ཡར་ལངས་ནས་བསམ་བློ་ཞིག་བཏང་ན།
མུན་པ་དང་གཤོག་པ། དེ་ལས་ཀྱང་ཞོགས་པ། དེ་ལས་ཀྱང་སྐད་ཆ།
རྡེའུ་ཞིག་གི་གློ་བ་ལྟར་འཁྱག་པའི་མིག་གི་འོད་ཀྱི་མདངས་རྣོན་པོ།
ངས་བཤད་པ་ནི་ཞོགས་པ་སླེབས་པའི་བར་གྱི་སེམས་ཀྱི་རྐང་རྗེས་དེའོ།།
ཡར་ལངས་ནས་བསམ་བློ་ཞིག་བཏང་ན།
ཆར་བའི་གསེབ་ཀྱི་ནགས་ཚལ། དཔེ་ཆའི་ཁྲོད་ཀྱི་སྟོང་ཉིད།
གཞན་ཡང་ཅི་ཡིན་མི་ཤེས་པའི་ཞོགས་པ་འདི།
ཁོ་བོའི་བྲང་ཁོང་མེ་ལྟར་འབར་བའི་དབྱར་དུས་ནི།
ངས་བཤད་འདོད་ཀྱི་སྙན་ངག་ཁྲོད་ཀྱི་མཛེས་སྡུག་ཁོ་ན་མ་ཡིན་པ་དེའོ།།
ཡར་ལངས་ནས་བསམ་བློ་ཞིག་བཏང་ན།
ཁོར་ཡུག་གི་ལྕགས་ཀྱི་ཐུ་ལུམ་འདི་ཟ་འདོད་ཡོད་ནའང་།
དུང་སྒྲ་ལྟ་བུའི་མཁའ་དབུགས་ཁྲོད་ཀྱི་འོད་རྣོན་པོ།
རྗེན་པར་སྒོམ་པའི་ཡིད་ལ་བརྣག་དཀའ་བའི་ལྷ་དང་ལྷའུ།
བཞུར་སྒྲ་ཡིན་ནའང་རྣ་ལ་མི་བདེ་བ་ནི་སྦྲིག་གུའི་ནང་གི་མི་གཙང་བ་མཐའ་དག་གོ །
ང་ཚོ་འདུ་སའི་ཁྱིམ་གཞིས་ནི་རས་གུར་ཁྲ་ཁྲ་དང་ཁང་མིག་ཧྲལ་ཧྲུལ་དག་ཡིན་འདུག
ཞོགས་པ་འདིར། ཡར་ལངས་ནས་བསམ་བློ་ཞིག་བཏང་ན།
མཐེབ་གཞོང་ལ་གཏགས་པ་ནི། ཡི་གེ་དང་ནོར་འགྲོ་བའི་རང་ཉིད་ཀྱི་བཞིན་རས་ཏེ།
སྐབས་དང་སྐབས་སུ། སྐད་ཆའི་ལག་པ་གང་སར་རྐྱོང་བར་དགའ་བའི་རང་ཉིད།
གཏམ་རྒྱུད་ཀྱི་ལོ་མ་ས་ནས་རྙིད་དེ་མཁའ་རུ་འཕུར་ན།
རླུང་བུའང་འཐེང་འགྲོས་སུ་གཡུགས་པ་མ་ཡིན་པར།
ཡིད་དང་འདྲེས་པའི་ཁྱོད་ཀྱི་མིག་གི་བདུད་རྩི།
གང་སར་འཕྱོ་བ་དེའོ། །
