ཤིན་ཧྭ་གསར་འགྱུར་ཁང་ནས་གནས་ཚུལ་སྤེལ་བར་ལྟར་ན། ཟླ་5པའི་ཚེས་1ཉིན་ནས་བཟུང་། རང་རྒྱལ་གྱིས་ལ་ཡིག་སོགས་རྒྱལ་མཚམས་ནས་འགྲོ་འོང་བྱེད་པའི་ལག་ཁྱེར་གཉེར་བར་ཐེངས་གཅིག་ལས་འགྲོ་དགོས་མེད་པའི་ལམ་ལུགས་ལག་ལེན་བསྟར་རྒྱུ་རེད་འདུག་པས། རེ་འདུན་ཞུ་མཁན་གྱིས་རྒྱལ་མཚམས་ནས་གྲོང་འོང་བྱེད་པའི་འགྲོ་ལུགས་གཉེར་སའི་སྐར་ཁུང་དུ་བསྐྱོད་ན། ཐེངས་གཅིག་རང་དུ་ལམ་ཡིག་གཉེར་ཐུབ་རྒྱུ་རེད་འདུག 

        “ཐེངས་གཅིག་ལས་འགྲོ་དགོས་མེད་པའི”ལམ་ལུགས་ལས་ལག་ཁྱེར་གཉེར་སྟངས་སྟབས་བདེ་རུ་འགྲོ་རྒྱུ་རེད། དེ་ཡང་དེ་སྔ་ལག་ཁྱེར་གཉེར་སྐབས་ཡུལ་དུས་མི་འདྲ་བའི་ནང་འདྲ་པར་སྐྱེལ་བ་དང་། མཛུབ་རིས་བླུག་པ། རེ་ཞུའི་དཔྱད་གཞིའི་ཡིག་ཆ་སྐྱེལ་བ།  ལག་ཁྱེར་གྱི་རིན་སྤྲོད་པ་སོགས་བྱེད་དགོས་ཀྱི་ཡོད། འོན་ཀྱང་ཟླ་5པའི་ཚེས་1ཉིན་ནས་བཟུང་། དུས་ཚོད་གཅིག་ནང་ས་ཆ་གཅིག་ཏུ་གཉེར་ཆོག་གི་ཡོད་པ་རེད། ད་དུང་། ཞིང་ཆེན་དང་ས་ཆ་གཞན་ནས་རྒྱལ་མཚམས་ནས་འགྲོ་འོང་བྱེད་པའི་ལག་ཁྱེར་གྱི་རེ་འདུན་ཞུས་ཚེ། ཞིབ་མཆན་འགོད་པའི་དུས་བཀག་ཉིན་30ནས་20བར་ཐུང་དུ་གཏོང་རྒྱུ་རེད་འདུག 
        རྒྱལ་མཚམས་ནས་མགྱོགས་མྱུར་སྒྲོལ་དགོས་པའི་མིར“ཐེངས་གཅིག་ལས་འགྲོ་དགོས་མེད་པའི”ལམ་ལུགས་ཀྱིས“ལྗང་མདོག་བགྲོད་ལམ”གྱི་ལག་ཁྱེར་གཉེར་བའི་ཞབས་འདེགས་ཞུ་ཡི་ཡོད་པ་དང་།  རྒྱལ་མཚམས་བསྒྲལ་ནས་ཚོགས་འདུ་དང་། གྲོས་མོལ། གན་རྒྱ་འཇོག་པ་བཅས་ནང་ཞུགས་དགོས་པའམ་ཡང་ན་ཕྱི་སྦྱོང་སློབ་མའི་མིང་ཐོ་འགོད་པའི་དུས་ཚོད་འཆར་ཉེར་ཡོད་པ་གང་ཞིག་མ་བསྐྱོད་གོང་ལག་ཁྱེར་བརླགས་པ་དང་རལ་བ་སོགས་ཀྱི་གནས་ཚུལ་ཐོན་པའི་མི་སྣར་ལག་ཁྱེར་ལམ་སེང་གཉེར་བའི་ཞབས་ཞུ་མཁོ་འདོན་བྱ་རྒྱུ་རེད་འདུག 
        ལས་ཀར་འགྲོ་མཁན་ཚོར་སྟབས་བདེ་སྐྲུན་ཆེད། ལས་ཀར་འགྲོ་མཁན་ཚོར་གཟའ་སྤེན་པ་དང་། ལག་ཁྱེར་གཉེར་བར་ཡོང་མཁན་ཉུང་བའི་དུས་དང་།  དེ་བཞིན་ངལ་གསོའི་དུས་སུ་རེ་ཞུ་དང་ལེན་བྱེད་རྒྱུ་རེད་འདུག