༡

དུས་ཚོད་ནི་གཙང་བོ་ཞིག་གི་ཟོལ་གྱིས།

གད་སྙིགས་ལྟ་བུའི་ཕྱིར་དྲན་མཐའ་དག་ལ།

གཙང་དག་བྱས་རྗེས་ཀྱི་མེ་ལོང་དུ།

ཁྱོད་ཀྱིས་རི་ཁྲོད་ཀྱི་སྒྲུབ་ཕུག་དམར་པོ་ཞིག

ནགས་ཚལ་གྱི་སྙིམ་པར་ཡང་ཡང་བྲིས།

ཁྱོད་ཀྱིས་གྲེ་བ་ཡང་ཡང་བསལ་ཏེ།

སྐྱོ་ལ་སྡུག་པའི་མི་ཡུལ་ཞེས་པའི་ལུང་པ་འདིར།

དགའ་སྐྱོ་ཆགས་སྡང་གི་བསྲེས་སྦྱོར་ལས་ཐོན་པའི།

དབྱངས་རྟ་ཆག་རོ་ཞིག་ཏུ་གསང་གཏམ་བཅུད་སྟེ།

བརྗོད་འདོད་པའི་ཐག་སྣེ་ཞིག་ཡང་ཡང་བསྟན་བྱུང་།

སྙིང་ཉེ་བ་མཐའ་དག

ཚིག་གི་རོལ་རྩེད་ལས་རྙེད་པའི།

རི་སྒང་གི་སྨུག་པ་སྐྱ་བོ་ནང་བཞིན།

གར་འགྲོ་གར་འདུག་གི་ངེས་པ་མེད་པར།

ཁྱོད་ཀྱི་རུམ་ལ་མེ་ནུར་ལྡུག་བྱེད་ཀྱི་སྐམ་པར་གྱུར།

ཁྱོད་ཀྱི་སྐྱོ་ངལ་དང་མིག་ཆུ་ལས།

རི་མགོའི་དར་ལྕོག་ལ་སྨྲེང་བ་ཡང་ཡང་བསྐུར།

སུ་དང་གང་གིས་མི་ཚོར་བའི།

ཁྱོད་ཀྱི་ནང་སེམས་ཀྱི་དགའ་སྐྱོ།

དགའ་སྐྱོའི་ཆགས་སྡང་གི་རི་མོ།

རི་མོའི་གསེབ་ཏུ་བཅུག་པའི་བརྡ་དོན་སྐྱ་བོ།

ཡུན་རིང་ལ་ལྕགས་ཟྭ་བརྒྱབ་པའི།

སྒམ་ཆུང་ཞིག་དང་ཀུན་ནས་མཚུངས།

ཁྱོད་ནི་མྱ་ངན་ཐང་ན།

གསོན་པར་རེ་ཐག་ཆོད་པའི

ཡུལ་གྱར་བ་ཞིག་ནང་བཞིན

འཆི་བ་ལ་རྒྱབ་བསྙེས་ཏེ

སྐྱོ་ངལ་གྱི་ཕྱིར་མིག་མདའ་མོས་འཁོར་བ་ལ།

ཁེར་རྐྱང་གི་ཉམས་ལེན་ལས་སྐྱེས་པའི།

ཀློང་རྡོལ་བའི་ཚོར་བའི་མངའ་ཐང་ཆེན་པོ་ཞིག

ཡང་ཡང་སྐྱེས་སུ་འདེགས་འདོད་ཀྱི།

སྐོམ་པའི་སྲེད་པ་སྐྱེས་མྱོང་བ་བདེན་ཨང་།

༢

རྨི་ལམ་གྱི་གཤོག་པར་བྲིས་ཀྱང་།

འདེགས་པར་དཀའ་བའི་སྐྱོ་ངལ།

གཞས་ལ་ཉན་བཞིན།

སེམས་ཀྱི་གས་སྲུབས་ལ།

མེ་ཏོག་གི་ལྷན་པ་རྒྱག་པའི།

ཁྱོད་ནི་རང་ཉིད་ཀྱི་གྲིབ་གཟུགས་ནང་།

སྐྱེ་འཆིའི་གསང་བ་ལ།

མཆན་བུ་འདེབས་པའི

སྨྱོན་པ་ལྟ་བུའི།

མི་ལྷག་གཞན་ཞིག་རེད།

ཡུན་རིང་ཞིག་འགོར་རྗེས།

ཁྱོད་ཀྱིས་དཀར་ཡོལ་ཁ་རུ་འཁྱིལ་བའི།

འོ་སྤྲིས་ལ་ཕུ་ཞིག་བཏབ་རྗེས།

སྨུག་པ་འཐིབས་པའི།

རྫ་རི་རོག་རོག་ཅིག

ཁྱོད་ཀྱི་མིག་གཡས་གཡོན་གཉིས་ལ་ཟུག་ཡོང་།

རི་གླུའི་དབྱངས་དང་འདྲེས་པའི།

གཡང་དཀར་འབའ་སྒྲ་ཞིག

ཁྱོད་ཀྱི་རྣ་གཡས་གཡོན་གཉིས་ལ་ཟུག་ཡོང་།

མེ་ཏོག་གི་བསུང་ངད་ཞིམ་པོ་ཞིག

ཁྱོད་ཀྱི་སྣ་གཡས་གཡོན་གཉིས་ལ་ཟུག་ཡོང་།

ཏིང་ངེ་འཛིན་དེ་ལས་ལངས་རྗེས།

ཁྱོད་ཀྱིས་ཡང་བསྐྱར།

འཁོར་བ་ཞེས་པ་འདི།

དཀར་ཡོལ་འཚོ་འཚོ་ཞིག

བྱེད་ཨང་སྙམ་པའི་རྐན་སྒྲ་འབྱིན།

དོན་དམ་པར་ཁྱོད་ནི་འཁོར་བ་ལས།

གོམ་པ་གང་སྔུན་ནུར་བྱས་མེད་ནའང་།

ཁྱོད་ཀྱིས་ཡང་དང་བསྐྱར་དུ།

འཁོར་བ་ལས་ཁེར་རྐྱང་ཁུར་ཏེ།

ཡུལ་ཕྱོགས་གཞན་ཞིག་གི།

མགྲོན་པོར་སྟ་གོན་བགྱིད།