སྣང་བ་ཞིག་ལ
ཆུ་མགོ་ཐམས་ཅད་ཆུ་ཀླུང་གཅིག་ཏུ་ཕབ་ཀྱང
ས་གཞིའི་སྐྱི་གཉེར་མ་གསབ་པར་ཡུན་རིང་ལུས་སོང་སྣང་སྟེར
སྣང་བ་ཞིག་ལ
འོད་སྣང་ཐམས་ཅད་གཅིག་ཏུ་བསྲེས་ཀྱང
མུན་པའི་རྔམས་ཁ་མ་གསལ་བར་ཡུན་རིང་ལུས་སོང་སྣང་སྟེར
སྣང་བ་ཞིག་ལ
ཚིག་གི་ཚོགས་པ་ཐམས་ཅད་དབྱངས་གཅིག་ཏུ་བསྡེབས་ཀྱང
གངས་རི་ཙད་པས་བཞུ་དུས་ཀྱི
ངུད་མོ་མ་དཀྲོལ་བར་ཡུན་རིང་ལུས་སོང་སྣང་སྟེར
སྣང་བ་ཞིག་ལ
རྨི་ལམ་ཐམས་ཅད་གཙང་འགྲམ་གཅིག་ཏུ་བཅུག་ནས
ཕུགས་འདུན་གྱི་ཀོ་གྲུ་ཞིག་ཕར་ཕྱོགས་སར་བཏང་རུང
མཚོ་མོ་དར་ཁ་འགྲིག་དུས་ཀྱི
མི་རྐང་རྗེན་དེའི་རྨི་ལམ་མ་བསྒྲལ་བར་ཡུན་རིང་ལུས་སོང་སྣང་སྟེར
སྣང་བ་ཞིག་ལ
བརྡ་སྤྲོད་ཐམས་ཅད་གཅིག་ཏུ་བསྒྲིལ་ནས
སྐད་ཆའི་ཡུར་ལམ་ཞིག་བཏོད་རུང
རྣམ་ཤེས་ཐོགས་པའི་ཡིག་འབྲུ་དེའི
རྨ་ཁ་མ་སོས་པར་ཡུན་རིང་ལུས་སྣང་སྟེར
སྣང་བ་ཞིག་ལ
བྲག་ཅ་ཐམས་ཅད་གཅིག་ཏུ་བསྡོམས་ནས
ལུང་གཞུང་རེ་རེར་ཨ་ལན་བསྐྱོན་ཡོད་ཀྱང
སྐད་སྒྲ་གདོད་མ་དེ་མ་རྙེད་པར་ཡུན་རིང་ལུས་སོང་སྣང་སྟེར
