲོས་ཞིབ་བྱ་རྒྱུ་དང་། འཆར་འགོད་སྙན་ཞུ་དང་སྔོན་རྩིས་སྙན་ཞུར་དཔྱད་ཞིབ་བྱ་རྒྱུ། གྲོས་རིམ་ཁག་བཞི་པ་དང་ལྔ་པ་ནི་རྩ་ཁྲིམས་བཟོ་བཅོས་འཆར་ཟིན་དང་ལྟ་ཞིབ་བཅའ་ཁྲིམས་འཆར་ཟིན་ལ་གྲོས་ཞིབ་བྱ་རྒྱུ། གྲོས་རིམ་ཁག་དྲུག་པ་ནས་བརྒྱད་པ་བར་ནི་རྒྱལ་ཡོངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་ཞུ་དང་། ཆེས་མཐོའི་མི་དམངས་ཁྲིམས་ཁང་གི་ལས་དོན་སྙན་ཞུ། ཆེས་མཐོའི་མི་དམངས་ཞིབ་དཔྱོད་ཁང་གི་ལས་དོན་སྙན་ཞུ་བཅས་ལ་གྲོས་ཞིབ་བྱ་རྒྱུ། གྲོས་རིམ་ཁག་དགུ་པ་ནི་རྒྱལ་སྲིད་སྤྱི་ཁྱབ་ཁང་གི་ལས་ཁུངས་སྒྱུར་བཅོས་ཇུས་གཞིར་གྲོས་ཞིབ་བྱ་རྒྱུ། གྲོས་རིམ་ཁག་བཅུ་པ་ནི་རྒྱལ་ཁབ་ལས་ཁུངས་ཀྱི་གྲུབ་ཆའི་མི་སྣ་འདམས་པ་དང་བསྐོ་བཞག་བྱ་རྒྱུ་བཅས་ཡིན་ཞེས་གསུངས་ཡོད་པ་རེད། 
        ཀྲང་ཡེ་སུའེ་ནས། ཚོགས་ཆེན་རིང་། གསར་འགོད་པའི་སྣེ་ལེན་ཚོགས་འདུ་ཐེངས་བཅུ་བཞི་འཚོགས་ནས། རྒྱལ་ཡོངས་མི་དམངས་འཐུས་ཚོགས་ཆེད་དོན་ཨུ་ཡོན་ལྷན་ཁང་དང་དེ་བཞིན་རྒྱུན་ལས་ཨུ་ཡོན་ལྷན་ཁང་གི་ལས་དོན་ལས་ཁུངས་ཀྱི་འགན་འཁུར་མི་སྣ་གདན་འདྲེན་ཞུས་ནས་མི་དམངས་འཐུས་ཚོགས་ཀྱི་ཁྲིམས་འཛུགས་ལས་དོན་དང་། ལྟ་སྐུལ་ལས་དོན་སོགས་ཀྱི་གནད་དོན་དང་། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་པུའུ་དང་ཨུ་ཡོན་ལྷན་ཁང་གི་འགན་འཁུར་མི་སྣ་གཙོ་བོ་གདན་འདྲེན་ཞུས་ནས། དཔལ་འབྱོར་སྤྱི་ཚོགས་གོང་འཕེལ་ནང་མི་དམངས་མང་ཚོགས་ཀྱིས་དོ་ཁུར་བྱེད་པའི་གནད་དོན་ཐད་ཁག་སོ་སོར་རྒྱལ་ཁབ་ཕྱི་ནང་གི་གསར་འགོད་པའི་འདྲི་བར་ལན་བསྐྱོན་རྒྱུ་རེད་ཅེས་གསུངས་པ་དང་། 
        ཀྲང་ཡེ་སུའེ་ནས། སྤྱི་ཟླ་3པའི་ཚེས་20ཉིན་གྱི་སྔ་དྲོར། ཚོགས་ཆེན་མཇུག་སྒྲིལ་རྗེས། རྒྱལ་སྲིད་སྤྱི་ཁྱབ་ཁང་གི་ཙུང་ལི་གསར་པ་ནས་མི་དམངས་ཚོགས་ཁང་ཆེན་མོའི་ཐོག་ས་གསུམ་པའི་གསེར་མདོག་ཅན་གྱི་ཚོམས་ཆེན་དུ་རྒྱལ་ཁབ་ཕྱི་ནང་གི་གསར་འགོད་པ་དང་ཐུག་འཕྲད་གནང་རྒྱུ་མ་ཟད། དྲི་བར་ལན་བསྐྱོན་རྒྱུ་དང་། ཙུང་ལི་གཞོན་པ་རྣམས་ཀྱིས་ཕེབས་རོགས་ཞུ་རྒྱུ། ཚོགས་ཆེན་གྱིས་མུ་མཐུད་ནས་གྲོས་ཚོགས་ལ་ཟུར་ཞུགས་གནང་མཁན་རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་པུའུ་ཨུད་ཀྱི་འགན་འཁུར་མི་སྣ་གཙོ་བོ་གདན་འདྲེན་ཞུས་ནས་མི་དམངས་ཚོགས་ཁང་ཆེན་མོའི་ཚོམས་ཆེན་བྱང་མའི་པུའུ་ཀྲང་ཕེབས་ལམ་དུ་སྨྱན་སྦྱོར་ཚན་པའི་གཅིག་སྡུད་བཅར་འདྲི་དང་ལེན་ཞུ་རྒྱུ་དང་། སྲིད་གཞུང་ལས་དོན་སྙན་ཞུ་དང་འབྲེལ་ཡོད་སྲིད་ཇུས་འགྲེལ་བཤད། སྤྱི་ཚོགས་ཀྱིས་དོ་ཁུར་བྱེད་པའི་གནད་དོན་ཐད་ལན་ཆ་བྱ་རྒྱུ་རེད། ཚོགས་ཆེན་གྱིས་འཐུས་མིའི་ཕེབས་ལམ་གྱི་གཅིག་སྡུད་བཅར་འདྲིའི་བྱེད་སྒོ་ཐེངས་དང་པོ་སྒྲིག་འཛུགས་བྱས་ཏེ། འཐུས་མི་ཁག་གཅིག་གདན་འདྲེན་ཞུས་ནས་མི་དམངས་ཚོགས་ཁང་ཆེན་མོའི་དབུས་དཀྱིལ་ཚོམས་ཆེན་དུ་གསར་འགོད་པའི་མཉམ་སྡེབ་བཅར་འདྲི་དང་ལེན་ཞུ་རྒྱུ་རེད་ཅེས་གསུངས་ཡོད་པ་རེད། 
        ཀྲང་ཡེ་སུའེ་ནས་ད་དུང་མི་དམངས་འཐུས་ཚོགས་ཀྱི་ལས་ཀའི་འབྲེལ་ཡོད་གནད་དོན་ཐད་རྒྱལ་ཁབ་ཕྱི་ནང་གི་གསར་འགོད་པས་བཏོན་པའི་དྲི་བར་ལན་བསྐྱོན་ཡོད་པ་རེད།།