ཀྱེ་ཀྱེ་མི་ལོ་གསུམ་གྱི་སྙན་ངག་ལགས།།
ལན་ཆགས་སྟོང་ལ་གྲུབ་པའི་དྲན་གདུང་ཁྱེད།།
སྤྲིན་དང་རླུང་བུ་བཞིན་དུ་གང་ལ་རྒྱུ།།
ཁོ་བོས་བསྒུགས་པའི་བསྐལ་པ་མཐའ་ལ་ཐུག །
འུ་གཉིས་བར་ཐག་མུན་པ་སྟོང་གིས་ཆོད།།
འདི་ནི་ན་ཟུག་ཅིག་གི་སྡོང་བོ་ལགས།།
ནམ་ཞིག་ཁྱེད་ཀྱིས་ང་རང་མཐོང་སྲིད་ན།།
དེ་དུས་ང་ལ་བདེ་འཚམས་མ་འདྲི་རོགས།།
ང་ནི་ཞེན་ཆགས་ཤིག་གི་སྣེ་མོ་རུ།།
ཉིན་མཚན་གཉིས་ཆར་མུན་པར་སྤྲུལ་ནས་ཡོད།།
ཉིད་ཀྱི་མཛེས་པ་ལྟ་བས་མི་ངོམས་ཞེས།།
ཐ་སྙད་ཁྲི་ཕྲག་མང་པོས་ཡང་ཡང་བྲིས།།
ལུས་ཀྱི་སྒེག་པ་དྲན་གདུང་བར་ལ་ལྷགས།།
མིག་དང་ཡིད་ཀྱི་ངོས་སུ་ཡང་ཡང་ཤར།།
མདོར་ན་ཚེ་ཡི་ཐིག་གུ་མ་ཆད་བར།།
ཁོ་བོས་ཁྱེད་རང་གླེང་བར་ངལ་བ་མེད།།
ནམ་ཞིག་ཁྱེད་ཀྱིས་ཁོ་བོའི་བྲང་ཁ་ལ།།
ལག་གཉིས་བཞག་སྟེ་མཆུ་ཡིས་རེག་ཙམ་གྱིས།།
དུངས་པའི་གཏམ་གྱི་ལྷུ་རྐང་བསྒྲིགས་པ་སོགས།།
མ་དྲན་ཡིད་ཀྱི་ངོས་སུ་ག་ལེར་གསལ།།
