འགྲོ་འདུག་སེམས་ཀྱི་རྟ་ཕོ་ཞེད་པའི་ཚུལ་དུ།།
ཁོར་མོ་ཡུག་གི་ལམ་དུ་ཨ་ཐང་ཆད་འདྲ།།
འཇིག་རྟེན་ཧྲིལ་པོ་འཁྲུལ་བ་ག་རེ་ཡིན་ནམ།།
སྡུག་ཡུས་ཁ་བ་ངམ་ནག་འཚུབ་སྐོར་ཉིལ་ལེ།།
མཚམས་རེར་ཡི་གེ་བྲིས་ཤིང་སྐྱོ་བ་ཆེན་པོས།།
སྐྱེས་རབས་དུ་མའི་འོད་ཟེར་སྐེམ་པར་བྱས་བྱུང་།།
རྔུལ་ཆུས་རྒྱུན་མར་འཁྲུད་པའི་སྐྲ་ཉག་རེ་རེ།།
ཆག་འཇིག་རི་མོ་དོད་པའི་རས་གཞི་ཞིག་སྟེ།།
ཡིད་ཆད་ཕྱི་རུ་འཆར་བའི་རྒྱུ་རྐྱེན་སྣ་ཚོགས།།
དེ་གའི་ཁ་དོག་མང་པོའི་སླད་དུ་འབྱོར་བས།།
ཐོར་ཤོར་རླབས་ཀྱི་གྲི་སོ་ངེར་ངེར་གཏད་པའི།།
མེ་ཏོག་ལྷུང་བའི་ཞག་སྨད་སྐྱིད་པོ་མེད་ཀྱང་།།
སྨྲེང་སེམས་ཆར་ཞོད་ཆེ་བའི་སྐྱེ་བ་ད་ནི།།
བཟོ་ལྟ་ཇི་སྙེད་ཅིག་གིས་གཞན་ངོར་འགུལ་ན།།
ཕལ་བ་ཕལ་བའི་ཁྱིམ་དུ་འཛུལ་བ་སྐྲག་ཅིང་།།
སླར་ཡང་སྒྱུ་མའི་ནགས་སུ་སྒེའུ་ཁུང་ཕྱེས་ནས།།
སེམས་སུ་སྤྲིན་གྱི་འདུ་ལོང་ཡོམ་ཡོམ་བསྒུལ་ཏེ།།
མིག་ཟུང་མེ་ལོང་ངོས་ནས་འབྲལ་བར་མ་བྱུང་།།
༢༠༡༧.༩.༢༩
