རྨ་ཁའི་ནང་དུ་རྟ་ཕོ་གོ་གཉིས་འཚེར།།

འཚེར་སྐད་དབུས་སུ་གློག་དམར་ཡང་ཡང་འཁྱུགས།།

རྟ་ཕོ་བདུན་རེས་ཤིང་རྟ་གཅིག་རེ་འདྲུད།།

ཤིང་རྟ་རེ་ལ་སྒྱུ་མའི་མེ་ལོང་རེ།།

མེ་ལོང་རེའི་ནང་ཉི་འོད་ལམ་ལམ་འཚེར།།

ཉི་འོད་ཀློང་དུ་ཞ་ར་གྲངས་མེད་ངུ་།།

མིག་ཆུའི་གཙང་པོ་བརྒལ་བའི་རྟ་པ་གཅིག །

ཉོན་མོངས་སྨུག་པའི་ཁྲོད་ནས་རྒྱང་དུ་ཡལ།།

ང་ཡི་དཔུང་བའི་ངོས་ཀྱི་རྨ་ཁ་དེས།།

མེ་འཁོར་དང་ནི་རྨི་ལམ་སྣ་ཚོགས་བཟོ།།

མེ་འཁོར་ནང་དུ་མཚན་གཅིག་སྐྱེལ་བའི་རྗེས།།

རྒྱང་ལ་ལོག་པའི་རྟ་པ་དེ་དང་མཇལ།།

རྟ་པ་དེ་ཡི་ཡོབ་ཆེན་ཆ་མ་ལས།།

དུ་བ་མཆེད་ལ་མེ་སྟག་ཁངས་ལྟར་འཚུབས།།

ཁ་རྔོག་རླུང་གིས་ཤད་པའི་རྣམ་པ་དེས།།

འཇིག་རྟེན་རི་བོ་དག་ཀྱང་བགྲོད་པ་མཐོང་།།

འཁྲུལ་སྣང་ཀློང་དུ་མངོན་སུམ་རླུང་བུ་འཚུབས།།

རླུང་འཚུབ་དེས་ནི་སྡོད་པའི་གནས་རྣམས་འཁུར།།

ཕྱིར་ལ་ལོག་པ་མེད་པའི་དུས་ཚོད་འདིར།།

མངོན་སུམ་དང་ནི་འཁྲུལ་བའི་ངོ་བོ་འདྲེས།།

༢༠༡༨.༠༡.༤ཉིན།