ཕྱི་དྲོ་འདི སྔོན་ཆད་དང་བསྡུར་ན་ནགས་ཚལ་ལྟར་སྲབ
ཕྱི་མིག་མེད་པའི་ཉི་མའི་དཀྱིལ་འཁོར་ན
ཁ་བ་འདྲ་བའི་དྲོད་ཐིགས་ཉག་ཅིག་ལྷག་འདུག
ཕྱི་དྲོ་འདིར་བདག་གིས་ལེ་བར་སྟོང་ཕྲག་གི་བར་ནས་ཐོས་མྱོང་བའི
སྤོ་བོའི་ཡུལ་ན བཙལ་ན་མི་རྙེད་པ་དག་ཨེ་རྙེད་ལྟ་བཞིན
ཁ་ཕར་ལ་འཁོར་བའི་བགྲེས་སོང་དབུ་སེ་དེར
སྐད་མཐོན་པོས སྤོ་བོ་ལགས་ཞེས་འབོད་དགོས་བྱུང
ཁ་ཚུར་འཁོར་དུས མི་དེ་ནི་ཉ་འཚོང་མཁན་གྱི་སྐད་རིགས་ལྡབ་ལྡིབ་སྨྲ་བའི
སྤོ་བོའི་ཡུལ་ནས་ལུས་པའི་ཚོང་བ་བགྲེས་མོ་ཞིག་རེད
སྤོ་བོའི་ཡུལ་ལ་སྤོ་བོ་མ་ཡིན་པའི་མིང་གཞན་ཞིག་ཐོགས་འདུག
མིང་དེ་གནས་དེའི་བྲག་རི་དང་གཞི་བདག་ལའང་ཆ་རྒྱུས་མི་འདུག
གནས་རི་དང་གངས་ལ་མོས་པའི་བདག་གི་ཆུང་མས
སྤོ་བོའི་ཡུལ་འདིའི་བྲག་གིས་ཞྭ་མོ་ཕུད་དགོས་པ་ལས་དབང་དང
ཆུ་བོས་མི་ཚོགས་འཁུར་དགོས་པའང་དུས་འགྲོས་རེད་ཟེར
ཕྱི་དྲོ་འདིར ང་རང་གཏོགས་པའི་མི་གསུམ་སྤོ་བོར་ཐོན
ལྷ་རི་གྱང་ཐོ་ཡིན་ནམ ཀོང་བཙན་དེ་མོ་ཡིན
རིའམ་ལྷ་ཞིག་གིས་མགྲོན་ལ་བོས་པའི་ཁོ་བོ་ཅག
གནས་དེར་ཞག་མལ་བྱས་ནས རི་བོ་ལ་ཅེར་ནས
མགྲོན་ཤོག་སྟེང་གི་ས་གནས་དེ་བོར་ཟིན་པ་ཡིད་ལ་དྲན
༢༠༡༨.༧.༢༧ཉིན་སྤོ་བོ་ནས་ཤར་མར་བྲིས།
གནམ་ལྕགས་འབར་བ།
རི་འདི་ལ་མིང་འདོགས་མཁན་ནི་སྲིད་པ་རྒན་པོ་མ་ཡིན་པར
ཁོང་གིས་ཀྱང་དྲན་མ་མྱོང་པའི་མགྲོན་པོ་ལག་རྩལ་ཅན་དེ་རེད
དེ་ནས་བཟུང་རི་བོ་ལ་རྒྱན་ཆ་བཏགས་ནས
རྩི་ཤིང་ལ་རྣ་ལུང་བཟོས་ནས
སྐད་འཕྲིན་ནས་སྐད་འཕྲིན་ལ་ཁྱབ་པའང
རི་འདི་ལ་གནས་པའི་གཞི་བདག་ལའང་གསལ་ཆ་བྲལ་འདུག
གནམ་ལྕགས་འབར་བ་འདི་རི་བོ་ཞིག་དང
གངས་རི་ཞིག་དང བྲག་རི་ཞིག་དང མེས་པོ་ཞིག་དང ལྷ་ཞིག་དང
དེ་ལས་ཀྱང་འདྲ་པར་ནང་ནས་གཟི་བརྗིད་ངོམ་ཤེས་པའི
དུས་ཀྱི་གཞི་བདག་ཁྱད་པར་ཅན་ཞིག་གོ
མོ་ཏྲའི་ནང་ནས་གནམ་ལྕགས་འབར་བ་མཐོང་སྐབས
ལག་པ་གཡུགས་ནས་བདེ་མོ་ཟེར་དུས
ཞྭ་མོ་ཕུད་ནས་ཀི་གསུམ་འདེབས་དུས
རི་བོ་ཁོ་ན་མ་ཡིན་པའི་གནས་ཀྱི་བདག་པོ་ཁྱེད་ཀྱིས
འཛུམ་མདངས་མེད་པར་ང་ལ་བདེ་མོ་ཟེར་དོན་ཅི་ཡིན
གནམ་ལྕགས་འབར་བ ང་དང་ཁྱེད ད་དུང་གཞན་དག
སྲིད་པའི་མི་རྒན་ཆང་གིས་མྱོས་ནས་བཤད་པའི་གཏམ་རྒྱུད་ཀྱི་མི་སྣ་དག་རེད་ཨང
༢༠༡༨.༧.༢༧ཉིན་སྤོ་བོའི་ཁོག་ནས་བྲིས།
