གཞས་ཚིག་ཅིག་ལས་ཁྱེད་རང་ཐོག་མར་རྙེད་པ་ནས
བདག་གིས་སྣང་བའི་ཞིང་བཀོད་ནས་རྡོ་རིང་ཞིག་བསླངས
དུས་གསུམ་གྱི་ནམ་མཁར་རྟག་ཏུ་མཆོད་མྱོང་བའང
འཕྱོངས་རྒྱས་ཞེས་པའི་བརྩེ་དུངས་ཀྱི་ཐ་སྙད་ཡིན་པ
ལྷ་སའི་རྡོ་བ་དང་ལྷ་ཚོགས་དཔང་ལ་བཞག་ཆོག
ཟླ་བ་སྒྲོལ་མ དོ་ནུབ་བདག་ལྷོ་ཁ་ན་ཡོད
ཁྱེད་ཀྱི་ཡུལ་མི་ཚོ་དང་ལྷན་དུ་མངར་ཇ་འཐུང་བཞིན
དབྱར་གཞུང་གི་ལྷོ་ཁ་ན་ཡོད
སྣུམ་ཤིག་ཤིག་གི་ཡར་ཀླུང
ཁུ་སིམ་སིམ་གྱི་ཡར་ཀླུང
ཆེས་ཐོག་མའི་མིག་ཟུང་གི་ཡལ་གར་ཐོགས་པ
ཚོར་བའི་གཙག་དྲུབ་ཇི་བཞིན་དེ་ཉིད་ཀྱིས་ལྷང་ངེར་འོངས་པ་ན
བདག་གིས་རྣང་ཞིང་གི་དྲི་མར་སྣོམ་བཞིན
ཁྱེད་ཀྱི་འཇའ་ཚོན་ལྟ་བུའི་ལང་ཚོར་རོལ་ཞིང
གནམ་སའི་ཁྱོན་ལ་བདེ་སྡུག་གི་ལས་འབྲས་གཏོར་ནས
མར་མེ་རྐང་གཅིག་འཕྱོངས་རྒྱས་ལ་བསྒྲོན
རྡོ་ཁང་གྲུ་བཞི་རེ་རེའི་ཡང་སྟེང་ན
དར་ལྕོག་ཁྲ་ཁྲས་སུ་ཞིག་ལ་གཡབ་མོ་གཏོང་ལ
བསང་དུད་དཀར་པོས་ཡང་སྙིང་སུ་ཞིག་གི་འདས་ལོག་ལ་རེ་སྒུག་སློང་བ་འདྲ་ཡང
བདག་ནི་སྨྲ་བརྗོད་ཀྱིས་ཀུན་ནས་དབུལ་བའི
ཨ་མདོ་ལུང་བའི་ཁེར་རྐྱང་གི་འགྲོན་པོ་ཞིག་ཡིན་ཨང
ཚོང་བ་ཚེ་རིང་བུ་ཁྲིད་ཀྱི་གདོང་ལ་ཡུན་རིང་ཅེར་ནས
རྒྱུ་མཚན་མེད་པར་རྡོ་ཤེལ་ཞིག་ཉོས
ཞིང་པ་སྤེན་པ་ལྷ་མོའི་རྒྱབ་གཟུགས་ལ་འཁྲེང་བཞིན
རང་དབང་མེད་པར་རི་བོའི་ཕར་རྒྱབ་ལ་དངན་པ་ཞིག་འཐེན
ཡུམ་བུའི་མཁར་སྟེང་ནས་སྨོན་ལམ་གྱི་སྙིམ་པ་སྦྱོར་དུས
ཁྱེད་ཀྱི་ཞལ་བཞིན་ཡར་ཀླུང་གཙང་པོའི་འབབ་རྒྱུན་ལས་མངོན་ཞིང
ཁྱེད་ཀྱི་གཞས་ཆུང་སི་ལུ་རི་རྐེད་ཀྱི་ན་བུན་ལས་གསལ་འོང
ཉི་མའི་དཀྱིལ་འཁོར་ལ་བཤམས་པའི་འཕྱོངས་རྒྱས་གྲོང་ཚོ
ཟླ་བའི་བསིལ་ཟེར་ལ་ཐིམ་པའི་ཟླ་བ་སྒྲོལ་མ
གདོད་ནས་རང་བཞིན་གྱིས་དག་པའི་ཞིང་ཁམས་དེ་རུ
ཨ་ཅག་ཚོའི་གདོང་ལ་ཁྱེད་ཀྱི་མཛེས་སྡུག་སྨིན་ཞིང
གསར་བུ་ཚོས་ཁྱེད་ཀྱི་ལས་འཕྲོ་ལ་གསེར་ཞལ་གཏོང
ཁྱེད་ཀྱི་ལོག་ཕེབས་ནི་འཕྲུལ་སྣང་འབའ་ཞིག་ཏུ་ཟད་ཀྱང
ལྷོ་ཁའི་མཚན་མོ་འདིར
ངས་ཨ་ཅག་ཅིག་ལ་གནས་ཚང་གཡར་འདོད
ངས་ཨ་ཅག་ཅིག་ལ་ལ་གཞས་གཏང་འདོད
ཟླ་བ་སྒྲོལ་མ དད་པ་རྩེ་གཅིག་ལ་རོལ་བའི་བུ་མོ་ཞིག་ཡིན་ནམ
ཟླ་བ་སྒྲོལ་མ སྐྱབས་འགྲོ་མུར་མུར་ཟློ་བའི་བགྲེས་མོ་ཞིག་ཡིན
ཟླ་བ་སྒྲོལ་མ མོ་ཏྲ་ཤར་སེ་གཏོང་བའི་མཛེས་མ་ཞིག་ཡིན་ཏེ
ཟླ་བ་སྒྲོལ་མ ནང་མ་སྟོད་གཞས་གཏོང་པའི་ལྷ་མོ་དེ་ཡིན་ལགས
ཕྱི་དྲོ་འདིར ཡར་ཀླུང་གི་ཟམ་ཁ་ནས
སྐུ་དྲག་རྒྱགས་པ་ཁ་ཤས་གློ་བུར་དུ་དྲན་འོང་དུས
ཤང་ཤང་ཆུ་མོའི་རོལ་དབྱངས་ཀྱི་གདངས་ལ
འཕྱོངས་རྒྱས་ལྷོ་ཡི་བུ་མོ་ཞིག་ཀྱང་དྲན་ཡོང
མ་གཞི་ནས་གླུ་སྐད་ལ་སིམ་པའི་ཁོ་མོ
ནམ་ཡང་གླུ་སྐད་ཀྱི་ཁྲོད་ནས་གཏན་དུ་གསོན་པར་གྱིས་དང
བདག་གི་སྙིང་ཉེ་བའི་བརྩེ་བ་ལགས
