མིག་ཟུང་མ་བཙུམ་པའི་སྔ་རོལ་ཏུ ཁྱོད་དམ་ང
ཡང་ན་ཁོ
རླུང་བུ་བཞིན་གང་དུ་འགྲོ་དགོས་པ
གསལ་བོ་ཞིག་འཆད་རྒྱུ་མེད་ནའང
ང་ཚོས མེ་ཏོག་རྐང་གཅིག་གམ
ཡང་ན མིག་ཆུ་ཐིགས་པ་གཅིག་གི་ཕྱིར་ཏུ
ས་གཞིའི་པང་ནས་འཕག་འཚག་དེ་འདྲ་རྒྱག་དགོས་དོན་ག་ལ་ཡོད
མི་ཚེ་ཐུང་ཐུང་འདིའི་ནང
ང་ཚོས འཆི་བདག་འཆི་བདག་ཅེས་གླེང་བཞིན
རང་གིས་རང་ལ་འཇིགས་སྐྲག་གྲངས་མེད་སྦྱིན་བཞིན་འདུག
ང་ཚོས འཆི་བ་འཆི་བ་ཟེར་བཞིན
རང་གིས་རང་ལ་མིག་ཆུ་ཡང་ཡང་སློང་གིན་འདུག
མིག་ཟུང་ག་ལེར་བཙུམ་རྗེས ཁྱོད་དམ་ང
ཡང་ན་ཁོ
ཀོ་གྲུ་ཆུང་ཆུང་ཞིག་གམ
སྦྲང་མ་ཆུང་ཆུང་ཞིག་ཏུ་སྤྲུལ་ནས
ཐག་རིང་ཐག་རིང་ཞིག་ལ་འགྲོ་དགོས་པ་བདེན་ན
ང་ཚོས ད་དུང་ཅི་ཞིག་བརྗེད་སོང་བ་ལྟར
ཕྱི་མིག་ལིང་ལིང་གིས
སྤྱོད་ཁང་ལྟ་བུའི་མི་ཡུལ་ལ་ཅེར་དགོས་དོན་ཅི་ལ་ཡོད
ཝ་ཡེ འཆི་བ་ནི་ཁྱོད་ཀྱིས་དྲན་བཞིན་པའི་འཇིགས་རུང་གི
རྨི་ལམ་དེ་མ་ཡིན་ཏེ
འཆི་བ་ནི་དུས་ཚོད་ཀྱིས་མིང་རྟགས་བཀོད་ཟིན་པའི་གནང་ཞུ་ཡི་གེ་དེའོ
[ཕྲན་དཔྱད།/རྩེ་སྲས་ཨ་རྡོ།（རྨ་ལྷོ）]ང་ནི་འཆི་བར་དང་དོད་བླ་ལྷག་བྱེད་པའི་མི་ཞིག་ཡིན། ལན་རེར་འཆི་བ་དྲན་ཚེ་འཇིགས་པ་སྐྱེ་ཞིང་སྐབས་རེར་དེ་ལ་མཚར་སྣང་ཡང་འཛིན། ལན་རེར་འཇིག་རྟེན་འདིར་གསོན་པ་ནས་འཆི་བ་ནི་ཆོས་ཉིད་དུ་བསམས་ཤིང་དེ་ཉིད་མི་རྟག་པའི་སྒྱུ་འཕྲུལ་རིགས་ཤིག་ཏུ་སྒོམ་སྟེ་བསམ་གཞིག་བྱེད་པར་ཡང་གོམས་ཡོད། བག་ཆགས་དེའི་དབང་གིས་སམ། རྩོམ་རིག་ཅེས་པའི་ལན་རེར་མཛེས་ཤིང་སྡུག་ལ་ལན་རེར་བག་ལ་ཞ་བའི་དགའ་ཕྱོགས་འདི་ལ་གཞོལ་ཁུལ་བྱས་པ་ནས་ད་བར་དུ་ངས་འཆི་བ་མཚོན་པའི་སྙན་ངག་དང་གཏམ་རྒྱུད། གློག་བརྙན་དང་གནའ་གཏམ་སོགས་མང་དུ་ཐོས་ཤིང་མཐོང་མྱོང་ངོ་།། འཇིག་རྟེན་མི་ཡུལ་འདིའི་མགྲོན་པོ་ཕལ་བ་ཞིག་ཏུ་གྱུར་ཏེ་གཞོན་ནུའི་ལོ་ཚོད་དུ་ཐོན་པ་ནས། རང་གི་མ་ཡུམ་དང་གཉེན་ཉེ་དུ། རུ་སྡེའི་ཡུལ་མི། གྲོགས་པོ་གྲོགས་མོ་འགའ་རེ་འཇིག་རྟེན་མི་ཡུལ་དང་གཏན་དུ་གྱེས་རྗེས་དེ་ཉིད་དྲན་པའི་སྐྱོ་གདུང་དང་། འདས་དོན་གྱི་ཟ་ཟུར། དེ་ནས་འཆི་བའི་རྣམ་འགྱུར་དང་སྐབས་དེའི་སེམས་ཚོར་སོགས་མདོར་ན་འཆི་བ་ཞེས་པའི་ཐ་སྙད་འདི་ལ་ཨེན་ཙམ་ཉེ་རུ་བཅར་གྱིན་པའི་ཚོར་བ་ཡང་ངང་གིས་སྐྱེ་ཡོང་།
སྤྱིར་བཏང་འཆི་བ་ནི་ཕལ་བའི་མི་ཡི་སྐད་ཆས་མཚོན་པར་མི་ནུས་ཤིང་སྙན་ངག་པའི་ཚོར་བ་སྐྱེན་པོའི་ཀློང་དུ་བཞག་ཚེ་དེ་ཉིད་ལ་ཡང་རང་རང་གི་དད་མོས་དང་སེམས་ཚོར་གྱི་འགྲེལ་བཤད་རྒྱག་སྟངས་རེ་ངེས་པར་ཡོད་སྲིད་པར་སྣང་ཞིང་། བར་སྐབས་འདིར་གྲོགས་པོ་སྙན་ངག་པ་མར་ཁུ་རྒྱལ་མཚན་ལགས་ཀྱིས་བྲིས་པའི་ཁོ་རང་གིས་འཆི་བར་བཟུང་བའི་རྣམ་འགྱུར་རམ་སེམས་རྩའི་མདུད་པ་འགྲོལ་བྱེད་ཀྱི་སྙན་ངག《འཆི་བ》ལ་ང་ཚོས་མྱོང་རོལ་ཐེངས་ཤིག་བྱེད་པར་བྱའོ།།
མི་རེ་རེས་འཆི་བར་བཟུང་བའི་རྣམ་འགྱུར་མི་འདྲ་སྟེ། འགའ་རེས་འཆི་བ་ནི་མཛེས་སྡུག་གི་འགྲུལ་བཞུད་དང་རྨི་ལམ་དུ་ལྟ་ལ། འགའ་རེས་འཆི་བ་ནི་འཇིགས་སྐྲག་གི་དབང་ཤེད་དང་ཡོད་ཚད་མཇུག་བསྡུ་བར་ལྟའོ།། དེ་ལས་སྙན་ངག་པ་ནི་ག་དུས་ཡིན་ཡང་འཆི་བར་གྲ་སྒྲིག་དང་དེ་ལ་དད་མོས་བྱེད་མཁན་གྱི་རིགས་སུ་གཏོགས་པར་སྙམ་སྟེ། ཁོ་ཚོས་འཆི་བ་ནི་ནར་སོན་གྱི་གོ་རིམ་དང་བླ་སྲོག་གི་རིན་ཐང་མཚོན་པའི་མཛེས་སྡུག་ཏུ་ལྟ། འཆི་བ་ཡོད་པས། ད་གཟོད་ང་ཚོ་གསོན་བསྡད་ཡོད་པའི་བདེ་སྐྱིད་དང་དེའི་དཔག་ཚད་འཇལ་ཐུབ། འཆི་བ་ཡོད་པས། ཡོད་ཚད་སྒུལ་ཤུགས་དང་ཧུར་བརྩོན། མདུན་སྐྱོད་ཀྱི་དོན་སྙིང་ལ་ལྟ། འཆི་བ་གླེང་ཡོང་དུས། སེམས་དངངས་བྱེད་དང་ཡིད་སྐྱོ་བྱེད་རེ་འབྱུང་བར་སྲིད་ན། འཆི་བ་ནི་མི་སེམས་སྒུལ་བར་བྱེད་པའི་དུས་ཚོད་ཀྱི་སྐྱེལ་མའི་གཡབ་མོ་དང་བརྩེ་བའི་ཁ་དོག་ཏུ་ཅི་ལ་འགྱུར་མི་དཔེ། འཆི་བ་གླེང་ཡོང་དུས། ཞེན་ཆགས་དང་དུངས་ཀ་རིགས་ཤིག ཤ་ཁྲག་གདོས་བཅས་ཀྱི་ཕུང་བོ་འདི་ལ་སྡུག་བསྔལ་བཟོད་ཐབས་མེད་པ་རེ་བསྐྲུན་སྲིད་ན། འཆི་བ་ནི་ཆོས་ཉིད་ཀྱི་རྡོ་རིང་ངོས་སུ་བརྐོས་པའི་ཡིད་འོང་གི་གྱེས་བྲལ་དང་འགྲོ་ཁའི་དཔའ་གདེང་གི་ཡིག་འབྲུ་རུ་ཅི་ལ་འགྱུར་མི་སྲིད། འཆི་བ་ཡོད་པས། ང་ཚོས་རང་ཉིད་འཇིག་རྟེན་མི་རུ་སྐྱེས་པའི་རིན་དོད་དང་བདེན་ཁ་གཞལ་ཐུབ། དེ་བས། འཆི་བར་སྐྲག་དགོས་མེད་དེ། ང་ཚོ་ག་དུས་ཡིན་ཡང་དེ་ལ་ཉེ་རུ་བཅར་དགོས་པའི་གྲ་སྒྲིག་བྱོས་དང་། འཆི་བ་ནི་ཁྱོད་ཀྱི་ཡོད་ཚད་མཇུག་རྫོགས་བྱེད་མ་ཡིན་ཏེ་དེ་ཉིད་ཁྱོད་རང་གང་ཟག་ཅི་ལྟ་བུ་ཞིག་ཏུ་གྱུར་དང་འགྱུར་གྱི་སེམས་ཉིད་ལ་ཞིབ་བཤེར་བྱེད་སའོ།།
དེ་མིན་ངས་འདི་རུ་མར་ཁུ་རྒྱལ་མཚན་ལགས་ཀྱི་སྙན་ངག་འདི་ཁྱེར་ཡོང་སྟེ་ཁྱོད་ཚོའི་མདུན་ནས་བལ་བསེད་བསེད་དང་སྐུད་པ་འཁེལ་འཁེལ་བྱས་ཏེ་ཕྲན་དཔྱད་ཚད་ལས་འདས་པ་བྱེད་པར་མི་སྤྲོ་ལ། དྲང་མོར་བཤད་ན་རང་གི་ཤེས་རབ་ཀྱི་རྩལ་གྱིས་ཀྱང་འདང་གིན་མི་འདུག སྙན་ངག་འདི་མ་གཞི་ནས་ཁ་གསལ་ཞིང་གོ་བདེ་བ་ཞིག་ཡིན་པས་ན་རྩོམ་རིག་ལ་དགའ་དད་ཆེ་བའི་མི་ཞིག་ཡིན་ན་ཕལ་ཆེར་མི་རང་རང་གི་ངོས་ཐད་ནས་གོ་བ་རེ་ལེན་མི་ཐུབ་པའི་དཀའ་ཁག་ལ་འཕྲད་པར་མི་སེམས་སོ།།
