“ལྔ་གཅིག”རྒྱལ་སྤྱིའི་ངལ་རྩོལ་དུས་ཆེན་གྱི།།
སྒོ་གླེགས་གྲོལ་བའི་སྔ་དྲོའི་སྐབས་ཤིག་ཏུ།།
སྙུག་ཁ་ཡངས་པའི་བྷོ་ཊའི་རྩོམ་མཁན་དག །
ལྷོ་ཁའི“ཨེ་པ་ཚང”དུ་སྔ་ཕྱིར་འཛོམས།།
ལྷན་འཛོམས་གང་དེའི་དམིགས་སའི་གནས་མཆོག་ནི།།
རྒྱལ་དབང་དྲུག་པའི་འཁྲུངས་གཞིས་ཕྱོགས་ལགས་ན།།
རླངས་འཁོར་བཞི་ཡིས་གྲུབ་པའི་རུ་ཚོགས་དེ།།
རྩེད་ཐང་མེས་པོའི་ཐང་ནས་ལམ་ལ་ཆས།།
མཁར་གྱི་ཐོག་མ་ཡུམ་བུ་གཡས་སུ་བསྐྱུར།།
རི་ལ་མཐོ་བ་ཤམ་པོ་གཡོན་དུ་བཞག །
འཕྲུལ་གྱི་འཁོར་ལོའི་བགྲོད་མཚམས་མ་ལྷོད་པར།།
ཆུ་གསུམ་སུམ་སྣ་མིག་གི་དཔྱིད་དུ་མངོན།།
མཚམས་རེར་ཁ་བའི་འདབ་མ་འཚུབ་ཅིང་འཕྱོ།།
ལན་རེར་ཆར་ཟིམ་རྒྱུན་བཟང་ངང་གིས་འཇོ།།
སྐབས་ཤིག་ཉི་འོད་དྲོན་མོས་ལུས་སེམས་གསོ།།
མཐོ་སྒང་ནམ་ཟླས་འཁོར་བའི་རང་མཚང་སྟོན།།
ལ་མོར་འགོ་དུས་རུས་སྦལ་འགྲོས་བཞིན་བུལ།།
ཐུར་ལམ་སྙེག་དུས་རྦབ་རྡོ་འགྲིལ་ལྟར་མྱུར།།
མྱུར་བུལ་རེས་སུ་འཁོར་བའི་རྟིང་མ་ལ།།
ལྷུན་རྩེ་ས་ཡི་དཀྱིལ་འཁོར་ཐོང་དུ་བསུས།།
མཐའ་བཞི་རི་རྒྱལ་ལྷུན་པོས་ཡོངས་སུ་བསྐོར།།
ཞོལ་དག་ཞིང་ས་གཤིན་པོའི་འདབ་གཤོག་ཡངས།།
བར་བར་གྲོང་ཚོའི་ཁང་བས་ལེགས་པར་བརྒྱན།།
མི་ཡི་ཡུལ་གྱི་སུམ་རྩེན་ཞེས་བྱར་གྲགས།།
གྲགས་པ་དེ་ཡང་ཕྱི་སྣོད་ཁོ་ནས་མིན།།
བཅུད་ཀྱི་མི་ལ་སྲོང་བཙན་འཕྲུལ་བློན་ཏེ།།
མགར་དང་ཐོན་མི་ལས་གཞན་དུས་ཕྱིས་ཀྱི།།
དྭགས་པོ་ལྷ་རྗེ་སོགས་ཀྱང་གནས་འདིར་འཁྲུངས།།
དང་བའི་ཡིད་ལ་དད་པའི་རྒྱན་འདོགས་ཞོར།།
ལྷོ་ལམ་རིང་མོ་གཅོད་པའི་བརྒྱུད་རིམ་ནང་།།
གནམ་འདེགས་ཀ་བར་བསྔགས་པའི་གངས་རི་དང་།།
རྐང་བཞི་གཟས་ལ་བཀྲམ་པའི་སྤང་གི་རི།།
དེ་ཡི་སུལ་ནས་བརྡོལ་བའི་ཆབ་ཀྱི་རྒྱུན།།
རྒྱུན་གྱིས་བསྐྱངས་པའི་གཤོང་གི་འདམ་རྩྭའི་ཆུ།།
སྤྲིན་དཀར་མངལ་དུ་སྦྲུམ་པའི་མཚོ་དང་མཚེའུ།།
གཅིག་ལས་གཅིག་ལྷག་མཐོ་སྒང་དཔལ་དུ་བཀྲ།།
བཀྲ་ཤིས་གླུ་དབྱངས་རྣ་བར་ཆེར་སྙན་དུས།།
གཞོགས་གཉིས་རྩིག་པ་དྲང་མོས་བཅད་པའི་ངོར།།
ཚངས་མགུར་བོད་རྒྱ་ཡི་གེས་ལེགས་བྲིས་པ།།
ཡིད་ཀྱི་དང་བ་འདྲེན་པའི་ལྕགས་ཀྱུར་འཕོས།།
འཕྲུལ་གཟུགས་དེ་ཡིས་ཐོག་དྲངས་མཚོ་སྣ་རྫོང་།།
ཁང་རྩེག་བཀོད་ལེགས་སྲང་བར་གཙང་ཞིང་དག །
ཚོང་ཟོང་ཀུན་འདུས་ཟས་བཅུད་ཡོངས་འཛོམས་པས།།
མགྲོན་ཚོགས་སྤྲིན་གྱི་འདུ་འགོད་བཞིན་དུ་འཁྲིགས།།
གནས་དེར་བྲལ་ནས་ཐང་ཆེན་འཕྲེད་གཏུབས་པར།།
སྤོས་ལ་ལྟ་ཅི་དེའུ་འབུར་ཆུང་བ་ཡང་།།
སྨུག་པའི་དར་གོས་ཆེན་པོས་ཡོངས་བཏུམས་ཚེ།།
སྐབས་ཤིག་འཆི་མེད་ལམ་དུ་རྒྱུ་འདྲ་བྱུང་།།
ཚོར་ཀློང་དེ་འདྲར་འཁྱམས་པའི་མཐའ་མ་ལ།།
ལུང་དང་གྲོག་ནང་འབབ་པའི་དབུ་བརྩམས་པར།།
ལྷ་བབས་ཐེམ་སྐས་དཔྱངས་འདྲའི་ལམ་གྱི་སྣེ།།
མཐོང་བྲལ་ལེགས་པོ་རོང་གི་མཐིལ་དུ་ཟུག །
ཁ་བའི་རྡུལ་མང་ལུད་ནས་ནགས་གསེབ་སླེབས།།
ནགས་ཀྱི་དྲ་བ་བྲེས་ནས་རི་གདོང་བཀབ།།
རི་ཞོལ་སྟག་མའི་མེ་ཏོག་སྣ་བརྒྱ་བས།།
འཛུམ་བག་གྲོལ་ཏེ་མགྲོན་བརྒྱ་མ་ལུས་བསུ།།
མཁའ་ལ་ཟུག་པའི་ལྗོན་པའི་རྩེ་མོ་དང་།།
ལམ་གྱི་འགྲམ་དུ་སྤྲེའུས་འཁྱུག་རྩལ་ངོམ།།
སྔོན་ནས་རེ་བའི་ལྷོ་མོན་ཁུ་བྱུག་གི །
གདངས་སྙན་དུས་སྐབས་འདི་འདྲར་ཐོས་པ་མཚར།།
ལུང་མཐིལ་འབབ་པའི་གཙང་ཆབ་སྔོན་མོ་ཡི།།
འགྲམ་གྱི་རྒྱུ་མ་འཁྱིལ་འདྲའི་གཞུང་ལམ་ཆེ།།
ཕུ་འདེད་བྱས་པར་དམིགས་སའི་མག་མང་གྲོང་།།
ཁོད་ཡངས་གནས་སུ་ལྷམ་མེར་ལྷང་ངེར་མཛེས།།
མགྲོན་ཁང་མདུན་སར་མོན་གྱི་བུ་བུ་མོས།།
མཚལ་ལྟར་དམར་བའི་ཆས་བཟང་ལེགས་སྤྲས་ཏེ།།
དཀར་གཙང་དར་དང་སྔོན་མོ་ནས་ཆང་གིས།།
བསུ་བ་བགྱི་དུས་མིག་ལས་མཆི་མ་དཀུ།།
མུན་པའི་ལྭ་བས་ཕྱི་སྣོད་བསྒྲིབས་དང་ལྷན།།
ཐང་ཆེན་དབུས་ཀྱི་སྲེག་ཟ་མཁར་མཆེད་པར།།
ཨ་ལོང་བསྐོར་འདྲའི་སྒོར་བྲོའི་སྟངས་སྟབས་ཀྱིས།།
ཕ་ཡུལ་སླེབས་འདྲའི་ཚོར་བས་རྒྱུད་ཀུན་ཕྱུག །
ལྷག་པར་ཁ་ལག་ཟ་བའི་བར་སྐབས་སུ།།
ཞལ་རས་ཟླ་བ་སྔོན་ཆད་མ་མཐོང་ཡང་།།
མཚན་སྙན་འབྲུག་སྒྲ་ཐོས་པའི་རྩོམ་མཁན་ཚོར།།
ཁ་བརྡ་གློད་པས་ཡིད་སེམས་ཁྱོན་ནས་བཟི།།
བཟི་ཚོར་རྒྱུན་གྱིས་མཚན་ཞག་ཕར་བསྐྱལ་ཏེ།།
ཉིན་མོ་གསར་བའི་གསེར་ཞལ་མངོན་མཇལ་བར།།
ས་གནས་དཔོན་རིགས་དུ་མ་བྱོན་དང་ལྷན།།
ལྷན་ཅིག་ཚོགས་འདུའི་རིམ་པ་བསྟར་ལ་བརྒྱུས།།
ལ་ལས་ཡུལ་གྱི་གནས་ཚུལ་མཚམས་སུ་སྦྱོར།།
འགའ་རེས་ལོ་རྒྱུས་གསང་བ་གསེད་དུ་འགྲོལ།།
སྐོར་ཞིག་མ་འོངས་བླང་བྱ་རིས་སུ་འགོད།།
ཀུན་ཀྱང་མཚོ་སྣ་སྒྲོགས་པའི་གནད་དུ་འབབ།།
མཐུད་དེ་གསར་རྩོམ་ལྟེ་གནས་བྱང་བུ་ཆེ།།
སྦྱིན་པའི་མཛད་སྒོ་སྤེལ་ཅིང་སྒེར་འབྲེལ་དང་།།
མཉམ་ལེན་པར་སོགས་བསྐྱོན་པའི་གོ་རིམ་ནང་།།
མཛའ་གཅུགས་མདུད་པ་སྔར་ལས་གྲིམ་པ་བྱུང་།།
སྒོས་སུ་ཆེད་ལས་མཁས་པ་གདན་འདྲེན་གྱིས།།
རྒྱལ་བ་ཚངས་དབྱངས་རྒྱ་མཚོ་དང་འབྲེལ་གྱི།།
ལོ་རྒྱུས་གསང་བའི་སྒོ་འཕར་ཕྱེ་བ་ལས།།
ཡིད་ཀྱི་མཁའ་ལ་ཤེས་བྱའི་རྒྱུ་སྐར་བརྩེགས།།
ཕྱི་དྲོའི་ཆ་དེར་རྒྱང་རིང་མདོ་སྨད་ནས།།
ཐོས་ཤིང་དད་ལ་མངོན་དུ་ཕྱོགས་པའི་ཡུལ།།
སྲིན་མོ་བྲག་ཅེས་བྱ་བའི་གནས་མཆོག་དེར།།
བགྲོད་པའི་ལས་སྐལ་ངེད་ཅག་སྐལ་བར་ཤར།།
གྲོང་དང་བྲལ་ཏེ་གཡོན་གྱི་བཤུལ་ནང་ཞུགས།།
བཤུལ་གྱི་སྣེ་མོ་ནགས་རིའི་རྐེད་དུ་ཟུག །
རྐེད་པར་བཟོས་པའི་འཁོར་ལྷས་གཞིར་སླེབས་པར།།
གཞི་རྒྱ་ཆེ་བའི་གནས་མཆོག་མིག་སྔར་ལྷམ།།
རྡོ་སྐས་བརྒྱུད་དེ་གྱེན་ནས་གྱེན་འཛེགས་ཚེ།།
ལམ་འགྲམ་སློབ་དཔོན་པད་མའི་མཚམས་རྡོ་དང་།།
རྟགས་བརྒྱད་རི་མོ་གསལ་བའི་རྡོ་ཕ་བོང་།།
དུག་སྦྲུལ་རང་བྱོན་བཅས་པ་གསལ་ལེར་མཐོང་།།
གཞན་དུ་བྲག་རྡོ་གཞི་རུ་སྐྱེས་པ་ཡི།།
འབྲུག་ཚང་འཁོར་ཤིང་དུ་གྲགས་ལྗོན་དབང་དང་།།
གནམ་ཐག་ཅེས་པར་འབོད་པའི་འཁྲི་ཤིང་དེ།།
གདོད་མའི་ནགས་ཚལ་རྒྱན་དུ་མཁའ་ལ་བསྲིངས།།
ལྷག་དོན་གུ་རུའི་དགུང་གྲངས་བཞི་ཟུང་གི །
ཞབས་རྗེས་དང་ནི་མཆོག་ནས་ཁྱུང་ཆེན་དང་།།
སྲིན་མོ་དམ་ལ་བཏགས་ཤིང་བསྒྲིལ་བ་ཡི།།
མགོ་དང་རུས་སྒྲོམ་གོར་མའི་གཟུགས་སུ་གསལ།།
ད་དུང་མཁའ་འགྲོའི་ཚོགས་ཞིང་དུར་ཁྲོད་ཆེ།།
འཇམ་དབྱངས་རལ་གྲི་ལ་སོགས་རང་བྱོན་དང་།།
རྒྱལ་དབང་དྲུག་པའི་དབང་མཆོག་གནང་སྐབས་ཀྱི།།
བཞུགས་ཁྲིའི་གནའ་ཤུལ་དག་ཀྱང་ཉམས་མེད་གནས།།
དེར་མཐུད་རྐེད་ལམ་ཡུད་ཙམ་བརྒྱུད་ཙ་ན།།
པོ་ཏི་སྟོང་ཕྲག་བརྩིགས་འདྲའི་བྲག་གི་ངོས།།
མུ་ཏིག་ཁྲི་ཕྲག་འཐོར་འདྲའི་རྦབ་ཆུའི་རྒྱུན།།
འགྲོ་མང་སྡིག་སྒྲིབ་སེལ་སླད་ཤར་མར་འབབ།།
ནམ་ཟླ་ཡག་ཤོས་འཕྲད་པའི་དུས་བཟང་ལ།།
རྦབ་ཆུའི་ཀློང་ནས་མར་མེ་མཆོད་རྐོང་བཅས།།
མཆོད་ཆས་སྣ་ཚོགས་སྐར་མདའ་ཆད་པ་བཞིན།།
མངོན་སུམ་མིག་ལ་ཤར་ཞེས་ཀུན་གྱིས་གླེང་།།
གླེང་གཞི་དེ་ཚོའི་རྒྱུན་ཐག་མ་བཅད་པར།།
ཕྱི་ཉིན་ཞོགས་པའི་ཉི་གཞོན་གདོང་བསུས་ནས།།
ཕྱོགས་མགྲོན་དག་ལ་མག་མང་ཡུལ་ཚོ་དང་།།
ཉེ་སའི་སྤྱང་ཚང་རོང་དུ་མཇལ་སྐལ་སྨིན།།
ལམ་གྱི་གཞོགས་ཟུང་རྐང་འཐུང་བྱེ་བས་བརྒྱན།།
རྩེ་མོར་བྱ་དང་བྱིའུ་ཡི་མགྲིན་གླུ་སྙན།།
ཀླུང་དུ་ཆུ་བོའི་ཤང་སྒྲ་ཕྱོགས་ཀུན་ཁྱབ།།
བདེ་ལྡན་ཞིང་གི་བཀོད་པ་དྲན་དུ་གསོ།།
སྒོ་ཆེན་འཛུལ་བར་མི་ཚད་རྡོ་རིང་དང་།།
མཁའ་འགྲོ་མ་ཡི་མྱོས་བུམ་རང་བྱོན་དེ།།
ཁ་གཏད་མ་ཡིན་ཕྱོགས་གཉིས་ལྷུན་གྲུབ་པ།།
གནས་འདིའི་གསང་རྣམ་མངོན་སླད་བཞེངས་དང་མཚུངས།།
རྡོ་སྐས་རྡོག་པས་གནོན་བཞིན་ཡར་ཕྱིན་ཚེ།།
སློབ་དཔོན་པད་འབྱུང་མཆོག་གི་གསོལ་ཐབ་དང་།།
བྱ་སྐད་བྲག་དང་རྡོ་རྗེ་ཕག་མོའི་བྲག །
མཁའ་འགྲོ་འབུམ་གྱི་བྲག་ཕུག་རིམ་པར་བསྟར།།
དེའི་གོང་གསང་བདག་དཔལ་རི་རང་བྱོན་དང་།།
གུ་རུ་ཆེན་པོས་སྒྲུབ་རྟེན་གནང་གྱུར་པའི།།
དུར་ཁྲོད་ལས་གཞན་ཁོང་གི་སྒྲུབ་ཕུག་བཅས།།
དད་ལྡན་དད་པའི་རྟེན་དུ་ལྷན་ནེར་མངོན།།
ཞོལ་གྱི་གྲམ་རྩར་སྤྱང་ཀིའི་གཟུགས་བརྙན་ཞིག །
གོར་མའི་གཞི་རུ་བབས་པའི་ཡང་མཐའ་རུ།།
གཡུ་ཆུ་ཞེས་བྱའི་བྱིན་རླབས་འབུམ་འཇོ་ཆབ།།
ཆུ་མིག་བརྒྱ་རྩར་འདྲེས་ནས་ཐུར་དུ་འབབ།།
འབབ་ལྡན་དེའི་འགྲམ་ནགས་ཀློང་མ་བཏང་བར།།
ཕྱི་ལམ་བརྒྱུད་པར་རྒྱལ་ཡུམ་སྒྲོལ་མའི་ཞིང་།།
ཞིང་མཆོག་གཡུ་ལོ་བཀོད་པར་ལན་གཅིག་ཏུ།།
ཕྱིན་འདྲའི་སྤྲོ་དགའ་ཟད་དུ་མེད་པ་རྒྱས།།
ལུས་ཀྱི་ལོ་འདབ་དུས་ཀྱི་རླུང་བུ་ཡིས།།
དེད་ནས་ཕ་སའི་པང་དུ་བདེར་འབྱོར་ཡང་།།
བྱིན་ཅན་གནས་དང་ལས་ཅན་གྲོགས་རྣམས་ཀྱི།།
བརྙན་བཟང་བྲག་བརྐོས་རི་མོ་བཞིན་དུ་ཟབ།།
རྟེན་འབྲེལ་མགོ་ནས་འགྲིག་པའི་དུས་བཟང་འདིར།།
རྩོམ་མཁན་རྩོམ་འབྲིའི་སྙུག་ཁ་རབ་ཡངས་ཤིང་།།
ལེགས་པོ་ལེགས་ཚོགས་ལམ་དུ་མྱུར་ཞུགས་ཏེ།།
རེ་འབྲས་ཡིད་བཞིན་སྨིན་པའི་བཀྲ་ཤིས་ཤོག །
