ཆུ་འཛིན་ལྷོག་ལྷོག་རླུང་བུས་དེད་པ་ཡིས།།

ཁྱོད་ཀྱི་ཕྲག་པ་སྒང་ནས་ནམ་མཁར་འཕྱོ།།

མི་ཆེན་སློག་དཀར་གྱོན་པའི་ཚུགས་ཀ་ཡིས།།

ང་ཡི་མཐོ་སྒང་གན་ནས་ཁྱོད་རང་འགྱིང་།།

རི་ཡི་བསྟར་འཕྲེང་གཡས་དང་གཡོན་དུ་བསྒྲིགས།།

སྤང་དང་ཐང་གི་ཁ་ཞེང་མདུན་དུ་བསྐྱངས།།

དྭངས་གཙང་ཆུ་ཡི་ཆབ་རྒྱུན་ལྷུང་ལྷུང་གིས།།

མཛེས་སྡུག་ཡུལ་གྱི་རི་མོ་མངོན་དུ་ཆགས།།

སྲིད་པ་གངས་ཀྱི་སྒལ་རུས་སྲ་བ་ཡིས།།

དུས་གསུམ་དུས་ཀྱི་ཁ་དོག་མ་ཡལ་བར།།

སྣ་ཚོགས་བཅུད་ཀྱི་བུམ་བཟང་སྦྲུམ་པ་ཡིས།།

རིན་ཆེན་རི་ཡི་ཟོལ་གྱིས་འདི་ལྟར་ཆགས།།

མི་ཉག་མ་ཆགས་ཁྱོད་ཀྱི་མདུན་དུ་ཆགས།།

དད་པའི་ལག་ཟུང་མཉེན་མོས་ཁྱོད་ཉིད་གཉོར།།

ཀྭི་བསོ་གཡང་གི་སྒྲ་དབྱངས་འབུམ་ཕྲག་གིས།།

འཕྲིན་ལས་གློག་གི་རྟ་ཕོ་མདུན་དུ་བཀུག།