ཞེ་གནག་པའི་དུས་ཚིགས་འདིས
ནད་ཡམས་སློང་བྱེད་ཀྱི་མཁའ་དབུགས་དག་ཁྲིད་ནས
གཡས་གཡོན་གྱི་རྩི་ཤིང་དང་མེ་ཏོག་དག་ཁྱུར་མིད་བཏང་ཞིང
སེམས་ལྡན་དང་སེམས་མེད་ཀྱི་འཇིག་རྟེན་ཡོད་ཚད་དམིགས་མེད་དུ་བཅོམ
དགུན་ཁ་ཧྲིལ་པོ་ནི་གདུག་རྩུབ་ཀྱི་འདྲེ་ཕོ་བཞིན
དབུགས་དབྱུང་ཐེངས་གཅིག་ལ་ས་གཞིའི་དབང་རྩ་བསྡམས་ཤིང
འགྲོ་འདུག་གི་གནས་མལ་ཡོད་ཚད་འཁྱག་པའི་ཁམས་སུ་བཅོས
དགུན་ཁ་ཨ་དགུན་ཁ
ཁྱོད་ཀྱིས་ངའི་རྨི་ལམ་གྱི་གཤོག་པ་ཐལ་བར་གཏོང་དོན་ཅི
ང་ནི་ས་གཞིའི་སྲུབས་ཀ་ནས་སྐྱེས་པའི་རྣམ་ཤེས་སྐྱ་བོ་ཞིག་ལས་མ་འདས
ང་ནི་མི་ཚོགས་ཀྱི་དབུས་སུ་རྡོག་ཁྲེས་དྲུད་དེ་གར་འགྲོ་མེད་པའི་ལམ་པ་ཞིག་ལས་མ་འདས
ང་ནི་ཐ་སྙད་ཤི་རོ་དག་རེ་རེ་བཞིན་སྒྲུག་སྟེ
སྙན་ངག་མ་ཡིན་པའི་སྙན་ངག་འབྲི་མཁན་ཞིག་ལས་མ་འདས
དགུན་ཁ དགུན་ཁ
ཁྱོད་དབུལ་དྲགས་པ་མིན་ན
ཚེ་སྲོག་གི་སྐྱེ་རྒ་ན་འཆིར་བར་ཆད་བཟོ་དགོས་དོན་ཅི
༢༠༡༨.༢.༡ ཉིན།
