ཨེ་མའོ་འབྱུང་ལྔའི་ཚོས་སྣ་འབུམ་ཕྲག་སྟེང་འོག་འཁྲུགས་པའི་དཀྱིལ་འཁོར་ལྟེ་བར་འཛིན་མ་སྒེག་མོས་སྒྱུ་མའི་བྲོ་ར་ལན་མང་བཤམས་པས་ཁམས་གསུམ་གོ་འབྱེད་སྙིང་བོའི་ཁུགས་སོར་སྨྲ་ཤེས་དོན་གོ་སྐྱེ་འགྲོ་ཁྲག་ཁྲིག་སྟོན་མཚན་མཁའ་ལ་རྒྱུ་སྐར་བཀྲ་བཞིན་ཀུན་ནས་དཀྲིགས་ཤིང་རིམ་ཅར་བརྡོལ་བའི་སེམས་ཅན་ཞེས་བྱ་ལངས་པའི་གཟུགས་ཉིད་ཐོ་ཡོར་ཉམས་ཀྱིས་ཕྱོགས་སུ་བྱེར་བ་པགས་རློན་བརྒྱངས་འདྲའི་ངང་ཚུལ་འཛིན་པ་ཇི་ལྟ་ཇི་ལྟར་ལས་ཀྱི་བཀོད་པའི་ཡུལ་གྱི་རྒྱ་ཡིས་དེ་ལྟ་དེ་ལྟར་ཕྱོགས་མཚམས་བར་མེད་བདག་གིར་འཛིན་ཞིང་ཉོན་མོངས་དུས་མེ་གཅིག་མིན་ལངས་པས་ས་ཆེན་ཁྱོན་ཀུན་ཁྲག་གིས་བརྫིས་གང་འབྲོང་རྒོད་ཁམ་པའི་ཡ་ཁོག་ཧྲིལ་པོ་བྲག་གི་ལོངས་སྐུར་དམར་མཆོད་བགྱིས་འདྲ་བགྲང་བྱའི་འཁོར་མོ་ཡུན་གྱིས་བསྲིངས་ལས་བྱུང་བའི་ཆུ་མོའི་མགོ་ཁུངས་སྙེག་དུས་ཡི་གེའི་ཨག་རྒྱངས་ཤོག་བུའི་ཁུད་ན་བྱེ་མས་གཅུད་པའི་ཚིལ་ཤར་རབ་གསལ་དྲན་པ་ཁོ་རེ་ལྡེམ་ལྡེམ་འགྲོས་ཀྱིས་མི་ལ་གཅེར་བུའི་ཉམས་རྟོགས་ཀློང་གི་ཏིང་འཛིན་ལྷུང་བཟེད་མཐིལ་ལ་ཞེན་ཞིང་བསམ་པའི་ཚེ་ཡང་སྡང་དང་ཞེ་འགྲས་རྟབ་རྟོབ་སེམས་ངོར་བྱ་གླག་སྡེར་མོའི་དབལ་ཁ་བབས་ལྟའི་རྫུ་འཕྲུལ་འདི་ཀོ་སེ་གོལ་གཏོགས་པའི་ཡུན་ཚད་ནང་བཞིན་མིག་གི་རྒྱལ་མོའི་ལྕམ་དྲལ་སྐྱིབས་ལ་མངོན་ཆུང་ཚུལ་གྱིས་འཆའ་བ་འདི་ག་ད་ལྟའི་རྒྱས་སྤྲོས་སྣང་བ་རང་སྟེ་མེད་སྙམ་འཕྲུལ་ཤེས་ཐོད་ལ་ཡོད་ཀྱི་བྲང་ལ་ཁུ་ཚུར་བརྡབས་པའི་རྗེས་འབྲས་སུས་ཀྱང་གསང་ཚུགས་ཐུབ་རབས་མེད་པ་བློ་གྲོས་ཆེན་པོའི་མཚན་མ་རང་ངོ་ཀུན་རྫོབ་བདེན་གྱི་ཕུ་ཐག་ཐུང་བས་རྣམ་དཔྱོད་དཔུང་བའི་གཞི་རུ་ལོངས་ཤིག །
རྣམ་དཀར་དགེ་བའི་ཚེ་རབས་ལས་དང་བསོད་ནམས་ལེགས་པར་འཕྲལ་གྱིས་སྦྱར་བས་བགྲང་བྱའི་ཟོ་ཆུན་རྒྱུད་མོའི་བསྐྱེད་ལ་ལྷུམས་ཀྱི་ས་གཞིར་སྲོག་གི་མེ་སྟག་ཉེ་བར་འཚུབ་ཅིང་དཔྲལ་མིག་ཁོག་སྙིང་བཞིན་ལྟར་ལྟ་བུར་སྣང་བའི་བསྐལ་མེ་རབ་ཏུ་འཇེབས་པས་བསམ་སྤྱོད་ལྡ་ལྡི་ཕྱོགས་སུ་བྲེས་པའི་འདུ་འགོད་དེ་ཡིས་རྣམ་དཔྱོད་གློག་ཞགས་འཁྱུག་ལ་སྐུལ་བ་འབའ་འབའ་ལུག་དང་ཐེ་གེའི་སྒོ་ཕྱུགས་མགྲོན་བུ་དྲིལ་བུའི་ཁུག་སྣའི་རི་མོས་བར་སྣང་ཡངས་པོ་འཕྲེད་ཀྱིས་བཟུང་བ་བྱིས་དུས་འཇིག་རྟེན་དྲན་ན་མཚར་ལ་བསམ་པ་ཙམ་གྱིས་ལོག་ན་འདོད་པ་ཀ་མད་མཉན་པའི་རྗེས་སུ་ཞུགས་ཏེ་བློ་གྲོས་ངང་ངུར་ཆུ་ལ་དེད་ཅིང་རིག་པའི་ཆུ་རྒྱུན་ལན་མང་བསྲུབས་པ་ད་ལྟའི་འཚོ་བའི་ཕབ་རྟ་ལགས་ཀྱི་བཤུལ་ལམ་རིང་མོ་ཐོས་པས་འཇལ་ཞིང་ལར་ཡང་ཐུ་བའི་ངང་ཚུལ་འཛིན་པ་བསམས་ན་ཚེ་འདིའི་ལས་འཕྲོ་འདི་ག་ཨེ་ཡིན་སྙམ་ཞིང་འཛུམ་དང་སྨིན་སྡུད་འགྲན་བཞིན་འཆར་ལ་རེ་བའི་སྙིང་ཕུར་རྟིང་ལ་གདབས་པའི་ཡིད་འགྱུར་མཚོ་མོ་བྲག་ལ་བར་མེད་རྡེབ་མགོ་རྩོམ་ཞིང་ནོར་ལུག་རྩྭ་ཁར་འབྱམས་འདྲའི་ཤ་ཉེ་སྙིང་ལ་འཕོས་མོད་རྩིས་ཐང་ཀབ་ཀོབ་ཁོག་དཔུང་ཧྲལ་ཧྲུལ་ཐོལ་གྱིས་སྐྱེས་ཤིང་རྣམ་ཀུན་དཔུང་སྐྱོར་གཞོགས་ནས་བཏེགས་པའི་དྲིན་གྱི་གཙང་པོའི་མུ་མཐའ་གཞལ་བ་ངལ་བ་བརྒྱ་ལས་ཅི་ཡང་མིན་པས་སྙིང་གི་སྒྲོམ་དང་ཚེ་རབས་ཀུན་ཏུ་གཏན་བརྗེད་མེད་དེ་བདེ་སྐྱིད་དཔལ་གྱི་འཕལ་ཀ་སྤྲོད་བཞིན་གཏན་འཚོའི་སྨོན་ལམ་རྩེ་གཅིག་འདེབས་ཤིང་གྱི་ནའི་ལས་ཀྱི་འཕྲོ་འདུ་ཐམས་ཅད་མུར་མུར་བསྲིངས་པའི་དགེ་རྩ་ཡོངས་རྫོགས་ཁྱེད་ཅག་བདེ་བའི་རྒྱུ་རུ་འགྱུར་ཤོག །
འཕོ་ལྟུང་གནམ་གྲུའི་འགྲོས་ཀྱི་རྗེས་འགྲོའི་ཤ་གཟུགས་བན་བུན་སྡུག་བསྔལ་མཁྲེགས་པོ་སྣང་བའི་སྤམ་རྫུ་ཐག་སྒྲས་བསད་པའི་བསྟོད་ར་མཐེ་བོང་ཕུགས་སུ་བསྐུངས་པའི་དཔའ་རབས་སྒྲུང་རྒྱུད་ཡུན་དང་ཡུད་ལ་བ་གམ་འཕྱོར་བོའི་ཤ་སྐྱིའི་གསའ་གསེང་བར་མེད་འཐིམ་པའི་ཡོ་འཁྱོག་ཐེབས་ལ་དགྱེ་སྒུར་མང་བའི་གྲིབ་མའི་རྟེན་ཅན་གང་དེ་ཀུན་ཏུ་འཕྱོ་ཙམ་འཇགས་ཙམ་ངེས་མེད་ལྡང་བའི་འཆར་ཡན་ཉམས་རྟོགས་གསོལ་ལོ་མཆོད་དོ་ཞེད་དེ་བྲོས་པའི་འཁྱམ་པོ་གང་དེའི་བརྩེ་དུངས་འཕྱོར་བོ་མཚན་མོའི་མགོ་དཀྲིས་དམར་པོའི་ཁུད་ཀྱི་མངའ་རིས་ཁྲ་ཁྲ་སྤྲོ་གར་དང་ནི་འཇོ་སྒེག་ཉམས་འཛིན་ཁོག་པར་བསྐུངས་པའི་གཟུགས་ཅན་སེམས་བྱུང་སད་ལ་ཁད་ཀྱི་རྨི་ལམ་འཁྲལ་འཁྲུལ་འཁྲལ་འཁྲུལ་གྱིས་གཙེས་སྡུག་ཡུས་འདུ་འབྲལ་འདུ་འབྲལ་སྟག་གཟིག་སྟག་གཟིག་སློག་པ་སློག་པ་ཁྲ་ཁྲ་ཁྲ་ཁྲའི་མི་སེམས་སྒྱུ་མའི་གར་གྱིས་གཏིང་ནས་ལྷེམ་པའི་སྣང་བའི་གཡབ་གཡུག་དྲག་བསྐྱེད་མེད་པའི་ལས་ནད་ཆུ་གཏེར་ནད་ཁྲིར་འབྱར་བའི་དུས་ཀྱི་མེ་ཏོག་གསང་བའི་རྒྱ་ཅན་ཐ་གུ་དུམ་བུས་ཁྲུ་ཚད་བརྒྱབ་པའི་རེའུ་མིག་ཡིག་ཆའི་ཆར་བའི་ཤག་སྒྲ་སྣང་བའི་བ་མོས་བཏེགས་པའི་སྨྲེང་གཞས་སྨྲེང་གཞས་ཀྱིས་གྲུབ་སྟོད་གོས་ཤུར་མོའི་མི་སྐྱའི་གཟུགས་བརྙན་ཆོབ་ནི་ཚ་བ་གྲོག་སྦུར་རྣམ་པས་བ་གམ་གསེང་དབྲག་ཕྱོགས་མཚམས་རྒྱུ་བ་དྲན་པའི་ངོས་ཀྱི་སྣང་བའི་རྦ་རླབས་ཁྱབ་པ་འདུ་ཤེས་ཚོར་བའི་སྨུག་སྤྲིན་ག་ས་གང་དུ་ཆལ་ཆིལ་བཀྲག་པ་ཕུགས་ཀྱི་འདུན་མ་བརླན་གྱིས་བཟུང་བ་བསམ་ཞིང་བསམས་ན་ཆོ་ངེ་གད་མོ་ལྷན་ཅིག་འགྲོགས་པ་སྲིད་དང་མཐའ་རུ་རྟག་པའི་ངོ་བོར་ལས་ཀྱི་རྣམ་པར་གསེང་མཐོར་བསྐོས་སོ།།
གང་ཚེ་སྙིང་སྡུག་ཡིད་ཀྱི་བརྟན་པ་ཁལ་གྱི་དོ་ཡ་དུས་ཀྱི་རྒྱུན་ནང་མེ་ལས་དབལ་ཚའི་བརྩེ་དུངས་བསིལ་རླུང་ཕྱོགས་མཚམས་གཡུགས་པས་འཛིན་མའང་དྲོད་རྒྱས་རྐང་རྗེས་གང་བཀོད་པད་མ་ཚོམ་བུའི་རེ་ཁཱས་བརྒྱན་པས་ཡིད་ལ་སིམ་ཚོར་ལུས་ལ་བདེ་སྣང་བརྒྱ་བྱིན་ལག་ལས་འཕྲོག་བཞིན་བྱུང་བ་འདས་པའི་བགྲང་བྱའི་རྒྱས་སྤྲོས་ལགས་ཤིང་དུས་ཀྱི་ཆར་ཡང་རྙིང་སོང་མེད་པའི་སྤོབས་པ་གང་དེ་ད་ལྟ་བསམས་ན་སྐྱིད་ཀྱི་གཞི་མ་ཡུན་དུ་འགྲོགས་པས་མངལ་གྱི་མཚོ་མོར་ཁྱེའུའི་མེ་ལྕགས་རླུང་རླབས་དྲག་ཏུ་བརྡབས་པའི་མཐའ་ལ་ཤེས་རབ་རྟེའུ་སྐད་ཅིག་ཅིག་ལ་མཁའ་ལ་མངོན་པར་འཁྱུག་པའི་མཚན་མ་ལེགས་སོའི་བརྡ་ཡིས་ཀུན་ནས་དྲངས་པས་སྐྱ་རེངས་ཁད་ཀྱིས་ཁད་ཀྱིས་བྲོས་ཏེ་ཡུད་ཙམ་འགོར་བའི་དུས་ཀྱི་མཇུག་སྒྲོར་ཟམ་ཟིམ་ཆར་བ་དགེ་ལེགས་འཆང་མ་ཨ་སྔོན་དབྱིངས་ནས་དལ་བུར་འབབ་པའི་ཚུལ་འདི་རྟེན་འབྲེལ་ཆ་འགྲིག་སྙམ་པ་དེའི་ཚེ་རེ་སྒུག་རྣ་བའི་དཔྱིད་ལ་བུས་པའི་ངུ་ངག་ལྷང་ལྷང་དབྱངས་བཅས་ཐོས་པའི་ཚེ་ན་སྨྲ་བསམ་བརྗོད་འདས་འཚུབ་མ་གང་དེས་སེམས་བྱུང་ཤོག་སྐྱ་ཤར་གཡུགས་ནུབ་གཡུགས་གློ་བུར་ཏི་སེས་མནན་དང་མཚུངས་ལ་སྐབས་རེར་གཤོག་པས་བཏེགས་དང་འདྲ་བའི་འཚེར་འཚེར་ལམ་ལམ་སྣང་བར་ཤར་སོང་ཨེ་མ་ཤ་ཆད་ཁྱེའུ་ཉིད་མཐོང་ཚེ་དགྲ་སྤྱན་ཐག་པས་རབ་བཀྱིགས་ཟླ་བཞིན་ཁོ་བོ་དམ་པོར་བཅིངས་པའི་མོད་ལ་ཚོར་བའི་ཁྲིག་སྒྲས་བ་གམ་འདི་ཡང་འདར་སྙམ་བྱེད་མཐར་རྒྱས་སོ་དགའ་བ་རྒྱས་སོ་གཟི་བརྗིད་ཚེ་རབས་ལས་ཀྱི་བསྐོས་ཐང་འདི་ག་ད་རེས་མིག་ལ་གཟུགས་ཅན་ནང་བཞིན་གྲུབ་པ་ནོམ་གྱི་དྭངས་མར་འདོད་ལ་འཇུག་གོ །
༢༠༡༦.༥པར་ཟི་ལིང་གི་སྨན་ཁང་ཞིག་ནས་ཤར་མར་བྲིས།
༢༠༡༨.༡༠པར་ཡང་བསྐྱར་བཅོས།
