ད་ནི་འདར་བར་བྱ་སྟེ།
ས་ཆེན་པོ་འདིའི་བར་སྣང་ན་རྒྱུ་བའི་རླུང་དེ་འདར་བྱུང་།
རླུང་གི་དྲང་ཐད་ན་བཞད་པའི་མེ་ཏོག་དེ་འདར་བྱུང་།
མེ་ཏོག་དེའི་རྩི་བཅུད་ལ་རོལ་བའི་བུང་བ་དེ་འདར་བྱུང་།
བུང་བའི་གཤོག་སྣེ་ན་གྲགས་པའི་གླུ་དེ་ཡང་འདར་བྱུང་།
ད་ནི་འདར་བར་བྱ་སྟེ།
ཉི་མའི་དཀྱིལ་འཁོར་ལས་སྤྲོས་པའི་འོད་དེ་འདར་བྱུང་།
འོད་ཀྱི་རྨུ་ཐག་ལ་འཇུས་པའི་སྲིན་འབུ་དེ་འདར་བྱུང་།
སྲིན་འབུ་དེའི་མིག་ལམ་ནས་ཆད་པའི་དྲ་རྒྱ་དེ་འདར་བྱུང་།
དྲ་རྒྱའི་ཕྱོགས་སྣེ་ལ་ཐུག་པའི་?་བ་དེ་ཡང་འདར་བྱུང་།
ད་ནི་འདར་བར་བྱ་སྟེ།
རིགས་དྲུག་གི་འདོད་པ་གསལ་བའི་ཁ་དོག་དེ་འདར་བྱུང་།
ཁ་དོག་དེའི་མཚོན་དོན་གྱེར་བའི་དར་ལྕོག་དེ་འདར་བྱུང་།
དར་ལྕོག་དེའི་ངོས་སུ་བབས་པའི་ཡིག་འབྲུ་དེ་འདར་བྱུང་།
ཡིག་འབྲུ་ལ་བཅོལ་བའི་འདོད་པ་དེ་ཡང་འདར་བྱུང་།
ད་ནི་འདར་བར་བྱ་སྟེ།
མཚན་མོ་འདིའི་ལས་སྐལ་ལ་བཅོས་པའི་ལྷིང་འཇགས་དེ་འདར་བྱུང་།
ལྷིང་འཇགས་འདིའི་ཕ་མཐའ་ན་ཟད་པའི་ཉེ་རིང་དེ་འདར་བྱུང་།
ཉེ་རིང་དེའི་ཁུགས་སོ་ལ་འཐམས་པའི་སེམས་པ་དེ་འདར་བྱུང་།
སེམས་པ་དེས་བར་མེད་དུ་ངུས་པའི་ངོ་གདོང་དེ་ཡང་འདར་བྱུང་།
ད་ནི་འདར་བར་བྱ་སྟེ།
རྨི་ལམ་གྱི་གཤོག་སྣེ་ལ་དྲུད་པའི་དྲན་པ་དེ་འདར་བྱུང་།
དྲན་པ་དེས་ཟིན་ཅིང་ཤོར་བའི་དམ་བཅའ་དེ་འདར་བྱུང་།
དམ་བཅའ་དེའི་ནང་ཁོག་ལ་ཟུག་པའི་ཁྲེལ་གཞུང་དེ་འདར་བྱུང་།
ཁྲེལ་གཞུང་དེའི་མདུན་རྒྱབ་ན་སྡོད་པའི་འུ་གཉིས་ཀྱང་འདར་བྱུང་།
2016.11.3ཉིན་གྱི་མཚན་མོར་རྔ་བ་སྟག་མོ་རྫོང་དུ།
སྙན་ངག་འདིའི་རྟོག་ལྗོངས(ཏྻུཔྤ)ཀྱི་ཐད་ནས་ཐོག་མར་འདར་བྱུང་བའི་ས་གཞིའི་རླུང་དང་ནམ་མཁའི་ཉི་འོད་ནས་འགོ་བརྩམས་ཤིང་།དེ་ནས་རིགས་དྲུག་གི་འདོད་པ་དང་མཚན་མོའི་ལྷིང་འཇགས། གྱེས་བྲལ་གྱི་དྲན་གདུང་སོགས་ཆེན་པོ་ནས་ཆུང་ངུའམ་སྤྱི་ནས་བྱེ་བྲག་ཏུ་བློས་བསླངས་བྱས་པར་མཐོང་ལ། སྔ་མའི་རྟོག་ལྗོངས་དག་ནི་ཕྱི་མའི་ཚོར་འདུ་མཚོན་བྱེད་ཀྱི་བརྟེན་སའམ་འདེགས་རྟེན་དུ་བྱས་ཤིང་སྔ་ཕྱི་གོང་བུ་གཅིག་ཏུ་བསྒྲིལ་ཏེའདརཞེས་པའི་གདངས་དབྱངས་གཅིག་ཏུ་བརྒྱུས་ཡོད། ཚན་པ་སོ་སོའི་ནང་གསེས་ལ་བལྟས་ན་རླུང་དང་མེ་ཏོག་སོགས་འདར་བྱུང་བའི་ཡིད་བརྙན་མང་པོ་མང་པོ་ཞིག་བྲིས་ཡོད་པ་དེ་དག་ཀྱང་ཕན་ཚུན་འབྲེལ་མེད་པ་མ་ཡིན་པར་རྒྱུ་འབྲས་ཀྱི་ཚུལ་དུ་བཀོད་དེ་དགའ་སྐྱོ་འདུ་འབྲལ་ལ་རྐྱེན་བྱས་པའི་རྩོམ་པ་པོའི་མཚན་མོའི་ལྷིང་འཇགས་ཁྲོད་ཀྱི་སེམས་འགྱུ་མཚོན་བྱེད་དུ་བྱས་འདུག་སྙམ། དེ་བས་སྙན་ངག་ནི་སྤྱིར་བཏང་གི་སྐད་ཆའམ་ཚིག་སྦྱོར་ཙམ་མ་ཡིན་པར་རྟོག་ལྗོངས་དང་ཡིད་བརྙན་འདེགས་ཤིང་དུ་བྱས་ཏེ་ཚོར་འདུ་མཚོན་པ་ཡིན་ཞེས་པའི་གནད་ཀྱང་འདིར་ཐུག་གོ། བརྩམས་ཆོས་འདི་ཀློག་སྐབསབུང་བའི་གཤོག་སྣེ་ན་འདར་བའི་གླུདངདྲ་རྒྱའི་སྣེ་ན་འདར་བའི་?་བམཚོན་དོན་གྱེར་བའི་དར་ལྕོགཁྲེལ་གཞུང་གི་མདུན་རྒྱབསོགས་ཡིད་བརྙན་ཚོགས་པ་བློས་བསླངས་བྱེད་ཐབས་དང་ཚིག་གི་ཞུན་བརྡར་ལ་གཟབ་ནན་གྱི་ཆ་ཐོན་ཡོད་པ་མཐོང་ཐུབ་པའི་ཁར། རྩོམ་བྱང་ལ"འདར"ཞེས་བཀོད་པ་དེས་ཀྱང་ཀློག་པ་པོར་རྟོག་པ་འགྱུ་སའི་ཡུལ་ཡངས་པོ་ཞིག་སྟེར་ཐུབ་སྙམ། གཞན་སྙན་ངག་འདིའི་ཚན་པ་དང་ཚན་པའི་བར་ནས་ཚིག་རྐང་དང་ཚིག་རྐང་བར་ཐམས་ཅད་དུ་དབྱངས་འགྲོས་ཀྱི་ཆ་ལེགས་པོ་ལྡན་པ་དེའང་གླེང་རིན་ཡོད་པའི་དགེ་མཚན་ཞིག་ཏུ་མཐོང་སྟེ། སྙན་ངག་ལ་མ་གཞི་ནས་སེམས་ཀྱི་ཚོར་འདུ་མཚོན་བྱེད་ཀྱི་ཐབས་རྩལ་ལེགས་པོ་དགོས་པར་མ་ཟད་བཀླགས་ན་ཁ་ལ་བདེ་ཞིང་གྱེར་ན་རྣ་ལ་སྙན་པའི་དབྱངས་འགྲོས་ཀྱི་ཆའང་གལ་ཆེ་བར་འདོད།
དཔའ་རྩེ་ཡིས་ཕྲན་བཤད་སྤེལ་ཏེ་འོས་སྦྱོར་བྱས།
